Ar hyn o bryd rydym wrthi yn paratoi at Rali'r Ffermwyr Ifanc, felly gan mai ond 10 aelod sydd ganddom yn ein clwb ni, mae hi'n andros o brysur gyda'r clwb yn cyfarfod ddwy neu dair gwaith yr wythnos. Mae'r Rali yn cael ei gynnal am 9yb eleni ar y 11eg o Fai, 2013 yn Safle Sioe Môn, Mona. Y thema leni ydi 'Y celtiaid' yn arwain y ffordd. Mae cryn dipyn o waith peintio ar hyn o bryd, mae ein Harwydd Hysbyseb a fydd yn hysbysebu'r Rali i fod i fyny erbyn dydd Iau. Mae bob clwb yn gwneud arwydd ac yn ei osod o gwmpas y sir, mae'n ffordd o dderbyn marciau at farciau clybiau'r Rali. Yn ogystal mae'r genod wrthi yn brysur hefo'r llyfr lloffion neu 'scrap book' y clwb a fydd yn olrain hanes y flwyddyn ddiweddaf...sydd yn adlonni niferoedd ar ddiwrnod y Rali - (ac oes, mae na ddigon o luniau doniol!) Os ydachi yn yr ardal, cofiwch ddod i gefnogi'r aelodau, fe allai sicrhau diwrnod pen-i-gamp i'r teulu oll!

O'R DIWEDD, mae'r traethawd hir wedi ei gwblhau ac wrthi'n cael ei farcio! Un traethawd yn llai ond mae'n rhaid symud mlaen i'r traethawd nesa rwan, arholiad a chyflwyniad. Felly mi fyddai o flaen y cyfrifiadur am sbelan eto. Er hynny, roedd hi'n braf ofnadwy mynd allan ar y fferm efo dad dros y penwythnos - mymryn o awyr iach yn gwneud gwahaniaeth. Tua diwedd yr wythnos rwyf yn mynd i galafantio i Gaeredin i gynhadledd Bydwreigiaeth. Mae'r gynhadledd yn cynnwys awdurion enwocaf y byd Bydwrieigiaeth felly rwyf yn edrach ymlaen i glywed mwy eu hanes a'u cynlluniau nesaf.

Dyna ni ar hyn o bryd, gewchi fwy o hanes y Rali tro nesaf! Diolch i chi am ddarllen!

Hwyl am y tro!

Siân Roberts

Nid yn unig mai'n sobor ar y defaid yn nghanol yr eira 'ma, ond mai'n sobor ar y ffermwyr, gyda nifer o golledion yn ogystal â safon y tir yn cael ei ddifetha. Nid yw'r tir mor ffrwythlon a ddylai fod adeg yma o'r flwyddyn, mae fy nhad rhwng dau feddwl a ddylai adael y gwartheg godro allan gan nad ydi'r borfa mor gryf ag arfer. Mae defaid fy nhad a fy mrawd canol wedi gorffen ŵyna erbyn hyn, ond newydd gychwyn ers tua wythnos mae fy mrawd hynaf felly mwy o nosweithiau prysur i ni am 'chydig eto!

Rwyf yn gobeithio fod pawb wedi cael Pasg bendigedig ac wedi bwyta digon o siocled!! Ar hyn o bryd rwyf yng nghanol gwneud fy nhraethawd hir, sydd yn golygu mai dyma un o'r traethodau diwetha' cyn gorffen yn y Brifysgol. Mae angen dipyn o wyau Pasg arnai er mwyn rhoi mymryn o hwb i'r geiria'. Ar ôl i mi gwblhau y traethawd, dim ond un traethawd, un arholiad ac un cyflwyniad fyddai ar ôl, yn ogystal â'r profiad gwaith tan fis Medi wrth gwrs. Ond mae'r amser yn prysur fynd, mae tri mis cyntaf o 2013 wedyn hedfan yn barod!

Rwyf wrth fy modd gyda'r adeg yma o'r flwyddyn wrth i'r dydd ymestyn wrth i ni droi'r clociau ymlaen wrth gwrs. 'Edrych ymlaen am yr haf' dyna sut y bydda i yn cofio pa ffordd i droi y clociau - ac yn wir i chi, dwi yn edrach ymlaen! Mae ganddom haf eitha cyffrous o'n blaen gan mai Sir Fôn yw sir nawdd y Sioe Frenhinol eleni. Yn ogystal, mae ganddom holl ddigwyddiadau'r Ffermwyr Ifanc, gyda'r Rali, y ras rafft, ac fel soniais yn gynharach, mi fyddai yn gorffen yn y Brifysgol ym mis Medi.

Reit mi fysai'n well i mi fynd yn ôl i sgwennu'r traethawd hir 'ma...gan fwynhau mymryn o siocled a phaned o de i roi fymryn o 'ysbrydoliaeth' i mi... (unrhyw esgus am siocled!)

Diolch i chi am ddarllen, hwyl am y tro,

Siân

Rydym wedi dechrau ar beth gwaith allan yn y caeau, ac yn ysu i'r tywydd wella i ni gael aredig ychydig, a mynd allan a pheth gwrtaith allan i'r caeau. Mae hefyd angen i ni wneud ychydig o waith ffensio yn ogystal â phlanu peth coed afalau er mwyn creu berllan newydd (fel rhan o gwaith Glastir). Felly digon i gadw ni'n brysur dros yr wythnosau/misoedd nesaf.

Braf yw cael adrodd bod Betsan fach yn dod mlaen yn grêt. Y teulu oll wrth eu bodd gyda hi, a hithau'n tyfu 'fflat owt'!! I fod yn deg mae hi'n cysgu yn reit dda ar y funed, ac yn gadael i mam a dad gael tamaid o gwsg nawr ac yn y man! Er, rwy'n siwr fydd na yn newid rywbryd, felly rydym yn gwenud y mwyaf o'r peth nawr. Er gweud hynny, mae'r grŵp nesaf o ddefaid ar fin dechrau ŵyna nawr, felly fydd rhaid codi yn nos i weld rheini!!

Felly dim amser i orffwys gormod ar hyn o bryd!

Pob hwyl am nawr,

Beefy

Ers i mi siarad hefo chi ddiwetha, mae genai newyddion cyffrous i chi. Ers i mi fentro i fewn i'r maes Bydwreigiaeth, rwyf wedi dod i ddysgu cryn dipyn am yr elusen SANDS (Stillbirth and neonatal death society). Mae'r elusen yma'n cynnig cefnogaeth i rieni, teulu neu ffrindiau sydd wedi cael eu heffeithio gan golli babi, yn ogystal â hyrwyddo ymchwil i ddarganfod rhagor o atebion a ffyrdd o ostwng y nifer o fywydau sy'n cael eu colli. Mae'r elusen yma yn agos iawn at fy nghalon ac felly roeddwn yn teimlo fy mod eisiau eu helpu, felly rwyf yn mynd ar daith ar draws y Sahara ym mis Mawrth 2014 i godi arian i'r elusen. Mi fyddwn yn cerdded ar draws y Sahara am gyfnod o 9 diwrnod ac yn gwersylla ar hyd y daith gan gychwyn yn Quarzazate, Morocco ac yn gorffen yn Mhamid cyn dychwelyd adre o Quarzazate ar ddiwedd y daith. Rwyf angen codi £2,250 o arian nawdd felly mi fyddai'n brysur iawn o hyn allan yn trefnu digwyddiadau codi arian. Rwy'n edrach ymlaen yn arw at y daith a chodi arian at elusen arbennig.

Mae'r Ffermwyr Ifanc yn brysur iawn hefyd. Mae'r gystadleuaeth ddrama newydd gael ei gynnal yma yn Sir Fôn gyda Chlwb Rhos-y-bol yn dod i'r brig ac ymlaen a nhw i Abertawe i gystadlu yng nghystadleuaeth Cymru gan ddod yn ail yno. Llongyfarchiadau mawr iddynt. Buan iawn daw'r Rali ym mis Mai unwaith eto gyda digonoedd o gystadleuthau at dâst pawb. Rwyf hefyd ar bwyllgor y panel codi arian ar gyfer y sioe Frenhinol eleni felly'n brysur yn trefnu digwyddiadau codi arian yr haf. Fe ddaw mwy o fanylion yn fy mlog nesa am y digwyddiadau hyn a gallwch chi fod yn rhan ohonynt.

Wel diolch i chi am ddarllen, mi fyddai yn ôl yn fuan,

Pob hwyl,

Siân Pierce Roberts

Fuon ni'n poeni dipyn am y tywydd tra'n aros am enedigaeth Betsan, eira trwm yn disgyn mewn nifer o lefydd, ond gethoni ddim llawer o gwbl i fod yn deg, oedd yn braidd yn siomedig ar un llaw, ond hefyd yn fendith ar y llaw arall. Rydym wedi cael hen ddigon o wynt a glaw (fuoni'n 'styried galw'r babi yn Morus neu Ifan petai'n fachgen!!) ac ar adegau o dywydd garw nawr rydym yn falch iawn ein bod ni wedi symud allan o'r garafan!

Mae amser ŵyna wedi cychwyn hefyd, ac ar ôl cyfnod diflas iawn cyn ŵyna a phryderon am iechyd y diadell, braf yw cael gweud bod gyda ni ŵyn cryf a iach o gwmpas nawr. Yn ôl ar ddechrau mis Ionawr oni yn poeni yn fawr os fyddwni'n medru dweud hynna. Gobeithio y gwneith y cyfnod ŵyna barhau'n ddiffwdan nawr. Er dweud hynny, tu fewn fydd y defaid a ŵyn am ychydig gan fod y tywydd mor wael ar caeau mor wlyb. Felly ry'ni'n gobeithio nawr am ychydig o dywydd gwell.

Does dim llawer mwy genai ddweud ar hyn o bryd, mae pethau yn brysur iawn ma rhwng gwaith, ŵyna ac edrych ar ôl Louise a Betsan!! Reit well i fi fynd, credu fod cewyn ishe newid rhywle 'ma!

Hwyl,

Beefy

P.S. Pob wwc i Gwenno Griffith (Cadeirydd CFfI Cymru) sydd yn dechrau ei her 12 copa yn Gwent y penwythnos yma er mwyn codi arian at elusen y British Heart Foundation

Blwyddyn Newydd Dda i chi gyd! Gobeithio eich bod chi gyd wedi cael 'dolig gwerth chweil gyda digon o siocled...a geriach...ac er bod pawb wedi laru erbyn diwedd yr Ŵyl...twrci!! Mae'r Nadolig yn adeg bendigedig yn dydi? Ond rhaid deud'i bod hi'n braf cal yn ôl i 'normal'!!  Dwi wedi cychwyn yn ôl  yn yr ysbyty ers tair wythnos bellach,  mae o yn fy nychryn i mai ond wyth mis sydd i fynd!!! Ia wyth mis o fod yn fyfyriwraig sydd ar ôl ...yna mi fyddai yn fydwraig! Rhywbeth dwi wedi bod yn breuddwydio amdano ers blynyddoedd...gobeithio bydd y freuddwyd felly yn cael ei gyflawni ymhen yr wyth mis nesa'! Dw i mor falch o ddweud fy mod i yn mynd mewn i faes rwy'n ei garu ac yn mwynhau pob eiliad o'r swydd hynod freintiedig yma!!

Cyn i mi fwrw 'mlaen, gai ddiolch i chi gyd am ddarllen yn 2012 - rwyf yn gobeithio bod hanesion y Ffermwyr Ifanc wedi eich diddanu yn ystod y dyddiau gwlyb. Er na chawsom Nadolig gwyn...cawsom ddigon o eira wythnos diwetha'!  Er ei fod yn brydferth iawn o ran gwedd a golwg, mae o yn gallu bod yn boen mawr i lot fawr o bobl. Cawsom 5 i 6 modfedd fan hyn, sydd yn andros o anghyffredin, ni sydd olaf i weld unrhyw eira fel arfer. Roedd ambell i ddyn/ddynes eira o gwmpas a phawb yn mwynhau.

Mai'n flwyddyn newydd i'r Ffermwyr Ifanc gyda digon o ddigwyddiadau ar y gweill. Dros y Penwythnos buom yn codi arian ar gyfer y Mudiad yng Nghae Sioe Môn, Mona, gyda noson arall o godi arian nos Wener yma yn y Gwobrau Twristiaeth. Heno mae Clwb Ffermwyr Ifanc Bodedern yn cynnal cystadleuaeth dartiau, pŵl a thenis bwrdd. Buan iawn ddaw y 'Penwythnos o Adloniant' sef cystadlaethau Aelod Iau a Aelod hŷn y flwddyn ar cystadleuaeth ddrama. Felly mae digon ar y gweill i'r Ffermwyr Ifanc ar hyn o bryd.

Wel rydym wedi cychwyn ŵyna yma, gyda dipyn o ŵyn o gwmpas. Mae'n adeg oer iawn iddynt - yn enwedig pan mae'r eira yn ystod y dyddiau diwetha' - felly mae'r rhan fwyaf o'r ŵyn i mewn ganddom am ychydig o ddyddia'!  Ar y llaw arall, dim ond newydd sganio eu defaid mae nifer o ffermwyr a ddim yn cychwyn dod ag ŵyn tan oddeutu diwedd mis Mawrth neu gychwyn  Ebrill. O ran y farchnad - nid oes llawer wedi newid gyda phrisiau ŵyn tew dal i fod yn reit isel a phrisiau gwarthaig biff wedi gostwng ychydig yr wythnos yma.

Unwaith eto, gai ddiolch i chi am ddarllen a gobeithio eich bod chi wedi mwynhau!

Cymerwch ofal yn y tywydd 'ma!

Siân Pierce Roberts

Gobeithio eich bod chi wedi mwynhau dros y 'Dolig a bod y flwyddyn newydd wedi dechrau ar nodyn da. Fe wnaethom fwynhau mas draw yn ein cartref newydd (er rydym dal i ddad-bacio a throsglwyddo pethau o'r garafan!!). Yr un ystafell sydd wedi bod yn barod ers tro yw ystafell y babi, ond ry'ni dal i aros i Beefy bach i ddangos i wyneb!!!!

Wrth sgwennu hwn mae'n debyg fod y rhan fwya' o Gymru yn paratoi i dderbyn rhywfaint o eira heno, dyw'r rhagolygon am orllewin Cymru ddim yn edrych yn rhy ffôl, felly gobeithio fydd dim gormod o problemau ar y ffyrdd yn ein hardal ni (yn enwedig os fydd angen taith brys i'r ysbyty!!) Gewn ni weld beth a ddaw yn y dyddiau nesaf.

Mae'r defaid sy'n disgwyl ŵyn eleni mewn ers rhyw 10 diwrnod, ac mae nhw'n setlo mewn yn dda. Rwy'n llawer hapusach nawr eu bod nhw yn y sied, rwy'n gallu cadw llygad barcud arnyn nhw nawr. Rydym wedi cael tipyn o drafferth gyda'r defaid dros y misoedd diwethaf, ond gobeitho bod hynny tu ôl i ni nawr. Rwy'n edrych ymlaen nawr at dymor yr ŵyna, ond nid yw'r ŵyn cyntaf i fod i gyraedd tan ddiwrnod San Ffolant, ac rwy'n siwr fydd nifer o bethau eraill wedi digwydd cyn hynny!!

Reit well i fi fynd i weld bod Louise yn iawn, tro nesa' fyddai'n siarad gyda chi rwy'n siwr bydd newyddion am y baban.

Pob Hwyl,

Beefy

P.S. Fe wnaeth Mali'r ci defaid gael cŵn bach dros dymor y Nadolig, cŵn bach hyfryd!!!

Mae'r economi aflonydd sydd ohoni yn Ewrop yn sicr wedi effeithio ar y prisiau mae ffermwyr y wlad yn derbyn am ei chynnyrch y gaeaf yma. Y farchnad ddefaid sydd wedi ei effeithio'r gwaethaf yn fy marn i, sylwer fod prisiau ŵyn wedi disgyn rhyw 20-25%. Ar ôl tymor pori anodd gyda'r haf gwlypaf mewn dros ganrif, gorfodwyd sawl ffermwr i fwydo silwair a dwysfwyd ychwanegol. Gall hyn ddim ond golygu costau cynhyrchu uwch a chyllideb dynnach. Dwi'n synhwyro bydd cyllideb sawl ffermwr yn cael ei herio yn ystod y flwyddyn sydd i ddod o ganlyniad, a fydd yn sialens i'r mwyafrif. Dwi wedi sylwi newid yn hyder y prynwyr rownd y martiau yn barod, sydd dim ond yn dangos pa mor ansicr yw'r diwydiant amaethyddol.

Mae'r gwartheg wedi bod tu fywn nawr ers canol mis Hydref ac erbyn hyn yn bwydo'n jicôs ar y silwair a gynaeafwyd yn ystod heulwen prin y Gorffennaf. Ma' nhw'n ymddangos i fod yn ddigon hapus i eistedd yn y gwellt cynnes wrth iddynt wrando ar y glaw yn pitran patran ar dô'r sied uwchben. Mewn newyddion arall, dwi jyst wedi dychwelyd o wyliau ar ynys Phuket a leolir yn Ne Orllewin Thailand. Fy mhrofiad tramor cyntaf i mewn sawl blwyddyn a ma' rhaid cyfaddef odd e'n bythefnos anghofiadwy! Cewch glywed mwy am y 'travels' ma yn fy mlog nesa i yn y flwyddyn newydd. Fodd bynnag am y tro, dwi'n mawr obeithio eich bod wedi mwynhau'r Nadolig a dymunaf y gorau i chwi ar gyfer eich dathliadau blwyddyn newydd!

