Tywydd

Wedi mwynhau mas draw yn noson elusennol Marie Curie nos Wener. FFANTASTIG o noson a diolch i bawb nath drefnu. Yn flinedig iawn ddydd sadwrn!

Er ei bod hi'n weddol oer heddiw o hyd, ac er fydd na law o gwmpas yfory a ddydd Mercher, mae'r tymheredd yn sicr o godi yn ystod y dyddiau nesaf, felly fe fydd hi'n fwynach o lawer. Tua 15°C. O'r diwedd medde rhai ohonoch chi!

Mae 'na wythnos amrywiol o'm mlaen i wsnos yma, a dweud y lleiaf! Yn Llanelli heddiw yn y stiwdio dywydd ac wedi croesawu plant o ysgol Uwchradd Rhydywaun. Wedi bod yn y stiwdio gyda nhw yn sefyll o flaen camera, pawb i'w gweld yn mwynhau'r profiad!

Yn anffodus (wps, y gair yna eto!) fi'n mynd i'r deintydd bore Mercher i gael dant ARALL allan ac yn cynhyrchu deunydd hyrwyddo yn S4C pnawn Mercher a Iau. Edrych ymlaen at hynny.

Yna ddydd Gwener, yn ddibynnol ar yr amgylchiadau ac ar alwad ffôn, 'dwi'n mynd i helpu gyda'r ŵyna ar fferm Meinir Jones, cyflwynydd Ffermio, a'i theulu, yn agos at Llandeilo. Nawr fi WIR edrych ymlaen at hynny, er mae Meinir wedi rhybuddio fi i ddisgwyl lot o dynnu coes! Dim problem!

Nai flogio am y profiad nos Wener a'r penwythnos.

Hwyl am y tro

Chris

Nac ydy wir! -37C yn Moscow heddiw, ond fydd hi'n teimlo'n oer iawn, iawn heno ac yn rhewllyd, ac er mai diwrnod sych a heulog arall fydd na yfory, byddwch yn barod am y tymheredd yn disgyn i -8C nos yfory. Mwy o dywydd oer dydd Gwener hefyd.

Ond dwi'n CARU'R tywydd yma!!! Heulog ac oer. Wrth fy modd.

chris tywydd

Fe ddisgynodd dipyn o eira yn Sir Benfro neithiwr a pheth cyntaf bore ma ond erbyn hyn, mae hi wedi clirio a sychu. Rhai cawodydd gaeafol yn bosib heno o gwmpas y tir uchel ond sych a chymarol glir ar y cyfan. Ond yn oer iawn yn y gwyntoedd de ddwyreiniol ac o bosib yn rhewi heno!

Newydd fod allan yn Llanelli amser cinio a mae hi YN oer! Dal yn oer dros y dyddiau nesaf yma hefyd ond dim golwg o'r eira ar hyn o bryd, sy'n siomedig iawn i rai fi'n siwr!

Dwi'n teithio i Benygroes dydd Iau yma i siarad a Merched y Wawr, Penygroes a dwi'n siwr fydd y croeso'n gynnes iawn!

Cyn hynny beth bynnag, mae pawb yn yr adran yn cyfarfod nos Fercher yma i feirniadu cystadleuaeth ffotograffiau tywydd. Disgwyl mlaen!

chris tywydd

Ges i gyfle i fynd i gerdded gyda fy mrawd yng nghyfraith ddoe, o Bontneddfechan i Ystradfellte yng Nhwm Nedd, a cherdded tu ôl i raeadr Sgwd yr Eira. Anhygoel o brofiad a gwerth y cerdded anodd ar lethrau'r afon ac yn y mwd a'r glaw! Jac y ci wedi byhafio'n wych chwarae teg ond wedi blino'n lan heddiw druan.

