Wel mae'r tywydd di bod yn ddigon cecrus yn ddiweddar, ambell ddiwrnod sych ond dal gormod o law a dim digon o wres, yn sgil hyn dyw'r porfa dal ddim yn tyfu'n arbennig o dda gyda ni, yn enwedig ar y ddaear trwm clai. Erbyn amser hyn llynedd roedd y defaid wedi eu cneifo ers pythefnos, ond does dim sôn am gneifo eleni mor belled. Ma'r gwartheg i gyd bron wedi eu gwerthu nawr, fe aeth 4 bore 'ma a mae disgwyl i'r 5 ola' fynd i'r mart wythnos nesa', fydd en amser trist ar ôl i'r fuwch ola' ein gadel ni. Mae'r ŵyn yn dod yn eu blaen yn araf bach, ac ar ôl eu pwyso yn ddiweddar fe ges i sioc ar yr ochr orau i weld pwysau da y rhai gorau, ond does dim y sglein arferol arnyn nhw 'leni, rwy'n ei roi e lawr i'r holl law i ni wedi ca'l!

Oddi ar i mi 'sgwennu ddiwethaf rwyf wedi bod yn y CCB lawr yn Torquay lle gaethwyd cael amser gwych. Mi roedd hi'n llwyddiannus iawn i aelodau Cymru gan cynnwys Aled Jones o CFfI Dyffryn Cothi yn ennill Aelod Hŷn y Flwyddyn CFfI Cymru a Lloegr, yn ogystal â chlwb Llanfair-ym-Muallt yn cipio gwobr y Pantomeim. Llongyfarchiadau i'r holl aelodau a fuodd yn llwyddiannus yn Torquay. Mae'r Ralis hefyd wedi dechrau, a chyn belled rwyd wedi ymweld â Ralis Sir Gâr a Morgannwg, gyda nifer o rai eraill ar y gorwel. Mae'r sioeau amaethyddol ar fin dechrau yn ein ardal ni hefyd, a braf fydd cael mynd i Sioe Sanclêr y penwythnos yma er mwyn derbyn fy ngwahoddiad cynta' i farnu defaid Texel.

I gloi mae'n ddrwg 'da fi weud bod ymarfer ar y beic wedi bod yn anobeithiol dros yr wythnosau diwethaf, rhwng y tywydd ar cyfarfodydd mae'r beic wedi bod yn y sied mwy na mas ar yr hewl, fydd gofyn tynnu bys mas os dw i am lwyddo ar y daith yma heb ladd fy hun!! Gobeithio erbyn i fi 'sgwennu nesa fyddai wedi llwyddo i ymarfer tipyn mwy, yn ogystal â cneifio a bwrw mlan â gwaith ar y tŷ!!

Hwyl am y tro

Beefy

Helo bawb! Gobeithio bod pawb yn cadw'n iawn!!

I fod yn onast fedrai'm coelio ei bod hi'n fis Mai! Allwch chi? Ma 'dolig yn teimlo fatha ddoe!! Ond 'ta waeth...fflio mae amser medda' nhw! Dim digon o oria mewn dydd...yn enwedig pam mae rali y Ffermwyr Ifanc ddydd Sadwrn!! Am unwaith, eleni da ni fel clwb yn teimlo ein bod ni ar y blaen...wedi cychwyn mewn da bryd...ond na! Mai di mynd yn funud ola' eto! Mai'n beintio, dawnsio, canu, crefft bob nos wythnos yma! Fy ffrind gora' i ar hyn o bryd ydi paent a PVA glue! Ond wir i chi, dyma un o 'highlight' y flwyddyn i mi yn bendant! Pawb yn dod at ei gilydd am ddiwrnod llawn hwyl! Bril!! Dim ond gobeithio neith y tywydd ddal i ni!! Neu mi fyddwni'n socian yn trio tynnu rhaff!! Felly os ydach chi yn yr ardal...dewch i ymuno gyda ni ar safle Sioe Môn, dydd sadwrn y 12fed o Fai, cychwyn am 9yb! Fedrai addo diwrnod pen i gamp i chi!!

Fel rhan o fy nghwrs, rwyf yn cael y cyfle i dreulio diwrnod yng nghwmni gweithwyr eraill o fewn y byd iechyd. Wythnos yma rwyf wedi treulio diwrnod gyda'r ymwelydd iechyd. Fel myfyriwr bydwreigaeth rwyf yn gweld pwysigrwydd perthynas bydwraig a'r ymwelydd iechyd gan ein bod yn cysylltu a chyfarthrebu gyda hwy yn aml pan rydym yn rhyddhau'r ferch ar ôl geni. Yna mae'r ymwelydd iechyd yn parhau'r berthynas gyda'r fam a'i phlentyn nes bydd y plentyn yn dechrau'r Ysgol Gynradd. Mae'n bwysig iawn ein bod yn cydweithio mewn tîm i alluogi gofal effeithiol i'r merched. Rwyf hefyd yn mynd i dreulio diwrnod gyda'r nyrs feddygfa er mwyn gweld a dysgu am eu rôl hwy yn y byd iechyd.

Dyna ni am y tro, diolch i chi am ddarllen!!

Cofion,

Siân Pierce Roberts