Pob hwyl,

Carwyn Bwlchclaw'.

Dani wedi cael mymryn o rew hyd yn hyn  ond diolch byth dim gormod. Er bod eira yn achosi helynt i nifer ohonom ni, mi fysa 'Nadolig Gwyn' yn neis! Er, fysa fo ddim yn effeithio gormod atrna I, yn tŷ fyddai yn stwffio siocled fydda i drwy'r dydd siwr o fod!

Ar ddiwedd mis Tachwedd roedd Sioe Nadolig ein mart lleol ni sef Mart Gaerwen. Un cystadleuaeth oedd i ddyfalu pwysau bustach! Mi gesi gyntaf o dan 21oed gyda fy nghyd-aelod Gareth Roberts yn dod I'r big o dan 26oed, felly roedd hi'n ddathliad a hanner i'r clwb. Rydym yn edrach mlaen yn arw at y cystadleuaethau a ddaw yn 2013!!

Dim ond dau shift i fynd yny Brifysgol a mi fyddai ar fy ngwyliau Nadolig. Rwy'n edrach 'mlaen i gael gwario'r Nadolig gyda fy nheulu er mai gwenud aseiniad ac ymchwil fyddai! Ta waeth.

Nadolig Llawen Iawn i chi gyd a gobeithio bydd Sion Corn yn hael!

Diolch i chi am ddarllen…am y tro,

Siân Pierce Roberts

Mae'r tywydd wedi bod yn ddiflas iawn dros yw wythnosau diwethaf, ac ar wahan i ambell ddiwrnod oer iawn, dros yr wythnos ddiwethaf mae'n teimlo fel ei bod hi wedi bwrw glaw bron bob dydd. Nid yw hyn yn dywydd delfrydol i weithio yno, ond mae rhaid cadw fyny gyda gwaith y fferm. Fe gethom ychydig o newyddion drwg yn ddiweddar tra'n sganio'r defaid er mwyn gweld faint o ŵyn i ddisgwyl blwyddyn nesa. Llynedd fe wnaethom lwyddo i cael canlyniad sganio o 190% (1.9 oen I bob dafad), ond eleni rydym lawr i 97%. Rydym yn trafod gyda'r milfeddyg i geisio gweithio allan pam mae'r canran wedi cwympo cymaint, ond dim ateb mor belled. Llyngyr yr Iau a feirws Schmallenberg yw'r ddau haint sy'n fwya tebygol i effeithio'r stoc ar y funed, ond aroswn i dderbyn canlyniadau'r profion  er mwyn cael gwybod mwy.

Wel dw i ddim am gadw chi'n hir tro yma felly unwaith eto dw i'n dymuno Nadolig Llawen a Blwyddyn Newydd Dda i chi gyd, ac efallai erbyn i chi glywed genai tro nesa fydd yna gyhoeddiad arbennig I'w wneud.

Hwyl yr Ŵyl

Beefy

Fel y gwyddoch o ddarllen fy mlog diwetha', roedd aelodau clybiau'r Ffermwyr Ifanc ar drothwy'r Eisteddfodau sirol. Cawsom gryn lwyddiant yn ein Eisteddfod ni gydag amryw o'r eitemau clwb yn dod i'r brig. Cefais ddau gyntaf, dau ail a dau drydydd! Llongyfarchiadau mawr i bawb a gymerodd ran yn Eisteddfod Cymru a oedd yn hynod o lwyddiannus. Llongyfarchiadau hefyd i Beefy am ei flwyddyn fel Cadeirydd C.FF.I Cymru gan gynnwys yr holl filltiroedd o feicio er mwyn codi arian tuag at elusen Ambiwlans Awyr Cymru. Pob lwc i Gwenno Griffith sydd wedi cael ei hethol fel Cadeirydd eleni. Cynhaliwyd parti 'Hollywood' i ddathlu'r holl waith mae ein llywydd sirol ni wedi ei wneud dros y flwyddyn diwethaf - dyma chi hwyl....o'r carped coch i Superman a Batman, roedd pawb weid gwneud ymdrech i wisgo fyny a diolch yn fawr iawn i Sion Tai hen am ei holl waith i'r mudiad dros y flwyddyn diwethaf. Pob lwc i Jac Jones, Sarn, Llanfechell sydd wedi ei ethol fel ein llywydd blwyddyn nesaf. 

Roedd ein Ffair Aeaf ni yn cael ei chynnal ar y 10fed o Dachwedd ar Safle Sioe Môn yng Ngwalchmai. Cawsom Sioe lwyddiannus iawn gyda'r stoc gwerth eu gweld yn cystadlu. Roedd amryw o'r ffermwyr yn ein Ffair Aeaf ni yn anelu at gystadlu yn y Ffair Aeaf yn Llanelwedd syddl wedi ei chynnal ddoe ac eto heddiw wrth gwrs. Eleni, penderfyniad C.FF.I oedd i gynnal cystadleuthau barnu ŵyn tew a beef tu allan i'r ffair ar ffermydd o amgylch Sir Fôn, gan fod llawer o'n haelodau yn brysur yn cystadlu ar fore Sadwrn ein Ffair Aeaf. Felly cynhaliwyd y beef yn gynharach, diwedd mis Medi a chynhaliwyd y barnu ŵyn tew ar gychwyn mis Tachwedd. Cefais y fraint o ddod yn gyntaf yn y barnu ŵyn tew o dan 21 oed a chyntaf yn barnu'r carcass o dan 21 oed ond yn anffodus, dwi 'di methu mynd i Lanelwedd i gystadlu gan fy mod ar leoliad gwaith. Felly pob lwc i bawb o Fôn a fu'n cystadlu yn Llanelwedd ddoe ac eto heddiw.

Mae petha'n mynd yn dda iawn yn y Brifysgol ar hyn o bryd, dim ond 10 mis i fynd tan fyddai yn Fydwraig!!! Dwi dal i fwynhau...dwi'n mwynhau mynd ar leoliad bob dydd. Gobeithio dy fod di Beefy a Louise wedi mwynhau'r baby show a rwy'n dymuno pob lwc i'r ddau ohona chi.

Am y tro, cymerwch digon o ofal ar y lonydd 'na, pob hwyl,

Siân Pierce Roberts

Nawr bod fy nyletswyddau CFfI wedi gorffen mae digon o waith arall yn galw, ac un o'r pethau mwyaf yw canolbwntio ar orffen y tŷ, yn enwedig gyda bod yr un bach ar y ffordd ym mis Ionawr! Rhaid gweud dyw byw mewn carafan gyda menyw feichiog a hithau yn feichiog ers 6 mis ddim yn rywbeth y byddwn yn ei argymell, ond os na eith dim o'i le dylwn ni fod yn y tŷ cyn diwedd mis Tachwedd (gobeithio!!!)

Ar y fferm mae wedi bod yn gymharol dawel. Mae'r hyrddod allan gyda'r defaid yn gweithio'n galed, a does dim llawer i'w wneud allan ar y tir, a diolch byth am hynny. Mae'r caeau gyda'r gwlypaf rwyf i erioed wedi eu gweld, ac rwyf yn barod yn falch nad oes gennym ni wartheg eleni yn poetsio'r ddaear. Er yr holl dywydd gwael, mae cymydog i ni wedi mentro i wneud ychydig rhagor o silwair wythnos diwetha'. 'Wn i ddim os yw hyn'n beth call neu beidio ond amser a ddengys beth fydd ansawdd y silwair yma. Mae'r glaw rydym wedi cael yn ddiweddar wedi bod yn anhygoel, ac rwyf yn cyfri ein hunain yn lwcus iawn bod dim gormod o stoc gyda ni eleni, a fod 99% o waith tu allan y tŷ wedi ei orffen. Teimlaf trueni mawr dros y ffermwyr sydd wedi gorfod dod a'u stoc mewn yn gynnar, neu brynu rhagor o silwair neu mewn rhai achlysuron y ddau. Mae costau cynhyrchu wedi codi yn sylweddol dros y blynyddoedd diwethaf, a dyw'r tywydd yma ddim yn helpu dim. Gyda'r gaeaf yn dod does dim llawer o bwrpas mewn gofyn i'r tywydd i wella, dim ond na wneith hi ddim gwaethygu. Er gweud hynny dw i newydd weld adroddiadau ei fod hi'n bwrw eira yn yr Alban bore ma!

Reit well i fi fynd, ry'ni'n mynd i Lundain prynhawn ma, penwythnos bach i ffwrdd, mwy na thebyg y cyfle olaf cyn i'r babi bach ddod. Er y babi yw un o rhesymau dros y daith hyn, ry'ni'n mynd i Earls Court ar gyfer y "Baby Show", fydd e dipyn yn wahanol i'r Sioe Frenhinol dw i'n siwr!!! Well i fi beidio anghofio ein bod ni'n dathlu penblwydd ein priodas hefyd...felly Penblwydd Priodas Hapus Louisexxxx

Pob Hwyl

Beefy

Mae tymor yr hydref wedi cyrraedd eto a golau dydd yn lleihau, does dim digon o oriau mewn diwrnod. Wrth gwrs - dwi'n sôn am Eisteddfod y Ffermwyr Ifanc. Mae ein Eisteddfod ni yn cael ei chynnal eleni ddydd Sadwrn yma, y 27ain o Hydref yn Ysgol Uwchradd David Hughes.

Wyth eitem sydd ar fy rhestr i eleni; pedair unawd, sgets, y meim, parti adrodd ar ddeuawd doniol. Ar hyn o bryd dw i fel robot yn dysgu fy ngeiriau bob eiliad sy'n sbâr, dw i'n siwr fod pawb yn tŷ ni'n giwsgo ear plugs erbyn hyn! Ond er yr holl ymarfer, mae hwyl i'w gael ym mhob 'steddfod ac wrth gwrs rydym yn gobeithio cael llwyddiant - mi fydd newyddion y 'steddfod yn fy mlog nesaf.

Mae tymor yr hydref wedi ein cyrraedd mwya' sydyn eleni gydag amryw o ffermwyr yn cwyno fod y tir yn wlyb oherwydd haf siomedig. Mae'r anifeiliaid wedi dod i mewn i'r ierdydd yn gynt na'r arfer gan gynyddu côst bwydo'r ffermwyr. Yr wythnos diwetha', roedd ein milfeddyg lleol yn dweud bod eisiau i ffermwyr defaid fod yn ofalus iawn eleni gan fod rhagolygon ffliwc yn gryf iawn o ganlyniad i dymor gwlyb iawn. Mae prisiau anifeiliaid yn dda iawn ar hyn o bryd gyda gwartheg stôr yn gwerthu'n dda iawn yn ein mart leol heddiw. Er hyn, mae prisiau'r ŵyn ychydig yn isel. Mae ein hufenfa leol wedi cynyddu prisiau llefrith o 1.5 ceiniog y litr ers cychwyn mis Hydref, sydd yn help mawr i ffermwyr llaeth gan fod y gôst o gynhyrchu yn dueddol o godi.

Diolch yn fawr iawn i chi am ddarllen,

Hwyl am y tro,

Siân Pierce Roberts

Fel y gwyddoch mae Sir Fôn wrthi'n brysur iawn ar hyn o bryd yn codi arian ar gyfer Sioe Frenhinol 2013 gan mai ni yw'r sir nawdd. Mae'r paratoadau yn mynd fel wats. Yng nghanol mis Medi cawsom benwythnos o gampio ym Mharc Carafanio Penrhyn, Llanfwrog. Dw i'n siwr eich bod i gyd yn meddwl - be oedd ar ein pennau ni yn gwersylla yng nghanol mis Medi gwlyb iawn?! Ond os oedd hi'n bosib i ni gael un diwrnod heb ddiferyn o law...mi ddaeth y dydd hwnnw ar y dydd Sadwrn! Roedd hi'n benwythnos bendigedig gyda digon o adloniant yn ystod y dydd i'r plant a digon o ganu a hwyl i'r rhai hŷn gyda'r nos. Roedd teulu Penrhyn yn du hwnt o groesawgar ac hoffwn ddiolch yn arw iddynt am y pygau a phenwythnos mor fendigedig!

Mae ganddom sioe ffashiwn yn Nhreysgawen ar y 10fed o'r mis yma, byddwn yn modelu dillad o siop 'Elsa' ym Mhorthaethwy. Yn ffodus mae'r ticedi i gyd wedi mynd, newyddion anffodus i rai! Diolch i bawb am eich cefnogaeth! Mi fydd genai ddiweddariad o'r digwyddiadau codi arian i chi yn fy mlog nesaf.

Mae tymor y Ffermwyr Ifanc newydd ail-gychwyn, gan groesawu aelodau newydd i bob clwb yn y Sir. Llongyfarchiadau mawr i Beefy am ei holl waith caled yn teithio ar ei feic o amgylch Cymru ar gyfer achos mor dda! Y digwyddiad nesaf sydd ar y gweill yw'r Eisteddfod wrth gwrs! Mae ein Eisteddfod Sirol ni'n cael ei chynnal yn Ysgol David Hughes ar y 27ain o Hydref gan gychwyn am 5y.h. Dewch yn llu i gefnogi!! Cewch hanes yr Eisteddfod yn fy mlog nesaf!

Felly tan y tro nesaf,

Hwyl,

Siân Pierce Roberts

 Ar ôl i minnau a'm mrawd ddysgu i gneifio yn gynnar yn y flwyddyn, penderfynodd y ddau ohonom haf eleni i gneifio'r oddeutu 250 o ddefaid sydd gennym adref. Wel bobl bach, na 'fistake'!! Rhwng ffeindio'r tywydd iawn i gneifio yn ogystal â ffeindio amser cyfleus ble odd y ddau ohonom ar gal, wedd e'n dipyn o job! Ond llawenydd mawr o newyddion da, ar ôl digonedd o boen cefn fe ddaethon ni i ben a'r cneifio erbyn diwedd mis Awst, odd y pleser o gneifio'r ddafad wlanog ddiwethaf 'na yn amhrisiadwy! Mae'n waith caled ond yn sicr yn grefft sy'n werth chweil i ddysgu fel dau o ffermwyr defaid y dyfodol. Bydd y gwlân nawr yn cael ei werthu i'r Bwrdd Gwlân Prydeinig, ble efallai geith ei brosesu yma ym Mhrydain neu ei allforio dramor i farchnadoedd megis Tsiena.

 Ges i dri diwrnod bishi o dorri silwair eleni, a chafodd y cynhaeafu ei gwblhau cyn baglu bant i'r Sioe Frenhinol! Dw i wrth fy modd ar y silwair, mae'n adeg cyffroes o'r flwyddyn a does 'na ddim byd dwi'n joio mwy na gweld y cynhaeaf yn dod mewn! Torrwyd rhyw 80 erw o silwair eleni; 50 i'w roi yn y clamp a chafwyd ryw 40 erw ei felio a'i lapio. Y porthiant yma y byddwn yn ei ddibynnu arno yn ystod misoedd oer y gaeaf i borthi'r gwartheg, felly dwi'n gobeithio ei fydd e o safon uchel! Ac mae'n edrych yn debygol fydd y gwartheg i gyd mewn cyn hir gyda'r amodau tywydd presennol, mae'r perci i gyd yn wlyb stecs!! Ar hyn o bryd, rydym yn bwydo belen o wair y dydd i'r gwartheg er mwyn cynnig ychydig o help iddynt gan fod y porfa mor wlyb. Mae lefelau siwgr y porfa wedi disgyn yn sylweddol o ganlyniad i'r diffyg heulwen eleni, sy'n golygu fod y gwartheg yn amsugno llai o ddaioni ac felly mae gofyn cynnig hwb maethlon iddynt yn eu deiet trwy'r ffurf o naill ai gwair, silwair neu fwcedi maeth (minerals).

 Cafodd yr ŵyn eu didoli o'r defaid ar ddechrau mis Awst, ac erbyn hyn yn pori'n braf ar adlau. Adlau yw'r porfa cychwynnol sy'n tyfu ar ôl torri'r silwair, mae'n borfa llawn daioni ac yn adnodd gwerthfawr i bob ffermwr defaid sy'n dymuno magu ŵyn tew o safon uchel. Cyn hir fe ddaw'n amser i bwyso'r ŵyn i weld sut maent yn dod yn eu blaenau. Mae'r calendr amaethyddol yn hedfan heibio!!

Ond tan y tro nesaf pan wnai sôn am dymor yr hwrdda, diolch am ddarllen!

Carwyn Bwlchclaw'.