Ma 'na gerdded gwych yn yr ardal honno a hanes diddorol iawn a mae'r rheadrau amrywiol yn werth eu gweld. Ond ewch a map gyda chi! A pharatowch am dywydd gwahanol o fewn oriau. Tywydd ddoe ar y cyfan yn sych ond ambell gawod wedi diflasu pethe braidd yn y pnawn a Jac yn crynu tra'n sefyll tu ôl i Sgwd yr Eira!

Dwi'n ''Stiff'' heddiw!

Chris Tywydd

Dwy awr a deng munud i gyrraedd y swyddfa yn Llanelli heddiw!! Damwain 11 car ar yr M4. Lwcus 'i bod hi'n sych.

Gorfod tynnu dant ddoe felly dim ond cawl a ffrwyth meddal i fwyta heddiw, sy'n anodd iawn!

Ma'r tywydd yn gymysglyd iawn ar hyn o bryd; cyfnodau braf a chawodydd ysgafn. Ddim mor oer a hynny gyda'r tymheredd yn codi i rhyw 12°C erbyn dydd Sul, felly yn fwynach o lawer.

Mae Mari Grug yn sgïo yn Ffrainc ac yn ôl pob sôn, mae rhannau o Ewrop, gan gynnwys Ffrainc ac Awstria, yn gweld eira gwych ar gyfer y tymor sgïo, felly mae'n swnio'n berffaith.

Neis i weld y ddwy "bos" yn y swyddfa heddiw.

Chris Tywydd

Wel dyma fi, adre unwaith eto. Wedi bod allan am dro gyda Jac y ci bore ma yn barod ond bois bach, dyna wahaniaeth yn y tywydd. Braf ond oer ddoe ac echddoe, ond heddiw??!! Glaw man a chyson, niwlog iawn, diflas diflas diflas. Dwi`n siwr eich bod yn gwybod erbyn hyn mod i`n hoffi cerdded, ond mae hi`n anodd iawn i godi`r awydd i fynd allan yn y fath yma o dywydd. Ac i neud pethau`n waeth, dwi`n gorfod mynd i`r deintydd mewn awr, ac efallai yn gorfod cael ``extraction`` ! O leiaf dyw hi ddim mor oer a ddoe sbo.

Hwyl am y tro. Mewn yn y swyddfa yfory am 4 diwrnod.

chris tywydd

Bore da! Dwi nol yn y swyddfa heddiw ar ol dyddiau o salwch ers y flwyddyn newydd. Ac yn brwydro yn erbyn y pesychu drwy'r amser.

Mae Elena Mai y gynhyrchwraig mor amyneddgar beth bynnag a dwi'n ddiolchgar iawn i Erin a Mari am fod mor gefnogol.

Tywydd? Digon syml a sefydlog ar hyn o bryd, er mae rhaid dweud, dwi'n edrych ymlaen at y tywydd yn oeri erbyn diwedd yr wythnos! I gael rhewi'r afiechydon a'r ''jyrms''! Cwpl o ddyddiau bant ar ol heddiw a dwi wedyn yn mynd i fynd ati GO IAWN i gael gwaith siarad o gwmpas Cymru, fel rhan o fy ymgyrch cyflwyno'r tywydd am 21 mlynedd! Cawn weld.

Hwyl am y tro

chris 

Gyda'r Nadolig rownd y gornel 'sdim sôn am eira eleni, yn wahanol i fel odd hi llynedd.

Ar hyn o bryd ma'r llif aer mwyn o'r de orllewin yn parhau, felly mwy o dywydd cymylog gyda'r tymheredd ymhell uwchben y cyfartaledd arferol ar gyfer diwedd mis Rhagfyr. Bydd hi'n troi'n wlyb 'fory wrth i ffrynt oer groesi'r wlad a thu ôl i'r ffrynt aer oerach yn ein cyrraedd o'r gogledd orllewin. Felly 'fory y tymheredd rhyw 3 i 5°C yn is na heddi' a hyn yn arwain at noson oer a rhewllyd, felly byddwch yn ofalus os yn teithio. Ond buan iawn bydd yr aer oerach yn cael ei ddisodli gan aer mwynach unwaith eto. Er bydd Noswyl Nadolig yn dechrau'n oer a braf,  dirywio neith hi yn ystod y dydd ac yn arwain at ddiwrnod Nadolig cymylog a mwyn! Felly wedi diwrnod nadolig oer iawn llynedd, -18.2 yn Yr Alban, stori wahanol iawn fydd hi ar gyfer Nadolig 2011.