Rwyf hefyd wedi dechrau ar fy nhaith feico gyda'r CFFI. Beicio o amgylch Cymru i godi arian i Ambiwlans Awyr Cymru (elusen y flwyddyn CFfI Cymru) yw'r sialens a mae hi wedi bod yn dipyn o her cyn belled wrth i mi ceisio ymweld â'r siroedd i gyd, ond mae wedi bod yn siwrne gymharol hwylus. Hyd yn hyn ry'ni wedi teithio 470 milltir gan wibio drwy Frynbuga, Aberhonddu, Llanfair-ym-Muallt, Llandrindod, Llanidloes, Y Drenewydd, Trallwng, Bwlch yr Oernant, Rhuthun, Bae Cinmel, Bangor, Gwalchmai, Dinas Dinlle, Bryncir, Dolgellau, Machynlleth, Aberystwyth, Llambed, Castell Newydd Emlyn, Eglwyswrw, Clarbeston Road, San Cler a Chaerfyrddin. Ry'ni'n nesáu at y diwedd nawr gyda dim ond teithiau cymharol fyr i faes awyr Abertawe, Pencoed a Chaerdydd ar ôl. Mi fydd hi'n braf iawn cyrraedd Stadiwm y Mileniwm wrth gwblhau'r daith. Mae'r tywydd wedi bod yn ddigon cymysglyd ar hyd y daith; ambell i ddiwrnod sych a braf, sych ond gwyntog, a rhai diwrnodau yn wlyb a gwyntog, mae'n rhaid dweud bod y diwrnodau gwlyb a gwyntog wedi bod yn dipyn o sialens, ond mae'r croeso yr ydym wedi dderbyn wrth gyrraedd pob sir wedi bod yn wych. Rhaid dweud ein bod wedi cael llawer o hwyl! Os ydych am fy noddi mi fyddwn yn ddiolchgar iawn, dilynwch y ddolen; http://uk.virginmoneygiving.com/fundraiser-web/fundraiser/showFundraiserProfilePage.action?userUrl=WalesYFC

Wedi cyrraedd Caerdydd, mi fydd hi'n amser am Gyfarfod Blynyddol y Mudiad, ac fy amser i fel cadeirydd y CFfI yng Nghymru yn dod i ben! Cewch glywed hanes y penwythnos hynny (yn ogystal â chyfanswm yr arian a godwyd) tro nesa'!

Gartref mae pethau di bod yn brysur hefyd! Mae'r tŷ'n dod yn ei flaen yn gyflym iawn nawr gyda'r drysau a'r ffenestri newydd yn eu lle ac mae'r peintio wedi dechrau! Gobeithio y byddwn yn barod i symud mewn tua mis Tachwedd, digon o amser cyn i'r babi gyrraedd ym mis Ionawr. Rydym wedi llwyddo i neud tipyn o silwair da eleni, ond mae'r caeau yn gwlyb ofnadwy, rhywbeth sy'n peri tipyn o ofid i ni gan bod y ffarm yn un eithaf gwlyb yn y gaeaf ta'beth, gobeithio neith hi sychu ychydig wrth i ni barhau trwy'r Hydref.

Rydym hefyd wedi bod yn ymweld gydag ambell arwerthiant defaid Texel a pharatoi'r diadell ar gyfer yr Hydref. Mae'n braf gweud ein bod wedi derbyn yn fwy na be ry'ni wedi wario yn yr arwerthiannau eleni, ond mae amser cyffrous a phryderus o'm blaenau wrth i'r amser hwrdda agosáu. Am y tro cynta' eleni mi fyddwn yn gwneud gwaith ET (Embryo transfer) er mwyn helpu i wella'r diadell, amser a ddengys i weld pa mor llwyddiannus fydd hwnnw! Rydym yn croesi ein bysedd dros y defaid a'r tywydd!

Reit well i fi fynd 'to, pethau i'w gwneud cyn neidio yn ôl ar y beic y penwythnos yma, dw i'n addo nai ddim ei gadael hi mor hir cyn siarad gyda chi eto!!

Pob Hwyl

Beefy

Ond dim na'r unig newid sydd wedi digwydd yn y wythnosau diwethaf. Ar ôl dwy flynedd o weithio yn y Ganolfan Datblygu Llaeth rwyf wedi dweud ffarwel wrth Gelli Aur er mwyn cael dechrau ar yrfa newydd. Rwy'n ymuno gyda'r NFU fel Ysgrifenydd Grwp yn y swyddfa yn San Cler, ac yn edrych ymlaen yn fawr i ddatblygu'r busnes yno a chreu gyrfa lewyrchus i fi fy hun ac i'r cwmni. Roedd yn amser trist wrth adael Gelli Aur, ond dw i'n credu mai dyma'r amser iawn ac rwy'n barod am newid. Hoffwn ddiolch i'm holl gydweithwyr yng Ngelli Aur am eu cefnogaeth a chyfeillgarwch.

O ran y fferm mae wedi bod yn dawel iawn yn ddiweddar, ar rheswm syml iawn am hynny yw ein bod hi'n rhy wlyb i wneud dim o werth! Rydym wedi osgoi unrhyw lifogydd, ond mae'r caeau yn ofnadwy o wlyb, 'na'r oll allwn ni wneud nawr yw gwylio'r borfa'n mynd yn hen tra'n aros am gyfle i wneud gwair neu silwair. Mae'n 'itha torgalonnus i ddweud y gwir, ond o leia' ma digon o bethau eraill gyda ni i'n cadw ni'n fishi!

Mae'n rhaid i mi gydymdeimlo gyda'r holl ffermwyr llaeth sy'n dioddef ar hyn o bryd, yn gweithio'n galed i gynhyrchu cynnyrch o safon ond ar hyn o bryd yn derbyn swm sydd tipyn yn llai na'r gost o gynhyrchu. Os na fydd rhywbeth yn cael ei wneud i helpu'r ffermwyr yma cyn hir, mi fydd llawer yn gorfod rhoi'r gorau i'w bywoliaeth, dw i ddim yn siwr os all economi Cymru (na'r Deyrnas Unedig) ddelio gyda'r golled honno. Mae'n amser caled a gofidus iawn yn y byd amaethyddol ar y funud.

Wedi dweud hynny, mae un o uchafbwyntiau calendr Amaethyddol Cymru ar y gorwel. Mae'r Sioe Frenhinol bron yma, ac mae paratoadau'r Ffermwyr Ifanc yn bwrw 'mlaen ar garlam. Galwch mewn i weld yr holl fwrlwm ar faes y Sioe, neu dewch lawr i'r Pentre Ieuenctid am wacen gyda'r nos, ma' digon da'r CFfI i ddangos i chi.

Hwyl am y tro,

Beefy

Dw i wedi bod yn brysur gyda'r Ffermwyr Ifanc yn y Sioe eleni. Dechreuodd y Sioe yn adeilad y Ffermwyr Ifanc gyda'r gystadleuaeth Llysgennad neu Lysgynhades y sioe ar gyfer y flwyddyn 2012/2013. Cefais i'r fraint o ennill y gystadleuaeth hon yn 2010 a wir i chi - roedd yn gyfle gwych i gyfarfod pobl newydd ac i weld sut mae sioeau eraill yn cyd-weithio. Siom oedd gweld mai ond dau ymgeisydd oedd ar gyfer y swydd eleni â'r cyfle mor arbennig! Ond wedi dweud hyn...fel mae'r Sais yn dweud 'Quality not quantity' gyda'r ddau ohonynt yn rhoi cyfweliad arbennig. Felly Llysgynhades Sioe Amaethyddol Môn eleni yw Bethan Mair Williams o Langwyllog, Sir Fôn gyda Gareth Pritchard Jones o Lanfechell, Sir Fôn yn ddirprwy - Lysgennad iddi. Mae'r ddau ohonynt yn aelodau brwdfrydig o'r Ffermwyr Ifanc a dwi'n siwr y caiff y ddau flwyddyn arbennig. Llongyfarchiadau i'r ddau ohonynt. Roedd aelodau'r Ffermwyr Ifanc yn gwneud paneidiau o dê ac yn cynnal gemau yn yr adeilad gydol y ddau ddiwrnod i godi ymwybyddiaeth y cyhoedd o waith y Ffermwyr Ifanc.

Dim ond wythnos sydd genai ar ôl o fy ngwyliau, felly rwyf wrthi'n brysur yn sortio manion ar gyfer fy nhrydedd flwyddyn. Felly tra bod genai amser sbâr...rwy'n mynd allan i odro efo dad!!

Hwyl i chi!! Tan y tro nesaf...

Siân Pierce Roberts

Dw i ddim yn meddwl bod y tywydd o'n hochr ni'r dyddiau yma! Ma'i yn anodd iawn i ddod o hyd i amser i wneud y silwair heb sôn am wair! Dim ond gobeithio y daw'r haul dros y bryn cyn bo' hir! Er hyn, pythefnos yn ôl cefais wythnos fendigedig yn y Sioe Frenhinol! Does dim rhaid i chi fynd i ffwrdd i gael tymheredd o bron i 30°C w'chi!! Roedd hi'n wythnos arbennig yn llawn hŵyl, chwerthin a chystadlu! Oni yna o'r dydd Sadwrn cyntaf tan y dydd Iau a mi fyswni wedi gallu aros yno am gryn dipyn yn hirach er mai campio mewn pabell oni! Roedd y Ffermwyr Ifanc yn brysur yn cystadlu gydol y sioe gyda chryn dipyn o eitemau o Sir Fôn yn llwyddiannus. Llongyfarchiadau mawr i Bedwyr Williams o glwb Llangefni am ddod yn gyntaf yn y barnu moch Cymreig o dan ddeunaw oed ac hefyd am ddod i'r brig gyda'r araith orau drwy gyfrwng y Gymraeg. Roedd Cain Owen o glwb Llangefni yn fuddugol yn y barnu defaid a'r barnu Holstein o dan un ar bymtheg oed. Daeth Sioned Williams o glwb Bodedern yn ail yn y barnu Holstein! Llongyfarchiadau mawr i chi gyd!!

Y prif ddigwyddiad nesaf sydd ar gorwel yw Sioe Amaethyddol Môn 2012 ar safle Sioe Môn ym Mona, Gwalchmai a hynny ddydd Mawrth a Mercher nesaf, 14eg ar 15fed o Awst. Mae dad wedi bod yn brif stiward yn yr adran foch ers sawl blwyddyn bellach gyda mam wrth law yn is-stiward yr adran. Bob blwyddyn, rydym ni fel teulu yn dangos moch yn y sioe ac yn mwynhau croesawu ffermwyr eraill ar hyd a lled Prydain i gymryd rhan! Felly os ydych chi awydd diwrnod arbennig...dewch draw i'r sioe.

Rwyf  newydd orffen fy ail flwyddyn yn y coleg a rwan yn mwynhau tair wythnos i ffwrdd cyn cychwyn yn ôl ddiwedd Awst fel myfyriwr y drydedd flwyddyn! Mae blwyddyn wedi mynd mor gyflym...mae'n anodd credu!

Wel dyna'r oll genai am heddiw!

Diolch i chi am ddarllen!

Hŵyl am y tro!

Siân Pierce Roberts

Erbyn nawr mae tymor Rali C.Ff.I sirol wedi dod i ben gan orffen gyda Rali yng Nghlwyd a Gwent dros y penwythnos. Yn ôl  yr adroddiadau ar hyd a lled siroedd Cymru mae'n debyg bod cyfnod y Rali wedi bod yn llwyddiannus iawn ar y cyfan,. Mae pawb yn awr yn troi eu golygon tuag at y Sioe Frenhinol.

Dw i'n edrych ymlaen i gael ychydig o amser i ffwrdd er mwyn mynd ar daith!! Taith astudio am bedwar diwrnod yn yr Alban gyda'r C.FF.I, mai'n debyg mai dyma'r unig gyfle am wyliau eleni! Ar y daith mi fyddwni'n ymweld âg ambell i fferm wych ac hefyd yn ymweld â Sioe Fenhinol yr Alban, rwyf wedi dyheu am ymweld ar sioe yma ers peth amser nawr, felly rwy'n edrych ymlaen yn arw.

Mae'r tŷ wedi cymryd camau mawr ymlaen dros yr wythnos diwethaf, gyda "plaster boards" yn dechrau cael eu gosod. Mae'n gwneud tipyn o wahaniaeth i strwythur mewnol y tŷ.




Tan y tro nesa'...

Beefy

1)      wyliau hanner tymor y plant


2)      yn wythnos Eisteddfod yr Urdd

Soniais yn fy mlog diwetha' fy mod yn cystadlu yn yr Eisteddfod ddydd Sadwrn, ac yn wir i chi, y gair gora' i ddisgrifio'r sefyllfa oedd 'stomp!'. Diolch i'r nefoedd bod Wellingtons, côt law ac ymbarel yn bodoli! Mi gychwynom am 8 y bore rhag ofn i ni gael problemau trafnidiaeth ac roeddem yn yr Eisteddfod yn brydlon am 9 y bore i gael ymarfer ensembl cyn y rhagbrawf. Wel mi aeth y dydd fel y gwynt, cyn i mi droi rownd roedd hi'n dri! Buom yn ffodus i gael llwyfan gyda'r ensembl a dod yn drydydd ar y llwyfan. Buom hefyd yn ddigon ffodus i gael llwyfan gyda'r parti merched a'r ddau gôr SATB o dan 40 mewn nifer a dros 40 mewn nifer. Mae'r Eisteddfod yn brofiad gwych i fagu hyder, profiad ac i greu her i unigolion, grwpiau a chorau. Erbyn 4 y pnawn, ar ôl stryffaglu drwy'r mwd a'r glaw mi frafiodd hi ar y maes ac ers hynny mae'r tywydd wedi bod yn eithaf boddhaol yma.

Buan ddaw y Sioe Frenhinol, a'r wythnos ddiwetha' fe gychwynodd y cystadlaethau barnu stoc. Barnu Texels ym Mryngarth, Llanerchymedd oni, ac fe gesi gyntaf o dan 21oed, felly rwyf yn cael mynd i farnu yn y Sioe Frenhinol eleni. Fel arall, am unwaith rydym yn eithaf distaw yn y Sir o ran cystadlu, brêc bach ar ôl y Rali mae'n rhaid!

Wel mae Gwyn a Gethin, fy mrodyr wrth eu boddau wythnos yma gan fod prisiau ŵyn tew wedi codi. Felly drwy'r penwythnos maent wedi bod yn brysur iawn yn hel ŵyn tew parod. Buan iawn wrth gwrs daw adeg y cynhaeaf, hynny yw os y cawn dywydd da i gynnal a pharatoi'r cnydau. Roedd y ddau yn ryw sôn am dorri'r cnwd cyntaf wythnos yma os fydd y tywydd yn ffafriol wrth gwrs. Mae gan fy mrodyr fusnes contractor eu hunain sydd yn golygu eu bod yn mynd i lapio bêls mawr i ffermwyr eraill. Felly 'dw i'n siwr y byddan nhw'n ddigon prysur yn yr wythnosau i ddod.

Ar hyn o bryd rwyf yn ysgrifennu'r blog yma ar drên ar y ffordd i Wrecsam. Fel rhan o fy nghwrs bydwreigiaeth, mae'n rhaid i mi dreulio hanner fy narlithoedd yn Wrecsam dros y dair blynedd. Felly bob diwrnod yr wythnos yma a'r wythnos nesaf rwyf yn teithio ar y trên. Rwy'n mwynhau'r rhan yma o'r cwrs gan ei fod yn siawns gwych i glymu'r wybodaeth rydym yn ei ddysgu mewn darlithoedd gyda'r lleoliad gwaith.

Wel dyna'r cyfan oddi wrtha i am y tro.

Cymerwch ofal! Diolch i chi am ddarllen,

Siân Pierce Roberts

Yn ogystal rydym wedi dilyn holl ddathliadau'r Frenhines yr wythnos hon gan ei bod wrth gwrs yn dathlu'r Jiwbili. Braf oedd gweld ein cymdogion Wills a Kate yn Llundain wythnos yma... a Waitrose, Porthaethwy wythnos diwetha'!! Dyma i chi ddau fyd hollol wahanol! Mi nes i a mam wylio'r cyngerdd fawreddog nos Lun ar y teli bocs a mwynhau'n arw. Mae gennym dalent arbennig drwy'r wlad ac wrth gwrs roedd yr hen Tom Jones unwaith eto yn serennu ac yn gwneud i ni fod yn browd o fod yn Gymry!!!

Wel, y tro diwetha' i mi flogio, roedd hi'n ddiwrnod cyn y Rali....ac rwy'n falch iawn i ddweud bod y diffyg cwsg wedi talu'i ffordd!! Er mai dim ond 9 aelod oedd genym yn y Rali daethom yn gyntaf fel clwb bach. Dim ond 30 o farciau oedd rhyngddom ni a'r clwb enillodd prif wobr y Rali!! Roedd hi'n ddiwrnod arbennig gan orffen gyda pharti gwerth chweil i ddathlu gyda'r nos. Ond na, tydani y ffermwyr ifanc ddim yn rhoi'r gorau iddi yn fan'no... yr wythnos wedyn roeddem yn rhedeg y bar mewn gig or enw 'Soch, Swig a Jig' i gasglu arian ar gyfer Sioe Frenhinol 2013. Diolch i bawb am eich cefnogaeth rydym yn gwir werthfawrogi eich cyfraniad!! Roedd y tywydd yn fendigedig, roeddem yn lwcus iawn! Er ein bod ar ein traed tan tua 1 neu 2 y bore, roeddem yn cystadlu yng nghystadleuaeth y Ras Rafft ar y Fenai o Felinheli i Borthaethwy y diwrnod canlynol. Wel dyma i chi hwyl! Un rafft sydd gennym fel arfer, ond eleni penderfynwyd gwneud dwy rafft, un i'r merched a'r llall i'r bechgyn. Yn ogystal pendefynodd rhai o gyn-aelodau'r Ffermwyr Ifanc ymuno hefyd a gwneud rafft oedd yn cynnwys rhai o arweinyddion y clybiau!! Wel pan saethwyd y gwn, mi redodd pawb i'r dŵr yn syth! A dyma i chi gychwyn helbulys o drio cael pen-ôl pawb ar y rafft. A finnau'n meddwl bod pawb ar y rafft a gweiddi "pawb i bedlo" cyn sylweddoli bod tair dal heb gyrraedd!! Wel, am olygfa! Un o'r genod yn gweiddi'n ddramatig, "mae'n iawn genod...ewch hebddai!", ambell un ohonom wedi colli ein hesgidiau, siaced achub un o'r genod wedi chwythu, ond er hyn oll, fyddwch yn falch o glywed, o'r diwedd fe gychwynom ar ein taith i Borthaethwy! Roedd yna dipyn o raffts o'n blaenau erbyn hyn. Roedd un o'r genod wedi gwneud brechdanau ŵy a sosij i ddod hefo hi rhag ofn y byddai rhywun angen 'power snack'! Felly dyna lle oedd ein rafft ni ynghanol y Fenai yn byta brechdanau ŵy! Fedrwchi goelio'r ffasiwn beth? Fe orffenom y ras yn safle 22ain. Daeth y bechgyn yn 12fed a daeth y cyn-aelodau neu'r 'hen-stejars' yn 2il!!! Llongyfarchiadau! Mae'n rhaid ychwanegu, er mai safle 22ain oeddem ni yn y ras, ni oedd yr unig rafft oedd yn cynnwys dim ond merched ac felly fe gawsom y wobr gyntaf yn y dosbarth merched!! Sôn am hwyl!

Wel dyna i chi fy hanes i ar hyn o bryd! Diolch i chi am ddarllen!

Hwyl am y tro!

Siân Pierce Roberts

Croesawon rhyw 200 o ŵyn i'r fferm ar ddechrau'r Gwanwyn ar ôl tymor ŵyna llwyddianus serch y tywydd ansefydlog a fu. Dw i'n bles iawn i adrodd bod yr ŵyn i gyd eleni wedi eu geni heb ormodaeth o ffwdan, sy'n syndod wrth ystyried eu maint. Mae'r hyrddod Texel a brynais fis Medi diwethaf wedi bod yn lwyddiant ysgubol yn ystod y tymor, gyda'r ŵyn yn gadarn ac yn gryf. Roedd wir angen ŵyn caled y Gwanwyn yma gyda'r tywydd mor gyfnewidiol. Wedd angen cadw llygad clos arnynt ar ddyddiau lle oedd y gwynt yn chwibannu a'r glaw'n pistyllu. Y gwynt a'r glaw yw'r ddau beth sy'n beryglus i ŵyn sydd newydd gael eu geni gan fod yn achosi i dymheredd y corff i ddisgyn, ac o ganlyniad mae'r oen yn mynd mewn i gyflwr o sioc a 'hyperthermia'. Mewn achos o'r fath, bydden ni'n dod mewn a'r fam a'i oen a'i gosod o dan llusern isgoch (infrared lamp) i'w twymo. Syndod yw gweld sut all ychydig o wres wella eu cyflwr yn sydyn iawn. Ar adegau lle mae hwyliau'r oen yn fregus, mi ddewn ni mewn a'r newydd ddyfodiad i'r gegin a'i roi yn ffwrn gwaelod y 'Rayburn'. Os yw shwt beth a gwyrthie yn digwydd bois, 'Rayburn' yw'r boi sydd ishe ar bob ffarmwr defaid! Yr unig broblem yw pan ddeith ymwelwyr i'r tŷ ac yn edrych yn syn at waelod y 'Rayburn' a gweld cynffon oen bach yn siglo. Gyda digonedd o wres a colostrym yn y 24 awr cyntaf, cynigir y dechreuad gorau i fywyd ifanc. Erbyn diwedd Ebrill, roedd y ddiadell i gyd wedi ŵyna ar wahan i un ddafad fach. Roeddwn innau bythefnos dros amser a jobyn 'caesarean' wedd hi yn y diwedd i Mam poor dab. Gobeithiwn y gorau felly am y ddafad fach yma, hasta lan nawr!

Mae'r defaid a'u hŵyn ifanc wedi ymadael a pherci cyfagos y clós erbyn hyn ac yn pori'n jicos lan yn y caeau top ar borfa gwyrdd y Gwanwyn. Tro'r gwartheg yw hi nawr i loia, gyda rhyw ddeg ar hugain yn disgwyl i ddod yn ystod y mis nesaf. Gyda hyn daw gwaith tagio, dihornio ac ysbaddu - digon i gadw'n fishi yn ystod misoedd cynnar yr haf.

Mae wedi bod yn gyfnod reit fishi gyda'r CFfI hefyd. Ychydig o wythnosau yn ôl bues yn barnu stoc gyda'r nos lawr ar faes mart Hendy Gwyn - y defaid bridio oedd i'w barnu. Hon oedd fy mlwyddyn gyntaf i gystadlu ac yn lwcus i finne, defaid brid Texel oedd o dan sylw. Yn gryn dipyn o sioc i finne, cipiais y brig yn y dosbarth o dan 26! Wel bois bach, we ni'n 'chuffed to bits' a wedd Mam yn falch dros ben hefyd! O leiaf fod ambell beth wedi sinco mywn ar ôl y blynyddoedd o bregethu mas ar y clós oddi wrth mam. Byddai bant i'r Sioe Frenhinol nawr ym mis Gorffennaf i gystadlu ar ran Shir Benfro. Mae cystadleuaeth rygbi 7 bob ochr y sir y penwythnos yma hefyd, c'mon bois!!

Mae arholiadau'r Brifysgol wedi dod i ben o'r diwedd am y flwyddyn gyntaf sy'n fy ngalluogi i ganolbwyntio ar waith y fferm, heb anghofio mwy o amser i flogio dros fisoedd yr haf! Ambell i stori fach arall i chwi ddarllenwyr - efallai fe welsoch chi fi ar raglen 'Heno' ychydig o wythnosau yn ôl yn modelu dillad ffasiwn gwledig a oedd yn addas ar gyfer unrhyw fonheddwr cefn gwlad sy'n poeni am ei ddelwedd ffasiwn. Ges i lot o sbort yng nghwmni Huw Ffash a odd e'n brofiad hollol unigryw i finne fel ffermwr bach cyffredin y wlad!

Gyda'r dyddiau'n parhau i ymestyn a nawr fod y nosweithiau digwsg tymor yr ŵyna wedi dod i ben am flwyddyn arall, mae'n amser i gymryd hoi ac edrych. Sdim byd mor odidog i finnau 'na chymryd ychydig o funudau ar nosweth ffein o haf i wylio'r ŵyn bach i gyd yn rhedeg lan yn y caeau top wrth i'r haul ddistaw fachlud. Un o olygfeydd rhyfeddol ffermio.

Pob hwyl a diolch am ddarllen,

Carwyn Bwlchclaw'.

Oddi ar i mi 'sgwennu ddiwethaf rwyf wedi bod yn y CCB lawr yn Torquay lle gaethwyd cael amser gwych. Mi roedd hi'n llwyddiannus iawn i aelodau Cymru gan cynnwys Aled Jones o CFfI Dyffryn Cothi yn ennill Aelod Hŷn y Flwyddyn CFfI Cymru a Lloegr, yn ogystal â chlwb Llanfair-ym-Muallt yn cipio gwobr y Pantomeim. Llongyfarchiadau i'r holl aelodau a fuodd yn llwyddiannus yn Torquay. Mae'r Ralis hefyd wedi dechrau, a chyn belled rwyd wedi ymweld â Ralis Sir Gâr a Morgannwg, gyda nifer o rai eraill ar y gorwel. Mae'r sioeau amaethyddol ar fin dechrau yn ein ardal ni hefyd, a braf fydd cael mynd i Sioe Sanclêr y penwythnos yma er mwyn derbyn fy ngwahoddiad cynta' i farnu defaid Texel.

I gloi mae'n ddrwg 'da fi weud bod ymarfer ar y beic wedi bod yn anobeithiol dros yr wythnosau diwethaf, rhwng y tywydd ar cyfarfodydd mae'r beic wedi bod yn y sied mwy na mas ar yr hewl, fydd gofyn tynnu bys mas os dw i am lwyddo ar y daith yma heb ladd fy hun!! Gobeithio erbyn i fi 'sgwennu nesa fyddai wedi llwyddo i ymarfer tipyn mwy, yn ogystal â cneifio a bwrw mlan â gwaith ar y tŷ!!

Hwyl am y tro

Beefy

I fod yn onast fedrai'm coelio ei bod hi'n fis Mai! Allwch chi? Ma 'dolig yn teimlo fatha ddoe!! Ond 'ta waeth...fflio mae amser medda' nhw! Dim digon o oria mewn dydd...yn enwedig pam mae rali y Ffermwyr Ifanc ddydd Sadwrn!! Am unwaith, eleni da ni fel clwb yn teimlo ein bod ni ar y blaen...wedi cychwyn mewn da bryd...ond na! Mai di mynd yn funud ola' eto! Mai'n beintio, dawnsio, canu, crefft bob nos wythnos yma! Fy ffrind gora' i ar hyn o bryd ydi paent a PVA glue! Ond wir i chi, dyma un o 'highlight' y flwyddyn i mi yn bendant! Pawb yn dod at ei gilydd am ddiwrnod llawn hwyl! Bril!! Dim ond gobeithio neith y tywydd ddal i ni!! Neu mi fyddwni'n socian yn trio tynnu rhaff!! Felly os ydach chi yn yr ardal...dewch i ymuno gyda ni ar safle Sioe Môn, dydd sadwrn y 12fed o Fai, cychwyn am 9yb! Fedrai addo diwrnod pen i gamp i chi!!

Fel rhan o fy nghwrs, rwyf yn cael y cyfle i dreulio diwrnod yng nghwmni gweithwyr eraill o fewn y byd iechyd. Wythnos yma rwyf wedi treulio diwrnod gyda'r ymwelydd iechyd. Fel myfyriwr bydwreigaeth rwyf yn gweld pwysigrwydd perthynas bydwraig a'r ymwelydd iechyd gan ein bod yn cysylltu a chyfarthrebu gyda hwy yn aml pan rydym yn rhyddhau'r ferch ar ôl geni. Yna mae'r ymwelydd iechyd yn parhau'r berthynas gyda'r fam a'i phlentyn nes bydd y plentyn yn dechrau'r Ysgol Gynradd. Mae'n bwysig iawn ein bod yn cydweithio mewn tîm i alluogi gofal effeithiol i'r merched. Rwyf hefyd yn mynd i dreulio diwrnod gyda'r nyrs feddygfa er mwyn gweld a dysgu am eu rôl hwy yn y byd iechyd.

Dyna ni am y tro, diolch i chi am ddarllen!!

Cofion,

Siân Pierce Roberts

Fel cadeirydd CFfI Cymru, mae o hyd yn amser prysur. Penwythnos diwethaf mi fues i'n ddigon ffodus i gael gwahoddiad i fynd allan i Ogledd Iwerddon am CCB CFfI Ulster. Penwythnos yma rwy'n bwrw lawr i Torquay am CCB CFfI Cymru a Lloegr (dw i heb ysgrifennu fy araith eto!!) Hefyd mae yna nifer o ddiwrnodau gwaith maes wedi bod yn ddiweddar gan ddiweddu gyda diwrnod gwaith maes CFfI Cymru yn Aberhonddu. Fydd y siroedd nawr yn dechrau paratoi ar gyfer eu Rali Sirol ac yn edrych ymlaen tuag at y Sioe Frenhinol. Siarad am y Sioe, rwyf newydd edrych ar y dyddiadur a newydd sylwi fod rhywbeth 'mlaen pob penwythnos tan hynny. Felly digon i fy nghadw'n fishi!!

Rwyf wedi bod allan yn ymarfer ar y beic yn ddiweddar hefyd, araf bach mae pethau'n dod, ond rwyf yn llwyddo i gael mwy a mwy o amser ar gefn y beic, a gobeithio wrth i'r diwrnodau ymestyn mwy a mwy (a sychu gobeithio) gai fwy o amser. A gan bod 500 milltir 'da fi i feicio, ma ishe cymaint o amser ymarfer a fedra i ei gael!

Oh a bron i mi anghofio, raid i mi longyfarch fy nghwraig, Louise. Yn yr wythnosau diwetha' mae hi wedi cael ei dewis fel Llysgenhades CFfI Sir Gar am 2012/13, mae'n uchelgais ganddi ers blynyddoedd bellach ac rwyf yn hapus iawn drosti. Edrych mlaen i'w gweld hi yn ei ffrog newydd ar diwrnod Rali CFfI Sir Gâr ar y 5ed o Fai.

Tan tro nesa',

Beefy

Gobeithio eich bod chi gyd yn cadw'n iawn.

Mae'n eithaf oer yma yn Sir Fôn ar hyn o bryd. Mae'r ŵyna wedi gorffen erbyn hyn, ac felly mae'r ŵyn bach i gyd allan yn mwynhau yn y caeau. Mae'r gwartheg godro allan ers ryw dair wythnos bellach ac yn wir mae gwair da yn gwneud byd o les. Pan yn godro gallwch weld y gwahaniaeth o ran safon a'r cynnydd yng nghyfanswm terfynol y llaeth.

Mae'r amser wedi dod ar gyfer un o uchafbwyntiau calendr y Ffermwyr Ifanc sef y Rali flynyddol. Ac wrth gwrs, mi fydd yr enillwyr i gyd yn mynd yn eu blaenau i'r Sioe Frenhinol ym mis Gorffennaf. Thema'r flwyddyn hon yw 'Priodas', felly mi fydd y rhan fwyaf o'r cystadlaethau yn gystylliedig â'r thema. Thema diddorol iawn i ddweud y gwir (dw i wrth fy modd 'efo priodasa'!!) .Mi fydd yna amryw o gystadlaethau'n cael eu cynnal fydd yn siwtio pob aelod- o grefft, i ddawnsio, i ganu, i dynnu rhaff!! Mae yna ddigon o ddewis! Rydym wedi penderfynu pa aelodau fydd yn cymryd rhan mewn gwahanol gystadlaethau ac rydym wedi cychwyn ar ambell gystadleuaeth yn barod. Mae'r hogia' ar hyn o bryd wrthi'n adeiladu'r arwydd! Mae hon yn gystadleuaeth ychwanegol er mwyn hyrwyddo'r Rali o gwmpas y sir, felly mae pob clwb yn gyfrifol am wneud arwydd a'i osod o fewn eu cylch nhw. Os ydych yn yr ardal ar y 12fed o Fai, dewch i safle Sioe Môn yn Mona, Llangefni i gefnogi ac i ymuno yn yr hwyl!

Roedd gan y Mudiad barti nos Wener i ddathlu, llongyfarch ac i ddiolch i'n Llywydd sirol am ei holl waith dros y flwyddyn diwetha'! Rydym wedi bod yn lwcus iawn i ddweud y gwir i gael llywydd mor frwdfrydig a pharod ei help mewn unrhyw sefyllfa!! Penderfynwyd i roi thema i'r noson, ac felly gwisgodd aelodau'r Ffermwyr Ifanc fel staff 'Casualty' ar y noson...roedd y parti'n llawn doctoriaid, nyrsus a chleifion!!

Diolch yn fawr i chi am ddarllen,

Hwyl am y tro,

Siân Pierce Roberts

Ewadd tydi 'di bod yn dywydd bendigedig!! Wel yn bendant mae hi wedi bod yn braf iawn yma yn Sir Fôn. Wrth basio'r caeau bob dydd rwyf yn gweld ambell i ffarmwr wedi cychwyn hau neu aredig sydd yn dangos bod y tywydd yn plesio! Rwyf yn gwybod bod fy mrodyr wedi bod yn hau ond mae hi wedi mynd ychydig yn rhy sych erbyn hyn i fedru rowlio'r caeau. Dw i wrth fy modd gyda'r amser yma o'r flwyddyn i ddweud y gwir. Does dim byd gwell 'na gweld llwyth o ŵyn bach yn mwynhau eu hunain yn y caeau, y peiriannau allan a chychwyn holl weithgareddau'r haf! Ma ŵyn fy mrawd yn dal i fynd cofiwch....'tua cant ar ôl' medda' fo! Hefyd mae prisiau stoc yn dda iawn yn ddiweddar felly...rydym newydd werthu mymryn o'r gwartheg bîff a'r grwp olaf o ŵyn a anwyd yn hwyr llynedd.