Ar ôl gwaith nos 'fory mi fydda i yn mynd tua'r gorllewin ar gyfer yr Ŵyl, a 'dwi ffili aros! Nadolig Llawen i chi gyd a Blwyddyn Newydd Dda.

A ninnau wedi cael Hydref mor fwyn....mae pethau'n sicr wedi newid erbyn hyn. Mae wedi oeri gryn dipyn ac wrth i gyfres o wasgeddau isel dwys 'sgubo heibio ni dros y dyddiau nesaf, mi welwn ni law trwm, cawodydd gaeafol, gwyntoedd cryfion ac o bosib peth llifogydd yn datblygu yng Nghymru wrth i'r holl law syrthio ar dir gwlyb.

Yr wythnos diwethaf, yr Alban welodd y gwaethaf o'r amodau wrth i'r gwynt hyrddio dros 100mya ond heno, wrth i ganolbwynt y system wasgedd isel orwedd ymhellach tua'r de, arfordiroedd Lloegr a Chymru sy'n debygol o weld y gwynt cryfaf a'r hyrddiadau cyn gryfed â 80mya. Mi allai droi hyd yn oed yn fwy stormus erbyn nos Iau a dydd Gwener felly'r neges yr wythnos hon, heb os, ydi i gadw golwg fanwl ar y rhagolygon.

Bore dydd Mawrth, dwi am siarad ar Radio Cymru am y tywydd stormus yma, a`r obsesiwn braidd sydd gan rhai pobl o rhoi enw neu term ar y fath yma o dywydd. Yn yr achos yma. y ``storm perffaith``. A oes na fath beth? Ai e`r ffaith fod y gwasgedd uchel i`r de o Brydain, ar y cyfandir; a bod gwasgedd isel naill ochr i Brydain? A bod mwy nag un gwasgedd isel allan dros for yr Iwerydd? A bod y ffryntie yn troi`n berffaith o`u hamgylch? Ac yn ogystal a hynny, ma`r jet-lif yn gorwedd i`r de o Brydain ar hyn o bryd, yn galluogi`r gwyntoedd i ymosod ar Brydain o`r Gogledd/Gogledd Orllewin? Ai dyna diffiniad ``storm perffaith``?

Ma`r jet-lif yn symud drwy`r amser wrth gwrs ac yn rheoli ein tywydd ni, felly nid yw`r fath yma o beth mor anghyffredin a hynny. Mae na dywydd stormus yn debygol o effeithio ar Ogledd Ddwyrain yr UD yn y dyddiau nesaf yma hefyd, felly a fydd honno`n ``storm perffaith``?

Nid yw`r gwyntoedd yn debygol o gyrraedd 165mya fel yn yr Alban yn ddiweddar, felly yn yr ystyr hynny, fydd hon ddim mor ``berffaith`` a hynny. Ond i fod yn ddifrifol, mae na law trwm yn mynd i ddisgyn yn ystod yr wythnos hon ym Mhrydain felly ma angen bod yn ofalus o`r llifogydd posib a`r dwr yn casglu ar y ffyrdd.

Ond yn hytrach nag ofni`r fath yma o dywydd, beth am ei fwynhau? Ewch allan yn y gwynt a`r glaw a mwynhewch y pwer a`r egni a`r bwrlwm. O fewn rheswm wrth gwrs!

chris tywydd