Ers cystadleuaeth y Pantomeim rydym wedi cael ambell i noswaith ddiddorol iawn yn y clwb gan gychwyn gyda Mari Jones o gwmni 'Agriscop'. Bwriad Agriscop yw helpu criw o ffermwyr/plant fferm i ddod at ei gilydd dros ychydig o sesiynnau. Roedd yna ddiddordeb mawr gan rai o aelodau hŷn y clwb felly dwi'n siwr fod y noson wedi bod yn diddorol iawn iddynt ac i weddill yr aelodau. Mi fuon i i weld milfeddyg lleol i ddysgu ychydig am y gwaith ac i ymweld ar filfeddygfa. Dyma noson gwerth chweil gyda phob aelod wedi mwynhau eu hunain. Cawsom weld pob agwedd - o'r ddesg blaen yn y filfeddygfa, i'r storfa, i'r ystafelloedd sgan i'r ystafelloedd triniaeth. Rydym yn cael seibiant bach ar hyn o bryd dros wyliau'r Pasg, yna mi fyddwn yn cychwyn yn ôl yng nghanol mis Ebrill, ac wrth gwrs...beth fydd ar y meddyliau adeg honno??....Rali!! Buan ddaw!!

Rwyf ar hyn o bryd ar gyfnod lleoliad yn y gymued ac yn mwynhau' profiad yn arw. Rwyf yn cyfri'n hun yn fraintiedig iawn mae rhaid deud! Dw i wrth fy modd gyda'r cwrs ac rwyf yn dysgu rhywbeth newydd bob dydd!! Rwyf wrth fy modd!!

Wel dyna ni am rwan...

Mwynhewch yr haul!!

Sian Pierce

Mae hi wedi bod yn ddigon mwyn yn ystod y mis diwetha', ond er yr holl sôn am y tywydd sych yn nwyrain Lloegr, digon gwlyb yw hi dan draed gyda ni, ac araf iawn ma'r pridd yn cynhesu hefyd, felly ry'ni'n aros am ragor o borfa i dyfu. Ond rydym wedi mentro i droi'r defaid ac ŵyn allan, mae hi'n llawer iachach iddyn nhw mas tu fas nag mewn yn y sied. Mae'r defaid tac wedi mynd gartre erbyn hyn fyd, felly dylai bod mwy o borfa i'n defaid ni dros y wythnosau nesa'. Ry'ni hefyd yn bwriadu mynd allan i brofi'r pridd o gwmaps y ffarm dros yr wythnos nesaf er mwyn gweld beth yw pH y ddaear, yn ogystal a gweld pa mor ffrwythlon ydyw a gweld faint a pha fath o wrtaith sydd angen ei ddefnyddio. Gobeithio fydd hyn yn weithgaredd gwerth chweil, achos dyma'r tro cynta' i ni fentro gwneud hyn.

Rwyf wedi bod i sawl perfformiad o bantomeims y C.FF.I dros y mis diwetha' a phleser oedd cael gweld pob un ohonynt. Mae diolch mawr yn mynd i'r holl wahoddiadau ges i, ond trueni mawr nad oeddwn yn medru mynd iddyn nhw i gyd! Er hyn, penwythnos diwethaf fe wnaeth C.Ff.I Cymru groesawu aelodau o bob cwr o Gymru i Landudno ar gyfer y Gwledd Adloniant, rownd derfynol y Cystadleuaeth y Pantomeims yng Nghymru eleni, a llongyfarchaidau mawr i G.FF.I Bro Ddyfi a Llanfair-ym-Muallt am ennill yr adrannau Cymraeg a Saesneg. Mi roedd hi'n benwythnos a hanner. Rwy'n edrych ymlaen yn awr i weld yr uchafbwyntiau ar S4C.

Wel mae amser yn symud yn ei flaen unwaith eto, ac os rwyf am gael cyfle i wylio Cymru yn herio Ffrainc am y "Grand Slam", fydd raid i fi siapo hi; "Things to do and people to see!!"

Pob lwc Cymru!

Dylan Beefy.

Dw i ddim cweit yn cofio os ydw i wedi sôn am y cŵn bach o'r blaen. Ond rhyw dri mis yn ôl cawsom dipyn o 'syrpreis' pan welsom dri ci bach yng nghwt Jill yr ast! Sioc medda' chi? Does dim rhyfadd bod ci y fferm drws nesa' yn licio dod acw!! Be bynnag, ma' dad wedi cael modd i fyw gyda Lili, Mali a Jess, y tri aelod newydd o'r teulu, ond yn anffodus rydym wedi gwerthu dau ohonynt wythnos yma...felly roedd rhaid dweud ffarwel!!

Y tro diwetha' i mi siarad gyda chi, roeddwn wrthi'n brysur yn paratoi ar gyfer y pantomeim ac yn wir i chi roedd pob panto ar y llwyfan yn wych!!  Yn anffodus, nid ein clwb ni ddaeth i'r brig ond roedd clwb Llangefni a ddaeth yn gyntaf yn ffantastig! Dyma i chi griw andros o dda a dymunaf pob llwyddiant iddynt nos Sadwrn yn nghystadleuaeth Cymru yn Llandudno.

Cynhaliwyd gweithgaredd eithaf gwahanol ar gyfer C.FF.I  Môn wythnos diweddaf sef y 'gynhadledd sirol'. Bwriad y gynhadledd oedd i edrych ar ddelwedd y mudiad ym Môn h.y logo'r sir, blwyddlyfr, marchnata ayb. Roedd hi'n noson lwyddiannus iawn i ddweud y gwir gyda dipyn o syniadau diddorol yn cael eu rhannu a'u trafod gan yr aelodau.

Ynys Môn yw sir nawdd Sioe Frenhinol Cymru 2013 ac rwyf i a mam yn aelodau o bwyllgor codi arian y sir. Yn bendant, mae yna dipyn o nosweithiau hwyliog wedi eu trefnu. Mi fyddai'n eich cadw 'up-to-date' gyda'r holl drefniadau rhag ofn bod unrhyw beth yn cymryd eich ffansi!! Mi fyswn i'n falch iawn o'ch cefnogaeth.

Yn fy mlog nesaf, cewch fwy o hanes yr ŵyna a mwy o hanesion y ffermwyr ifanc.

Felly hwyl am y tro,

Siân Pierce Roberts

Cadw fynd yw'r nod. Ymhlith y tasgau sydd wedi bod fy nghadw'n fisi yn ystod yr wythnosau diwethaf mae edrych ymlaen tuag at dymor yr ŵyna. Mae'r paratoadau wedi hen ddechrau erbyn hyn. Bues i ati yn pigo hyrddod addas ar gyfer ein defaid bridio ym Marchnad Ddefaid Crymych ar ddiwedd mis Medi. Yna cafodd yr hyrddod eu cyflwyno i'r ddiadell hynny o ryw 130 ar y 5^ed o Dachwedd; pedwar hwrdd lwcus iawn. Mae dafad yn feichiog am ychydig yn llai na 5 mis, felly os yw'r hwrdd yn cael ei gyflwyno ar Noson Guto Ffowc (5^ed o Dachwedd), dylid disgwyl ein ŵyn cyntaf ar ddiwrnod Ffŵl Ebrill (1^af o Ebrill). Mae ambell un ar y llaw arall yn penderfynu ŵyna'n gynharach er mwyn manteisio ar brisiau uwch y farchnad yn ystod Gwyliau'r Pasg. Dylid cofio serch hynny fod costau cynhyrchu uwch i'w hystyried, yn ogystal a tywydd garw o bosib. Un o'r rhesymau pennaf ein bod ni fel teulu yn penderfynu ŵyna yn ystod mis Ebrill yw bod tyfiant porfa ar ei orau erbyn hynny. Golyga hyn y gallwn droi'r defaid a'u ŵyn allan yn gynharach ac o ganlyniad, disgwylir costau is. Y cyn lleied o sieciau dylid Mam i'w arwyddo'r gorau! Croesawir amodau tywydd ffafriol y gwanwyn er lles yr ŵyn bach, ac wrth gwrs mae'n wyliau Pasg i finne' ac Aled i ffwrdd o'r ysgol a'r brifysgol er mwyn fod gartre' ar y fferm i fugeilio'r defaid. Ar ddiwedd Ionawr, buom yn sganio'r ddiadell (fel gynt y gwartheg) am feichiogrwydd er mwyn rhagweld beth allwn ddisgwyl pan ddechreuwn ŵyna. Rhyddhad oedd darganfod fod y rhan helaeth o'r ddiadell yn disgwyl gyda dros 80 ohonynt yn disgwyl gefeilliaid. Gwaith graenus bois! Mae'n ymddangos fod yr hyrddod a ddewisais wedi cymryd eu gwaith o ddifri, dim whare'! Edrychwn ymlaen at groesawi'r newydd ddyfodiad bach a ddaw dechrau Ebrill. Dwi ddim yn siŵr os ydw i'n edrych ymlaen at y prinder cwsg cymaint cofiwch!

Ar y 23^ain o Ionawr, fe ddaeth amser i ffarwelio a gweddill ŵyn tew'r tymor diwethaf. Serch hynny, penderfynais gadw un oen gwryw eleni fel hwrdd 'Suffolk' ifanc. Clywch fwy amdano yn agosach i fis Medi dwi'n siŵr. Ond i weddill yr ŵyn tew gwelwyd unwaith yn rhagor fasnach frwd yn Mart Aberteifi er gwaethaf yr oerfel. Soniais mewn blog blaenorol cyn y Nadolig am brisiau o ryw £99.50 y pen. Nodir fod hinsawdd economaidd Ewrop wedi gadael dylanwad nodedig ar berthynas yr ewro (€) yn erbyn y bunt (£), yn bennaf oherwydd ansicrwydd dyfodol gwlad Groeg. O ganlyniad i ddibyniaeth diwydiant amaeth Cymru ar allforio, mae prisiau'r farchnad wedi gostegu braidd. Er cawlach Ewropeaidd, llwyddais i werthu'r ŵyn am £92 y pen yn ogystal â sicrhau pris uchel i'r cilo (kg) - canlyniad addawol!

 Buom hefyd yn weithgar iawn gyda'r gwartheg yn ddiweddar. Buom yn diddyfnu'r lloi oddi wrth eu mamau rhyw fis yn ôl, hynny yw eu gwahanu gan eu bod yn 8 mis oed. Yn ogystal, fues i ac Aled yn ail dagio'r rheini a oedd wedi colli eu tag. Mae'n bwysig dros ben er mwyn sicrhau ein bod ni ffermwyr yn gweddu gyda mesurau disgwyliedig y Cynulliad. Ac yna finne' a mam yn palu trwy'r gwaith papur - gwir ymdrech deuluol.

 Ambell i ddigwyddiad nodedig arall - llongyfarchiadau mawr i griw pantomeim CFfI Hermon ar faeddu Eglwyswrw er mwyn parhau i'r rownd nesaf yn Llandudno. Pob hwyl i'r criw gyda'u hymdrechion! Fues i hefyd yn rhan o'r gyfres newydd o Jacpot yn ddiweddar ar S4C, profiad gwefreiddiol! Dim jacpot y tro 'ma, ond daw cyfle i gystadlu yn yr ail gyfres eto - ffeili aros! Yn fy mlog nesaf soniaf ychydig yn fwy am baratoadau'r tymor ŵyna yn ogystal â sôn ychydig am ddiwrnod gwaith maes y Clwb Ffermwyr Ifanc. Cofiwch gadw'n sych yn y glaw trwm 'ma!

Tan hynny - cymerwch ofal a diolch am ddarllen,

Carwyn Bwlchclaw'.

'Dwi'n gobeithio bod chi gyd wedi mwynhau rhaglen 'Ffermio' wythnos diwetha'! Yn enwedig y darn gan C.Ff.I Ynys Môn! Syniad gwerth chweil i ddweud y gwir. Mae'n rhoi cyfle i chi gyd weld beth mae'r Mudiad yn ei wneud tu ôl i'r cystadlu! Sôn am 'gystadlaethau' mae'r Panto yn cymryd siâp! Dim ond ychydig dros wythnos i fynd... gwisgoedd - tic! Props - tic! Dysgu'r sgript - hanner tic! Set - hanner tic! Rwy'n ama mai brwsh paent fydd yn fy llaw i bob nos wythnos yma! Braf darllen blog diweddara' Dylan am y daith feicio! Mi fyddwn i'n edrych 'mlaen i dy groesawu 'di yma i Fôn a nawni'n siwr fod 'na banad a bisgedan yn dy ddisgwl di!

Roedd gennai wythnos i ffwrdd o'r Brifysgol wythnos diwetha' ac felly roeddwn yn brysur yn helpu mam gyda'i busnes coginio. Nid wythnos arferol o goginio oedd hi wythnos yma ond wythnos ddiddorol iawn gan inni gael cyfarfod gyda chyn-brynwr 'Harrods' a 'Fortnum and Mason' gan fod diddordeb yng nghynyrch Mam yn Llundain! Rwyf yn falch iawn ohoni! O fusnes bach, mae'n cynyddu bob diwrnod! I Sôn am fy lleoliad gwaith gyda'r Brifysgol, ar hyn o bryd rwy'n ffarwelio gyda'r ysbyty ac yn mynd yn ôl i'r gymuned am gyfnod. Rwy'n falch o ddweud mod i wedi pasio bob un o'r arholiadau mis Ionawr ac felly un cam yn nes!    

Diolch i chi am ddarllen!

Tan y tro nesaf... Cymerwch ofal!

Siân Pierce Roberts

Mae'r defaid 'di bod mewn ers dros fis bellach, ac mae amser ŵyna rownd y gornel, felly mae digon o ddiwrnode hir a nosweithie byr o'n blaenau ni. Pan ddaw ein ŵyn cyntaf wnai drial rhannu'r lluniau gyda chi yma. Mae'r tŷ wedi symud yn ei flaen yn gyflym dros y mis diwetha', ond wrth i'r gwaith fynd yn ei flaen mae'r biliau yn pentyrru, a s'dim sôn am bethau'n gwella gan bod mwy o gostau am waith sydd dal ar ôl i'w wneud!! O wel, ma'n rhaid palu 'mlan!

Mae amser prysur o'n blaenau gyda'r Ffermwyr Ifanc hefyd, gyda nifer o glybiau ar hyd a lled Cymru'n paratoi i gystadlu yn rownd derfynol cystadleuaeth pantomeim eu sir. Mae gwahoddiadau wedi cyrraedd i fynd i wylio'r Pantomeims mewn sawl sir, ond yn anffodus ni fyddaf yn medru mynychu pob un, ond mi fydda i'n gwneud fy ngorau i fynd i gymaint ag y medra i. Rwy'n edrych ymlaen i wylio talent y CFfI ar y llwyfan unwaith eto.

Nes i weud tro diwetha' fy mod yn mynd allan i siopa am feic, ac rwyf yn medru dweud yn awr fy mod wedi prynu un. Y rheswm? Wel er mwyn codi arian tuag at Elusen y Flwyddyn - CFfI Cymru sef Ambiwlans Awyr Cymru. Rwyf wedi penderfynu gwneud taith feicio gan ymweld â phob swyddfa sirol y CFfI yng Nghymru yn ogystal a y 3 maes awyr y mae Ambiwlans Awyr Cymru yn gweithredu ohonynt. Fydd yn dipyn o her i mi (yn enwedig o ystyried pa mor "unfit" i fi!!), ond rwy'n benderfynol o dod i ben a'r daith 500 milltir er mwyn codi arian i'r achos da yma. Rwyf newydd dachre tudalen newydd ar Facebook i hybu'r ymgais, felly os ydych eisiau mwy o wybodaeth am "Daith Feicio Beefy" dilynwch y linc yma http://on.fb.me/xdu6U3 . Mi fydda i'n diweddaru'r dudalen yma gyda dyddiadau a'r wybodaeth ddiweddara'. Os oes gennych unrhyw 'dips' i mi, neu os fedrwch fod o unrhyw gymorth ar y ffordd, plis cysylltwch â mi.

Wel dyna ddigon am nawr, rwyf am fynd am sbin ar y beic newydd!

Hwyl am y tro

Wel mae mis Ionawr yn brysur hedfan heibio! Bydd yr ŵyau Pasg allan cyn bo hir!

Mae'r tywydd wedi bod yn eithaf dros y bythefnos diwetha' sydd yn ei gwneud hi'n llawer haws i'r ŵyn bach sydd newydd ddod i'r byd! Fel dwedais yn fy mlog diwetha', roeddem yn cychwyn ŵyna ar y 10fed. . . ond, fel dwi'n gwybod fel Bydwraig - prin maent yn dod ar amser! Felly yn araf bach, mae'r ŵyn yn cynyddu.

Mae'r Ffermwyr Ifanc wedi bod yn brysur iawn mis yma. Mae Sioe Amaethyddol Môn yn dathlu 125 o sioeau y flwyddyn hon a chynhaliwyd noson fawreddog i ddathlu'r digwyddiad ym Mhafiliwn Môn ar faes Sioe Môn nos Sadwrn yr 21ain o Ionawr. Yn wahanol i'r arfer - nid Eisteddfota neu barnu stoc oedd aelodau y Ffermwyr Ifanc y mis yma, ond yn helpu i baratoi bwyd i'r cant a hanner o aelodau a ffrindiau'r sioe! Dyma i chi wythnos brysur iawn o baratoi y carped a'r byrddau yn gynharach yn yr wythnos, yna y bwyd a'r bar tuag at ddiwedd yr wythnos. Daeth cryn dipyn o aelodau'r sir at ei gilydd i helpu a mi fuodd yn noson lwyddiannus. Daeth criw ffilmio y rhaglen "Ffermio" S4C atom yr wythnos hon i ddilyn hanes C.Ff.I Ynys Môn. Maent yn dilyn un sir bob mis ar eu rhaglen felly cawsant hwythau ymuno â'r dathlu. Bydd y darn yn cael ei ddarlledu ar y rhaglen "Ffermio" tuag at ddiwedd y mis. Yn ogystal, gyda ond tair wythnos i fynd tan y gystadleuaeth Panto sirol, mae'r ymarferion yn prysuro gyda phawb wrthi'n brysur yn dysgu eu sgript.

Pedair arholiad yn ddiweddarach, mae'r arholiadau wedi dod i ben am rŵan yn y Brifysgol. Erbyn hyn, gallai ddweud mod i union hanner ffordd drwy'r cwrs, ac yn dal i fwynhau! Dyna i chi ychydig o'm hanes i dros y pythefnos ddiwetha'. Tan y tro nesa. . .

Hwyl fawr!

Siân Pierce.

Tybed ai eleni a welwn ddiwedd y byd? Pwy a ŵyr? Tybed ai eleni a welwn Gymro yn cipio medal aur yn y Gemau Olympaidd? Cawn obeithio. A tybed ai eleni a welwn dywydd tebyg i Costa Brava yng Nghrymych? Wel, gallai fod o hyd yn bosibilrwydd (wedd pob un o hyd yn dweud fy mod i braidd yn optimistaidd). Beth bynnag ddigwyddir yn 2012, mae'n addo i fod yn flwyddyn gyffrous - diwedd y byd neu beidio.

Cyn sôn ychydig am ddigwyddiadau'r flwyddyn newydd, hoffwn rannu ambell i gyhoeddiad pwysig o'r flwyddyn a fu. Llongyfarchiadau mawr i'm mrawd annwyl Aled ar lwyddo yn ei brawf tractor ychydig o ddyddiau cyn y 'dolig - campus dros ben! Mae'r pellter o wyth milltir rhwng y ddwy fferm o hyd wedi bod yn anhawster, ond nawr gyda'r ddau ohonom wrth y llyw yn gyrru - fydd hi ddim yn broblem. A hefyd yn hanneru'r amser o garto 'bales' yn yr haf - jacpot! Soniais yn fy mlog diwethaf am enedigaeth Nadoligaidd posib ar y gorwel. Wel, bois bach gredwch chi fyth. Ar noswyl y Nadolig, ganwyd llo Henffordd yng nghanol y dathliadau (wedd y llety unwaith eto eleni yn orlawn - felly i'r sied gyfagos wedd hi fod). Croeso mawr i'r byd rhif '432' gyda '532' ein hoff fuches yn fam browd.

Dechreuodd y flwyddyn yn addawol iawn gyda phrawf TB clir gyda'r gwartheg, am ryddhad! Mae 'Bovine Tuberculosis' (TB) o hyd yn ofid i bob ffermwr, ac yn anffodus i ninnau yng Ngogledd Sir Benfro mae'r clefyd mor fyw ag erioed. Ers y flwyddyn 2000, mae dros £100 miliwn o gyllid llywodraethol wedi cael ei wario yng Nghymru ar iawndaliadau i ffermwyr sydd wedi colli stoc o ganlyniad i'r clefyd. Amcangyfrif fod rhyw 100,000 o wartheg wedi cael eu difa yn y ddegawd ddiwethaf. Mae buchesau cyfan wedi cael eu difa mewn ambell i achos a bywoliaeth sawl ffermwr wedi cael ei chwalu. Dylid cynllunio'n fanwl am strategaeth realistig a fydd yn gallu cael ei weithredu er mwyn gwaredu'r clefyd a'r gofid cysylltiedig oddi ar ysgwyddau ffermwyr Cymru. Mae gobeithion a hyder ffermwyr ifanc yn y dyfodol yn y fantol.

Mae'r mis diwethaf wedi bod yn ofnadwy o brysur ymysg gwaith y fferm adref yn ogystal â godro'n gyson i deulu'r Prichard ar ei fferm Rhosmaen sydd yn Nhrefdraeth. Fferm laeth o ryw 300 erw yw Rhosmaen ac erbyn yr adeg yma o'r flwyddyn mae rhyw 240 o wartheg 'Holstein' yn cael eu godro yno. Mae gweithio i rywun arall o hyd yn brofiad gwerth chweil er mwyn datblygu sgiliau a magu syniadau newydd a gallai fod o fudd ar gyfer ein fferm ninnau gartref. A dyma awgrym i unrhyw un sydd am golli ychydig o bwysau ychwanegol y Nadolig, heb fynd yn agos at unrhyw gampfa - ewch i odro fel hobi! Mae'n llawer rhatach 'nag aelodaeth campfa leol a fydd dim prinder llaeth ar gyfer eich 'corn flakes' y bore wedyn yn ogystal! Dylwn i sôn hefyd fy mod i yng nghanol arholiadau mis Ionawr yn y brifysgol - rhywbeth bach arall i gadw fy hunan yn fishi yn ystod y nosweithiau oer yma ar ôl gwaith caled y dydd. Ac yn bendant, mae'n oerach erbyn hyn! Mae'r tir wedi caledu o'r diwedd, felly ceisiaf ledaenu'r slyri a'r tail yr wythnos yma cyn i'r glaw ddychwelyd yn ôl y rhagolygon. Felly, croesi bysedd y bydd hi'n parhau i fod yn sych am ychydig o ddyddiau eto yma yng Ngogledd Sir Benfro.

Ysgrifennaf unwaith yn rhagor cyn ddiwedd y mis, felly tan hynny cofiwch gadw'n gynnes yn yr oerfel 'ma!

Pob hwyl am y flwyddyn newydd,

Carwyn Bwlchclaw'.

Braf yw cael adrodd fod y tŷ yn symud yn ei flaen yn dda, gyda'r adeiladwyr yn dod y rhan fwyaf o'r dyddiau, ond fydd hi'n brafiach fyth pan fydda i'n gallu gweud wrthych ein bod ni wedi symud mewn! Mae'r gwaith wedi bod yn eithaf prysur, mae gennyf un o fy nigwyddiadau iechyd y fuches laeth ar y gweill, a ma llawer o waith trefnu i neud yn siwr bod popeth yn ei le. Y tro hyn mae siaradwr o'r Unol Daleithiau yn dod draw, felly rwyf yn edrych ymlaen i glywed beth sydd ganddo i'w weud.

Yn ddiweddar rwyf wedi bod allan yn chwilio am feic newydd a gobeithio erbyn fy mlog nesaf mi fyddai'n medru gweud fy mod wedi prynu un! Gewch chi gwybod ychydig mwy am y rheswm pam tro nesa'!!

Hwyl am y tro,

Dylan (Beefy)

Rhaid deud bod y tywydd wedi bod yn eithaf diflas dros yr wythnosau diwetha 'ma gydag ambell i gawod fan hyn a fan draw...ond argian mae hi wedi bod yn stormus dros ben yma dros y diwrnodau diwetha! Doedd hi ddim yn ddolig gwyn i ni eleni sydd yn gwneud petha' yn lawer haws o gymharu â'r llynedd!!

Mae 2011 wedi bod yn flwyddyn dda iawn i ni ar y fferm, yn y Ffermwyr Ifanc ac rwyf yn sicr wedi dysgu lot mwy fel Bydwraig o gymharu a blwyddyn yn ôl! Rydym ar fin cychwyn ŵyna ar y 10fed felly mae'r defaid i mewn o dan do gydag ambell un wedi dod yn gynnar.

Bu rhaid i mi godi yn fore heddiw, roedd hi'n ddiwrnod recordio llaeth acw! Y cloc larwm yn canu am chwech ac wrth gerdded lawr y grisiau roeddwn yn clywed sŵn y gwynt yn taro'r ffenestri, felly nôl i fyny'r grisiau i lapio fel nionyn... teimlo bo' fy ngwyliau yn dod i ben!

Yn wir, mae hi'r amser yna o'r flwyddyn eto! O nadi ddim! O ydi mae hi! Bydd pantomein Ffermwyr Ifanc Môn yn cael ei gynnal fis nesaf felly mae'n amser cael y sgriptiau allan! Rydym fel clwb yn ymuno gyda chlwb arall ar yr ynys gan mai dim ond ychydig o aelodau sydd ganddom. Mae'r aelodau yn frwdfrydig ac yn edrach ymlaen yn arw, felly rydym yn gobeithio cychwyn yr ymarferion cyn hir. Mae'r flwyddyn yn edrych yn ddisglair iawn i'r mudiad gyda'r siarad cyhoeddus ym mis Mawrth, Rali Ffermwyr Ifanc Môn ym mis Mai o dan y thema 'Priodas', Y Sioe Frenhinol yn Llanelwedd, Sioe amaethyddol Môn ac wrth gwrs yr Eisteddfod yn Abergwaun! Yn sicr mae'r flwyddyn yn llawn gweithgareddau ar gyfer yr aelodau sydd siwr o fod at ddant pawb! Hoffwn ddiolch o galon i swyddogion y Sir a'r aelodau am eu holl waith called dros y flwyddyn diwetha', mae hi wedi bod yn flwyddyn wych!!

Hoffwn ddymuno blwyddyn lewyrchus iawn i bawb. Hwyl am y tro!

Siân Pierce

Wel ma mis Rhagfyr wedi hedfan (fel arfer), a rhwng gwaith y fferm, gwaith y tŷ a'r partion a gwasanaethau Nadolig, mae wedi bod yn brysur fel arfer gyda digon o amrywiaeth. Yn anffodus yr unig beth sy di bod yn gyson am y mis cyfan yw y tywydd, gyda'r glaw yn cadw pethau'n itha diflas ar y cyfan!!

Fe gafon i 'spin' fach i Gaerlywelydd ar dechrau y mis ar gyfer arwerthiant defaid Texel, ac mi roedd yn dipyn o brofiad i weld rhai o'r bridwyr enwog yn cael arian mawr am eu stoc, ond roedd rhaid hastu nôl er mwyn cael mynd i Gaerdydd i weld gêm ffarwel Shane. Trueni mawr am y canlyniad, ond braf oedd gweld Shane yn sgori cais i orffen y gêm a'i yrfa, ac er cau y to, fe wnaeth hi aros yn sych y diwrnod hwnnw.

Roedd hi'n ddiwrnod itha pwysig ar y ffarm y penwythnos wedyn, diwrnod sganio. Dyma'r diwrnod ble yr ydym yn ffeindio mas faint o ŵyn ma'r defaid yn ddisgwyl, er mwyn i ni cael paratoi ar gyfer y tymor ŵyna. A falch da fi weud bo ni di cal sganio gwych eleni, digon o ŵyn i edrych ymlaen i gael o gwmpas diwrnod San Ffolant, anrheg gwych i Louise!!!!

Er teimlo'n nadoligaidd rydym hefyd wedi bod yn plufio twrcis, a mas yn canu carolau gyda'r Ffermwyr Ifanc er mwyn codi arian i Ambiwlans Awyr Cymru, ac wrth gwrs mae na un neu ddau parti Nadolig wedi bod! We

Wel dyna ddigon amdana i am eleni, cyfarchion yr Ŵyl i chi gyd a gobeithio newch chi gyd dod nôl i ddarllen mwy o'n hanes i yn y flwyddyn newydd.

Wel mae'r Nadolig yn nesáu a'r siopa 'dolig (dwi'n falch iawn o ddeud) wedi gorffen!!  A'r batch cynta' o'r mins peis wedi eu pobi!! Yn bendant mae'r tywydd wedi troi tua Sir Fôn gyda gwyntoedd cryf ac ambell i bwll dŵr ar y lonydd a digon o sdompio yn y caeau! Yn wir i chi, mae hi wedi bod yn andros o wlyb yma. Ond oes yna sôn am eira 'leni? Yn sicr mae hi'n oeraidd yma ym Môn Mam Cymru.

Wel ers i mi 'sgwennu ddiwetha' ma 'na ambell i beth wedi bod ar y 'go'! O'r Ffair Aeaf yn Llanelwedd i Sioe Nadolig ein mart lleol. Mae'r gwartheg godro i mewn erbyn hyn hefyd, felly seilej bob dydd a ddaw!! 

Fel i Carwyn ddweud yn ei flog diweddara', mae'r cyfnod gwerthu wedi cyrraedd!! Yn ystod y dyddiau diwetha' rwyf wedi bod yn helpu fy mrawd ryw ychydig i sortio'i ddefaid gan bod prisiau da am wyn tew dyddia' yma!! Yn ogystal rydym wedi bod yn paratoi y sied ŵyna. Digon o wellt dan draed a digon o binnau yn barod, mi fydd y defaid yn dod i mewn yn reit fuan o gwmpas y Nadolig! Mae Sioe 'dolig ein mart lleol, safle Morgan Evans a'i gwmni yng Ngaerwen, Ynys Môn newydd fod ar yr ail o Ragfyr! Mae'n rhaid i mi ddweud bod y safon yn arbennig eleni a phrisiau da i'w cael! Braf oedd cael y gymdeithas ffermwyr yma ym Môn at ei gilydd cyn y Nadolig.

Pan roeddwn yn 'sgrifennu y tro diwetha' roeddwn ar fin cael fy ethol yn Gadeirydd Hyffroddiant Mudiad y Ffermwyr Ifanc yma ym Môn ac erbyn hyn rwyf yn y Gadair ac yn mwynhau! Mi es lawr i Lanelwedd bythefnos yn ôl ar ran y Mudiad ar gyfer y Ffair Aeaf i farnu gwartheg Beef. Rwyf yn falch o ddweud mod i wedi dod yn bumed allan o bedwar ar bymtheg mewn cystadleuaeth o dan 21 oed ac yn sicr rwyf wedi mwynhau'r profiad. Rwyf yn falch iawn o ddweud bod tîm barnu ŵyn tew wedi bod yn llwyddianus dros ben gan ddod yn drydydd! Llongyfarchiada' mawr i chi bois!! Roeddwn yn sôn wrthych yn gynharach am y Sioe Nadolig yn y mart lleol yma ym Môn. Yn y sioe bob blwyddyn mae yna gystadleuaeth 'dyfalu'r pwysau' ar gyfer aelodau'r Ffermwyr Ifanc. Wel toeddwn i 'rioed wedi trio yn y gystadleuaeth hon o'r blaen, ond mae'r Mudiad yn sicr yn cynnig cyfleuon gwych ac yn wir i chi, cefais gyntaf o dan 21 oed neu lai gyda 19kg o wahaniaeth gyda un bustach a 5kg o'r llall. 'Machi sioc!! Mae criw y clwb wedi bod acw neithiwr yn gwneud mins peis efo Mam (da 'di mam) ac rhaid dweud...roedd y ffedog yn siwitio'r hogia i'r dim!! Rydym ar hyn o bryd yn paratoi ar gyfer y Panto, sgript ayyb! Dwi'n siwr y cawn hŵyl!

Rwyf yn falch iawn o ddweud mod i dal yn mwynhau'r byd Bydwreigiaeth yn yr ysbyty. Rwyf yn gorffen wythnos nesa' dros y 'dolig gyda wythnos a hanner o wyliau ond buan ddaw yr arholiadau ar ôl y Nadolig!!  Felly fy mhen mewn llyfr fyddi!! Ond cyn hynny fe ddaw y gwledda' a'r mwynhau dros gyfnod y Nadolig - gan gychwyn gyda'r 'Gloddest' heno 'ma, sef dawns Nadolig Neuadd John Morris Jones, Prifysgol Bangor! Excitment di-ri!!

Dymunaf Nadolig Llawen i chi a Blwyddyn Newydd Dda!!

Siân!! 

Beth fydd ar eich plât chi'r Nadolig yma? Twrci, neu ŵydd efallai? Beth am gig eidion neu flas o gig oen? Daw'r tymor unwaith eto eleni lle mae'r galw am gynnyrch mwyaf safonol ffermwyr Cymru ar ei uchaf, sydd heb os nac oni bai yn newyddion addawol i'r diwydiant. Yn bersonol, teimlaf gymysgedd o deimladau yn ystod y cyfnod yma. Ar ôl adeg hir o waith caled a thor chwys yng nghyfnod ŵyna'r Gwanwyn, daw'r cyfle o werthu'r cynnyrch gorffenedig, a daw teimlad naturiol o falchder sydd yn gwneud yr ymdrech i gyd yn werth chweil. Ond ar y llaw arall, mae'n anodd anwybyddu'r ffaith fod bywydau'r creaduriaid hynny a fues i'n annog i gymryd eu camau cyntaf, a'r rhai brwydrais yn ddiflino i gadw'n fyw ar fin dod i ben. Hwn yw ochr caletaf y diwydiant yn fy marn i, ac rwy'n siŵr fod y rhan helaeth o ffermwyr Cymru yn cytuno. Dylid cofio serch hynny mae dyna yw natur ein gwaith - a dylwn sicrhau fod y creaduriaid hynny sydd yn rhan o'r diwydiant yn cael eu trin a'u trafod gyda thegwch a'r parch uchaf posib. Mae gofyn bod yn galed yn y diwydiant 'ma, bois bach!

Reit de, na fi wedi dweud fy nweud a rhoi'r byd yn ei le. Fe ddaeth bore Mart Nadolig Aberteifi rownd yn ddigon cloi a dewisais ugain o wŷn a oedd yn gymysgedd o 'Suffolks' a 'Texels' i'w gwerthu. Gwelwyd masnach o ryw 150 o wartheg a dros 2,000 o ddefaid gyda'r prisiau yn plesio pawb. O ni'n falch dros ben gyda'r prisiau terfynol am ein ŵyn ni, a oedd yn amrywio rhwng £94 yr un a'r pum oen gorau yn cael eu gwerthu am £99.50 yr un! Jacpot! Ar y cyfan, diwrnod llwyddiannus iawn, llawn masnach gystadleuol sy'n argoeli'n addawol ar gyfer y dyfodol.

Ar ddydd Mawrth olaf Tachwedd, fues i'n y Ffair Aeaf yn Llanelwedd i fwynhau'r arlwy o stondinau, gweithgareddau a chystadlaethau. Braf oedd blasu ambell i gacen a darn o gaws yn y neuadd fwyd i ffwrdd o'r gwynt a'r glaw, a hefyd gweld ambell i beiriant newydd. Gewn ni weld eleni eto os fydd Siôn Corn gyda digon o le ar ei sled i ddod a thractor yr un i finne' a fy mrawd Aled! Rydym hefyd wedi bod yn brysur gartref yn sganio'r gwartheg am feichiogrwydd. Anrhydedd yw cyhoeddi fod fy hoff fuwch rhif '532' yn disgwyl gyda dim ond rhyw fis i fynd! Genedigaeth Nadoligaidd ar y gorwel - tybed a fydd digon o le yn y llety? Yn ogystal â hynny, buom yn disbaddu'r tarwod ifanc a anwyd eleni fel ein bod yn gallu eu cymysgu gyda'r heffrod ifanc eraill. Mae un enedigaeth Nadoligaidd yn hen ddigon!

Fel y soniais yn gynharach mae'r caeau yn wlyb stecs ar ôl y glaw diweddar. Dylwn gofio fod y bwydydd yr ydym yn bwydo'r stoc jyst mor bwysig a beth sy'n cael ei droi allan ar ochr arall y creadur, ac yn ddigon ffodus mae'n isgynnyrch weddol gyfleus. Defnyddir slyri a thail fel gwrtaith organig er mwyn annog tyfiant y borfa. O ganlyniad i gyflwr diweddar y caeau, mae'r peiriant sy'n cael ei ddefnyddio i'w gorchuddio ar y tir yn gallu difrodi arwynebedd y ddaear. Trown at y dyn tywydd felly yn y gobaith o dywydd oerach er mwyn rhewi'r tir sydd o dan draed. Felly, croesi bysedd! Gyda'r brifysgol ar fin torri am wyliau'r Nadolig, edrychaf ymlaen at ddala' lan ychydig gyda'r gwaith fferm a heb anghofio i fwynhau'r ŵyl. Efallai ei bod hi'n amser erbyn hyn hefyd i ddechrau meddwl am siopa'r Nadolig.. o mowredd mowr!

Pob hwyl a chymerwch ofal,

Carwyn Bwlchclaw'.

Mae'r tywydd gwlyb mwynaidd yma yn hala i mi boeni am rhywbeth arall hefyd, llyngyr yr iau neu ffliwc fel yr ydym yn ei alw. Mae ffliwc yn gallu bod yn niweidiol iawn i lawer o wahanol anifeiliaid, ac mae'r amodau gwlyb a mwyn yma yn ddelfrydol i ffliwci i ffynnu, felly fydda i yn trin y defaid yma yn erbyn ffliwc ar y cyfle cyntaf gaf i, ac yn annog dad i wneud yr un peth gyda'r gwartheg.

Mae pethau di bod yn brysur iawn gyda'r Ffermwyr Ifanc hefyd. Dechrau'r wythnos fuon ni yng nghanol bwrlwm y Ffair Aeaf yn Llanelwedd lle fuodd llond lle o gystadlu a chynadledda. Pleser o'r mwyaf oedd gennyf i gael cyhoeddi Ambiwlans Awyr Cymru fel "Elusen y Flwyddyn" Mudiad Y Ffermwyr Ifanc yn y Ffair, ac rwy'n siwr y gwneith holl aelodau'r Mudiad gefnogi'r elusen haeddiannol yma. Fuodd hi'n sioe lwyddiannus iawn i'r Mudiad, ac mae rhaid dweud fel un o fy hoff sioeau mae mynd i'r Ffair Aeaf wastad yn un o uchafbwyntiau'r flwyddyn i mi, a wnaeth eleni ddim fy siomi! Ond cyn y Ffair Aeaf fuodd yna drip i Rhyl i Eisteddfod y CFFI. Tywydd bendigedig oedd yn ein disgwyl yno, ac am ddiwrnod a hanner arall! Nawr, i adael chi mewn ar gyfrinach fach, 'dwi ddim yn llawer o Eisteddfotwr, ond fe wnes i fwynhau mas draw yn gweld yr holl aelodau yn cael y cyfle i gystadlu. Llongyfarchiadau i bawb wnaeth gymryd rhan yn y ddau ddigwyddiad yma.

Gan ein bod ni ym mis Rhagfyr nawr, rwy'n siwr bod 'na gyfle i fwyta, yfed a mwynhau gormod ar y gorwel, ond bydda i dal i gadw'n fishi rhwng popeth. Ma'r adeiladwyr yn fishi ar y tŷ (a fi yn trial helpu nhw, ond y gwir yw, sai gatre lot!!), felly gobeithio bydd mwy da fi weud am hynna tro nesa', yn ogystal a hanes trip bach i arwerthiant yng Nghaerliwelydd a thaith fach i Gaerdydd ar gyfer gêm rhyngwladol Cymru v Awstralia, c'mon Shane!!

P.S. Newyddion gwych newydd ddod i mewn, ni newydd baso ein prawf TB, diolch byth!!

Sian Pierce Roberts ydw i ac rwyf hefyd yn un o flogwyr newydd Tywydd S4C. Wel hefo'r tywydd eithaf sych a boddhaol rydym wedi ei gael yn ddiweddar yma ym Môn, mae'r tywydd wedi troi erbyn hyn ac mae'n eithaf gaeafol yma!! Cyn i mi fynd ymlaen ymhellach, cyflwynaf fy hun fel merch fferm o Frynsiencyn, Ynys Môn! Fferm 'ychydig o bob dim' sydd ganddom o warthaig godro, gwarthaig stôr, moch a defaid sydd yn ein cadw'n ddigon prysur drwy'r flwyddyn. Mae genai ddau frawd hŷn (Gwyn a Gethin) sydd hefyd yn helpu ar y fferm ac yn cadw stoc eu hunain ar gaeau cyfagos. Ar y fferm mae ganddom fusnes coginio teuluol o'r enw 'Popty'r Bryn'. Rydym yn gwerthu ein cynnyrch mewn siopau lleol yn Ynys Môn, draw i Ddinbych yn y dwyrain ac i Benllŷn yn y gorllewin. Felly yn fy amser sbâr rwyf yn helpu i goginio hefo mam neu yn fy nghar yn eu dosbarthu. Dw i'n astudio Bydwreigaeth (yndi mae'n air eitha' hir...Midwifery yn y saesneg) ym Mhrifysgol Bangor ac ar hyn o bryd yn fy ail flwyddyn. Rwyf wrth fy modd hefo'r cwrs ac yn gobeithio y câf aros yn yr ardal ar ôl graddio.

Rwyf wedi bod yn aelod o Fudiad y Ffermwyr Ifanc yma ym Môn ers pan roeddwn yn unarddeg oed ac yn wir rwyf wedi cael cyfleoedd a hanner drwy'r mudiad. Rwyf wedi derbyn y swydd o fod yn Ysgrifenyddes y clwb eleni (CFfI Dwyran), swydd ddiddorol iawn a dweud y gwir a chaf y fraint o ddod o hyd i siaradwyr gwadd i ddod atom i'r clwb bob wythnos. Rwyf hefyd wedi derbyn y swydd o fod yn Gadeirydd Hyfforddiant Sirol eleni, ac mae fy mlwyddyn i yn cychwyn ar ôl Ffair Aeaf Llanelwedd. Dwi'n siwr y câf flwyddyn penigamp ac rwyf yn edrych 'mlaen yn arw i ddweud y gwir. Os ydi hi'n 'Steddfod, Rali, Diwrnod Gwaith Maes neu Siarad cyhoeddus rwyf wrth fy modd yng nghanol bwrlwm y mudiad ac yn wir heb y mudiad...wel dwn i ddim be 'swni'n ei 'neud. Os oeddech yn Eisteddfod CFfI Cymru wythnos dwytha', yna mi fydd rhan fwya' ohonoch wedi fy ngweld i ar y llwyfan yn cystadlu yn y ddeuawd doniol yn gyffro i gyd am dêc-awê!

Wel dyna i chi 'chydig o fy hanes i! Mi fydda i yn 'sgrifennu blog i chi ar y wefan bob hyn a hyn felly cewch fwy o hanes y fferm, fy mywyd o ddydd i ddydd a mudiad y ffermwyr ifanc dros y misoedd nesa'.

Felly hwyl i chi am y tro,

Siân!

Hoffwn ddiolch yn gyntaf am y cyfle i flogio a rhannu fy mhrofiadau gyda phawb ar wefan Tywydd S4C. I grwtyn bach pedair ar bymtheg o Grymych, mae'n gryn dipyn o anrhydedd. Carwyn yw'r enw neu'n fwy na'n aml rownd y martiau rwy'n cael fy adnabod fel mab Anne Bwlchclaw'.

Saif dwy fferm Bwlchclawdd Bach a Galchen Fawr yng nghysgod y Preseli yng Ngogledd Sir Benfro. Rwyf finnau erbyn hyn fel y mab hynaf wedi cymryd at yr awenau o'u rhedeg o ddydd i ddydd gyda fy mrawd Aled, o dan lygaid barcud Mam wrth gwrs. Lleolir ein cartref Bwlchclawdd yng nghanol bwrlwm pentref Crymych sydd yn brif ganolfan i ffermwyr y Preseli am wasanaethau amaethyddol a hefyd yn gartref i'r farchnad ddefaid poblogaidd. Ryw wyth milltir bant ym mhentref cyfagos Maenclochog lleolir Galchen, ddim nepell i ffwrdd o gopa Foel Cwmcerwyn sef mynydd uchaf y Preselau. Mae'r ddwy fferm yn 300 erw i gyd a'n gartref i ryw 150 o ddefaid bridio ynghyd â 200 o ŵyn stôr, yn frîd sy'n groes rhwng y 'Suffolk' a'r 'Texel' yn bennaf. Rydym hefyd yn ffermio rhyw 100 o wartheg stôr Henffordd heb anghofio am hoff fuwch (drygionus) Charolais Mam. Ein gobaith yn ystod y blynyddoedd nesaf yw datblygu buches Henffordd pedigri ar ôl cael cryn lwyddiant gyda'r brîd yn y gorffennol ac am eu natur tawel amlwg. Ystyriaf fy hun yn lwcus iawn i ddysgu'r grefft o ffermio gyda Mam wrth y llyw; yn gyn-enwebydd ac wedi cael cryn lwyddiant yn y gystadleuaeth NFU Welsh Woman Farmer of the Year, ynghyd â rhyw hanner canrif o brofiad yn y diwydiant.

Ar adegau pan nad wyf yng nghanol baw mewn pâr o 'wellingtons' rwy'n fyfyriwr ym Mhrifysgol Abertawe yn astudio BA Economeg a Daearyddiaeth ac yn cymudo yn ddyddiol. Daw'r ochr economeg yn naturiol i mi ar ôl plentyndod llawn bwrlwm o werthu stoc mewn martiau lleol Aberteifi, Hendy-gwyn a Chrymych wrth gwrs. Mae'r fferm yn profi i fod yn ddihangfa gyfleus o'r llyfrau a does dim byd gwell na neidio'n syth mewn i dractor, mae'n neis iawn i fynd - ond bois bach, mae'n neisach byth dod getre! Ar y penwythnosau rwy'n chwarae'r gêm hirgrwn gyda'r ail dîm yng Nghlwb Rygbi Crymych. Eleni hefyd, ymunais â Chlwb Ffermwyr Ifanc Hermon am y tro cyntaf. Yn ffermwr ifanc sy'n frwdfrydig i ddysgu ac am greu dylanwad yn y diwydiant mae'n adeg cyffrous iawn i finnau a'r teulu. Edrychaf ymlaen at adrodd yr helyntion sydd i ddod mewn glaw a hindda, a ddim gormod o ddrygioni gobeithio!

Pob hwyl a diolch am ddarllen,

Carwyn Bwlchclaw'

Dylan Jones, neu "Beefy" ydw i ac rwyf yn un o flogwyr newydd gwefan tywydd S4C. Cyn i chi glywed am yr hynt a helynt yr wyf yn cael 'da'r tywydd (yn ogystal ag ambell i beth arall), 'o ni'n meddwl bo'n well i fi gyflwyno fy hun yn gyntaf.  'Dwi'n fab ffarm o ochre' Caerfyrddin, ac wedi tyfu fyny yng nghanol bwrlwm amaethyddol Dyffryn Tywi. Fferm laeth oedd gartre 'da mam a dad, ond mae'r gwartheg godro wedi eu gwerthu bellach, ac mae dad yn cadw gwartheg sugno nawr.  Rwyf i a Louise (fy ngwraig) yn ddigon ffodus i gadw ychydig o ddefaid Texel Pedigri (o dan yr enw 'Steddfa') ar y fferm hefyd.

Dim ond ychydig o ddefaid sydd gennym oherwydd mae Louise yn gweithio fel athrawes ac rwyf i yn gweithio yn llawn amser yng Nghanolfan Datblygu Llaeth yn Gelli Aur fel Swyddog Digwyddiadau Iechyd y Fuches Laeth. Mae'n lond ceg o deitl crand ond 'na'i gyd mae'n meddwl yw fy mod yn trefnu digwyddiadau i fferwmyr ar hyd a lled Cymru er mwyn eu helpu i wybod mwy am sut i ddelio gyda phroblemau iechyd o fewn eu buchesau. Swydd ddiddorol iawn sy'n fy helpu i gwrdd â nifer o bobl ddiddorol iawn o fewn y diwydiant, ac wrth gwrs mae'n gyfle i deithio i bob cwr o Gymru.

Gobeithio bo' chi heb flino darllen amdanaf eto achos ma' mwy da fi weud 'to! Ynghyd â fy swydd llawn amser mae gennyf swydd arall hynod o bwysig! Yn ôl ar ddechrau Hydref fe gefais yr anrhydedd o gael fy ethol yn Gadeirydd Mudiad Clybiau Ffermwyr Ifanc Cymru (yn Stadiwm y Mileniwm cofiwch!). Rwyf wedi bod yn aelod o'r mudiad ers blynyddoedd bellach ac rwyf wedi datblygu tipyn ers y blynyddoedd cynnar 'na pan nes i ymaelodi gyda CFfi Dyffryn Tywi. Felly mae'r cyfle hyn yn golygu llawer i mi, ac os wnewch chi barhau i ddarllen y blog yma dros y flwyddyn nesa rwy'n siŵr gewch chi tipyn mwy o hanes y mudiad! Yn ogystal â hyn i gyd yr wyf i a Louise ynghanol adnewyddu tŷ (wrth ddweud "ynghanol", rwy'n golygu rhywle ar ôl y dechre, ond sbel cyn y diwedd!). Felly ar hyn o bryd rydym yn byw mewn carafan ar glos y fferm, felly o safbwynt y tywydd rydym yn gobeithio'n fawr fydd y gaeaf yma'n fwy caredig i ni na'r gaeaf diwethaf!

Wel 'na ddigon gen i am heddi, fe wnai geisio 'sgwennu eto wythnos nesa, ac efallai gewch chi ychydig o hanes Eisteddfod y CFfI yn Y Rhyl a'r Ffair Aeaf o Llanelwedd.

Pob hwyl am nawr

Dylan/Beefy 

Hwyl am y tro.

            O leiaf roedd hi'n ddiwrnod gweddol ar gyfer y gwaith 'ma, ychydig o gawodydd annisgwyl yn dod bob yn hyn a hyn, ond roedd hi'n glós iawn. A dyna'r rheswm am fy steil unigryw i, y trwsus byr a'r wellingtons! Wel odd hi'n fwdlwyd dan draed ond anghyffyrddus fydde'r 'waterproofs'! Yr wythnos cyn ni on i'n wridog, diolch i'r 'fake tan', ges i yn barod ar gyfer priodas fy ffrind ond y 'dom defaid tan' odd yn lliwio fy nghoese i ar ôl bod mas yng nghanol y defaid a'r ŵyn!

            Mae'n ganol Awst yn barod a dau brif ddigwyddiad cenedlaethol yr haf wedi pasio yn barod. Gymrodd hi bythefnos dda i fi ddod dros y Sioe Fawr yn Llanelwedd. Dyna oedd wythnos, heb os nac oni bai, pinacl fy mlwyddyn fel Cadeirydd CFfI Cymru. Roedd hi'n ffantastig gweld aelodau o bob cwr o Gymru yno yn cystadlu, cymdeithasu ac yn mwynau'r sioe. Safon gwych eto eleni yng nghystadlaethau'r ffermwyr ifanc a llongyfarchiadau i Sir Gâr am ddod i'r brig ar ddiwedd yr wythnos. Mi fu'r tywydd yn garedig iawn i ni, dydd Sul a bore Llun oedd waethaf o bell ffordd. Ond dyw'r glaw ddim fel bod e'n effeithio rhyw lawer ar yr aelodau hapus sy'n dod i fwynhau'r adloniant yn y Pentref Ieuenctid! Ges i esgus i brynu pâr o wellingtons newydd gan i'm rhai i adel fi lawr yn wael iawn ar y prynhawn dydd Sul, odd yn nhraed i'n wlyb stecs. Efallai fod y wellingtons (piws i gyd fynd a logo newydd y CFfI!) wnes i brynu ben bore Llun wedi cadw'r glaw bant am weddill yr wythnos!

            Mae'r sioe'n dod a'r gymuned cefn gwlad at ei gilydd ac mae'n ddathliad gwych o amaethyddiaeth yng Nghymru. Ces i gyfle bach cloi ar y prynhawn dydd Iau, i fynd i'r neuadd fwyd am scwlc bach! Dwi'n joio caws a ma'r dewis o flasau gwahanol sydd ar gael gan y cynhyrchwyr yn wych. On i ffili dod o na heb brynu cosyn neu ddau i fynd adre da fi! Bois bach ma bwyd da o Gymru ar gael i'r byd, os glei.

            Es i ar ymweliad bach a'r 'Steddfod fyd. On i heb fod ar y maes ers sawl blwyddyn, felly wac fach amdani, pam lai! Er on i ddim yn meddwl hynny pan o'n i'n gyrru lan yn fy nillad hafaidd a'r tywydd yn diflasu wrth fynd tua'r gogledd. Ond nath Mari Grug fy sicrhau i drwy gyfrwng 'twitter', fod hi'n sych yn Wrecsam! Da yw cyflwynwyr Tywydd S4C!

Felly ar ôl cwpwl o ddiwrnodau hamddenol yn y Sioe Frenhinol ac yn ystod geni Steffan mae hi'n braf i gael bod adre ar y fferm yn cadw golwg ar y stoc. Tra'n siarad am stoc, yr wythnos diwethaf fe werthom llwyth lori o wartheg yn y farchnad ac roeddwn yn bles iawn gyda'r canlyniadau ar y dydd.

Wythnos cyn y Sioe Fawr cefais y fraint o fod ar banel o feirniaid i ddewis enillydd Gwobr Goffa cynta Mr Brynle Williams yn y Drenewydd.  Mi wnes i fwynhau'r diwrnod yn fawr ac fe gafodd Aled Llyr o Dalybont ei wobrwyo ym Mhrif Gylch y Sioe ar y prynhawn dydd Mercher.

Mae pris yr ŵyn tew wedi gostwng yn raddol yn ystod y bythefnos ddiwethaf, ond er dweud hyn mae'r prisau yn ddigon derbyniol am yr adeg yma o'r flwyddyn.

Y dasg nesaf ar y fferm fydd i gael y llafur oddi ar y caeau yn ystod y bythefnos nesa' ac yna mynd ati i hau rêp er mwyn tewhau ŵyn nes ymlaen.

Gwell mynd nôl at y gwaith. Hwyl am nawr!!!

Mae'r cynhaeaf wedi dechrau hefyd ac fe wnaethon ni dipyn bach o silwair rhyw bythefnos nôl nawr pan ddaeth rhai diwrnodau sych a chynnes ond ma' dal ychydig ar ôl i'w wneud. Aros am gyfnod bach sych arall ry' ni ar hyn o bryd er mwyn cael gorffen y cynhaeaf am eleni.

O ran y Ffermwyr Ifanc rydym ni wedi cael hoe fach o'r clwb wythnosol ond mae dal digon wedi bod yn mynd yn ei flaen. Dwi'n credu oni yng nghanol trefnu'r dathliadau y tro diwethaf y gwnes i ysgrifennu ac aeth y digwyddiad hynny'n hwylus ofnadwy. Dwi bellach hefyd yn gadeirydd ar glwb C.Ff.I Dyffryn Cothi felly bydd digon o bethau i gadw fi allan o drwbl am y flwyddyn nesaf eto! Rydym fel clwb wedi bod yn trefnu Gornest Gneifio Cothi. Digwyddiad blynyddol y clwb sy'n denu nifer fawr o gneifwyr ar draw Cymru a thu hwnt. Mae gennym ni nifer o gneifwyr profiadol a rhai ifanc yn aelodau o'r pwyllgor ac mae'n braf gweld pawb yn dod ynghyd ar ddiwrnod tebyg i fwynhau gweld rhai o gneifwyr gorau'r byd wrth eu gwaith.  Dwi methu aros ar gyfer gornest Cymru v Seland Newydd, mae'r awyrgylch yn wych a chystal â'r sioe frenhinol! Gobeithio bydd hi'n ddiwrnod hwylus yfory.

Wedyn pacio yw'r gwaith nesa' y penwythnos yma yn barod i fynd i'r Sioe. Dyma fy ngwyliau blynyddol! Edrych mlaen yn arw i gwrdd â ffrindiau a mwynhau gwylio'r cystadlu a chwilio am ambell i fargen ymhlith y stondinau! Efallai wela i chi 'na!

            Mae wedi bod yn dymor y cneifio a'r cynhaeaf lawr ar y fferm. Cafwyd diwrnod hwyliog gyda'r cneifio ond lwcus bod y defaid i gyd wedi dod mewn y noson cynt yn sych neu ar stop fyddai di bod fel arall. Dwi ddim yn arbenigwr o bell ffordd ond dwi'n siwr bo pawb ar eu hôl hi gyda'r silwair ma eleni! Efallai taw'r gwahaniaeth mwya yw bo pawb di bod yn scwlcan cyfleoedd gore medra nhw, gan fod dim dal ar y tywydd ma. Un diwrnod mae'n sych gorcyn a dwi'n toddi a'r diwrnod nesaf ma'n nghoesau i'n troi'n las a dwi nôl yn fy nghot fawr.

            Wythnos diwethaf a dros y penwythnos sydd newydd basio mae llwythi o gaeau wedi eu clirio ar draws y wlad. Ma nhw wedi dod i ben a beni'r cynhaeaf lawr ar y fferm hefyd - byrnau mawr a'r pit silwair wedi llanw. Yn ystod tywydd sych diwedd wythnos diwethaf cafon nhw wair hefyd felly ma pawb yn hapus! Dwi'n siwr nad yw tymor y cynhaeaf yn dda i lefelau 'stress' unrhyw ffermwr. Ma na lot o gerdded nôl a mlan ar hyd y clós yn mynd mlan a rhedeg i'r tŷ i wylio'r tywydd wrth iddi nhw drio penderfynu ar y 'plan of action'!

            Ges i'n nala mas yn bert gan y tywydd cyfnewidiol ma wythnos nôl. Edrych mas o'r ffenest ar fore diwrnod chwaraeon CFfI Cymru ac oedd hi'n ddiwrnod mwll a diflas felly gwisgo'n addas. Erbyn cyrraedd Aberhonddu roedd hi'n wahanol fyd ac a'r haul yn dan boeth erbyn ganol dydd. Roedd pâr o siorts yn y car, felly dyma newid iddi nhw rhag i mi ferwi yn fy nhrowsus hir. Ond doedd dim cysgod lle on i'n stiwardio'r hoci a llosgais fy nhroed chwith yn ofnadw', ofnadw'! Oni bai am y sombrero ar fy mhen (oedd yn digwydd bod yn y car ar ol parti iâr y noson cynt!), dwi ddim yn siwr shwt siap fydde wedi bod arnai! Chwyddodd fy nhroed i ddwy waith ei faint am dridie a finne'n hercian fel môr leidr a choes bren o gwmpas y lle. Gwers galed iawn i'w dysgu ond fydd yr eli haul yn fy mag am weddill yr haf, rhag ofn!

            Dwi di bod yn brysur iawn gyda'r CFfI yn ystod y mis diwethaf ac yn teimlo fel 'sy fi wedi byw ar olwynion. Y Sioe Fawr sy'n mynd a'n bryd ni nawr a bois bach dwi'n dechrau mynd yn egseited. Dwi'n edrych ymlaen i weld yr holl gystadlu yn adran y CFfI a mwynhau'r adloniant yn y Pentref Ieuenctid. Un peth fyddai yn gwneud dros yr wythnos nesaf yn bendant, gweddi fach yn gofyn yn garedig am dywydd ffafriol yn ystod y Sioe. Sai'n meddwl bo fi'n gofyn gormod!

Mae pris y bîff yn codi'n raddol a da o beth ydi hyn gan bod nifer o dda tew gyda ni i werthu yn ystod yr wythnosau nesa'.

Hwyl am y tro, ta ra.

Cynhaliwyd rali CFfI Ceredigion ddydd Sadwrn diwethaf ar gaeau fferm Pantdefaid, Prengwyn, Llandysul. Roedd hi 'di bod yn gyfnod prysur o ymarferion cyn cyrraedd pinacl y flwyddyn i bob ffederasiwn sirol, y rali flynyddol. Dyma ddiwrnod sy'n llawn o gystadlaethau amrywiol sy'n rhoi cyfleon i aelodau arddangos sgiliau mewn sawl maes, o osod blodau i feirniadu defaid Suffolk, o ganu i brisio eitemau ar gyfer arwerthiant. Cafodd criw CFfI Llanddeiniol ddiwrnod bach da a digon o resymau i ddathlu gyda'r nos.

Eleni gan mod i'n gadeirydd CFfI Cymru dwi'n crwydro o amgylch y siroedd o un rali i'r llall. Dw i eisoes wedi bod i Ynys Môn, Maldwyn ac Eryri a mae Brycheiniog, Maesyfed a Gwent i ddod eto cyn diwedd y mis.

Ymweld ag un rali ar ddydd Sadwrn sy'n arferol ond ddydd Sadwrn diwethaf on i mewn tipyn o bicl gan fod Eryri, Sir Benfro a Cheredigion, ill tri yn cynnal rali ar yr un diwrnod. Bodlonodd un o ferched swyddfa'r CFfI fynd i Sir Benfro, a oedd yn gadael Eryri a Cheredigion ar ôl i mi. Wel nes i throi hi am y gogledd ben bore a gorfod trafaelu trwy dywydd digon diflas, glaw trwm a niwl trwchus. Fe ges i'r pleser o feirniadu cystadleuaeth band yr ardd yng nghwmni aelodau Eryri a gweld ychydig o'r cystadlaethau eraill cyn ei throi hi nôl am adre! On i nôl ar gae rali Ceredigion erbyn 3pm a'r siwrne adre'n dipyn gwell gyda'r haul wedi dod mas i wenu erbyn hynny.

Ers i mi flogio ddiwethaf dwi heb gal llawer o siawns i fynd lawr i'r fferm ond yn clywed am yr hyn sy'n mynd ymlaen gan dad! Aeth y da mas i gyd ganol mis Mai, sydd wrth gwrs yn ysgafnhau dipyn ar y gwaith dyddiol o garthu'r sied a bwydo. On i'n trafaelu fyny i Ynys Môn ganol Mai ac yn gweld y gwartheg wedi troi allan i bori mewn sawl man ar hyd y daith. Er dwi'n siwr bo nhw di gweld gwahaniaeth gan i'r tywydd droi yn dipyn oerach ddiwedd y mis. Ath fy mrawd yng nghyfraith nôl i'w drwsus hir ddiwedd wythnos diwetha ar ôl bod yn ei siorts bob dydd ers mis Mawrth!

Er fod llai o waith wedi i'r da gael eu troi mas, mae'r defaid yn dal i gadw pawb yn ddigon bishi ar hyn o bryd - dosio a thocio. Dw i di cal fy mwcio i fynd i helpu fory, felly diwrnod allan yn yr awyr agored fydd hi, gan obeithio fydd hi'n sych.

Mae'n gyfnod y silwair gyda ni yma ar yr arfordir, ond oherwydd y tywydd ansefydlog mae 'di bod yn 'stop start' ma. Torrodd fy nghymydog y cwbl lawr a wedyn daeth y glaw trwm am ddiwrnod i darfu ar bopeth, cyn iddo fe allu mynd ati i ddechrau codi. Yn aml mae ymarferion gogyfer a'r rali CFfI yn bentost os yw'r bois ar y silwair yn yr wythnosau'n arwain lan at y diwrnod mawr, ond eleni fuo ni'n lwcus o'r tywydd cyfnewidiol (pidwch dweud wrthyn nhw bo fi'n dweud na)!! Dim un ohonyn nhw di colli dim un ymarfer! Da iawn chi bois!

Chi'n cofio fi'n sôn am rali C.FF.I. Sir Gâr? Wel cafwyd diwrnod arbennig y penwythnos diwethaf gyda holl aelodau'r sir yn cystadlu'n frwd ar Faes y Sioe yn Nantyci. Dyma i chi heb os un o uchafbwyntiau'r calendr i holl aelodau'r mudiad. Buodd ymarferion di-ri a pharatoadau trylwyr cyn y diwrnod mawr a thipyn o nosweithiau hwyr a pheintio munud ola' hefyd! Roedd pob math o dalentau yn cael eu harddangos o goginio, i osod blodau, perfformio ar y llwyfan, cneifio, paratoi oen i sioe, crefft, arddangosfa clwb ac adloniant yn y prif gylch a llawer mwy. Mae'n ddiwrnod pwysig iawn i swyddogion newydd y sir hefyd gyda seremoni'r Llysgenhades. Unwaith eto eleni roedd y merched yn edrych yn odidog iawn yn eu ffrogiau newydd a bydd blwyddyn brysur iawn o'u blaenau rwy'n siŵr.

Ar ddiwedd y dydd roedd tipyn o gyffro i gael clywed y canlyniadau. Cyhoeddwyd canlyniadau'r adran iau..... roedd CFf.I. Llangadog yn 1af, a ni C.Ff.I. Dyffryn Cothi yn 2il. Wedyn canlyniadau'r adran hŷn... wel dyna beth oedd sioc... cyhoeddodd Cadeirydd y Sir bod dau glwb yn gydradd gyntaf!  A ie, chi wedi dyfalu'n iawn... eleni roeddem ni C.Ff.I. Dyffryn Cothi yn rhannu'r safle 1af gyda C.Ff.I. Llangadog!  Rali fythgofiadwy arall yn wir a digon o ddathlu yn y ddawns oedd i ddilyn y noson honno!

Yn ddiweddar rydym wedi bod yn brysur yn hau barlys gwanwyn, cyrch a phys er mwyn porthi'r anifeiliaid yn ystod y gaeaf ac i geisio lleihau ar y swm sylweddol o ddwysfwyd rydym yn prynu yn ystod y gaeaf.

Mae'r caeau silwair wedi eu cau er mwyn iddynt gael llonydd i dyfu. Byddwn yn gobeithio torri'r silwair ymhen rhyw chwech wythnos.

Mae'r lloia yn dod yn ei flaen yn hwylus rhwng y ddwy fferm gyda rhyw 45 allan o 115 wedi lloia ac yn mwynhau allan, gan ei bod hi'n iachach iddynt nag yn y siediau.

Ma na lot yn sôn bod haf sych o'n blaenau ni yn dilyn ymddangosiad cyntaf blodau'r ddraenen wen. Ond ma na ddywediad arall Saesneg 'ash before oak, in for a soak' a nath Dad sôn bo lot yn dweud bo dail yr onnen di ymddangos gynta eleni. Amser a ddengys mae'n debyg, ond ma'r ardd adre angen bach o law yn barod i gryfhau'r planhigion sy'n dechre ymddangos.

Dw i ffili credu'r gwynt ma sy gyda ni ar hyn o bryd. Bore ma dw i di bod yn ymladd gyda Polytunnel bach o'n i wedi rhoi lan yn yr ardd. Ma fe wedi gorfod dod lawr cyn bod e'n hedfan bant achos ma'r gwynt di bod mor gryf.

Ddoe, es i lawr i wylio gêm rygbi dysteb Dafydd Jones yn Aberaeron. Ma parc Drefach ar lan y môr ac odd na dipyn o awel na, ond odd hi'n ddigon cynnes. On i mas yn fy sandals ond odd lot dal yn eu bŵts! Dwi wedi mentro mewn i'r trywsus byr ers cwpl o wythnose nawr, ond ma nghoese i'n wyn, peidwch a sôn! O'n nhw'n falch iawn cael gweld bach o haul, ac er eu lles nhw, bydded i'r tywydd da barhau!

Ers i mi ysgrifennu ddiwetha' cafwyd diwrnod prysur gyda Chystadlaethau Siarad Cyhoeddus y Ffermwyr Ifanc a braf yw cael dweud mai Sir Gâr oedd yn fuddugol yn yr adran Gymraeg. Bu cystadlu hefyd yn ystod Diwrnod Gwaith Maes sy'n gyfle i barhau i feithrin crefftau gwledig yn ogystal â datblygu sgiliau newydd. Mae un o uchafbwyntiau'r calendr ar y gorwel, y Rali Sirol, sydd mewn rhai wythnosau, felly bydd pawb yn brysur yn paratoi ac mae'r swyddogion newydd wedi cael eu dewis yn barod. Bydd yr aelodau i gyd yn edrych ymlaen at y diwrnod mawr. 

Pasg Hapus, ac mi wna i ysgrifennu eto cyn hir.

            Ond ddydd Sul 13 Mawrth ges i'n nhaflu mas o awyren 12,000 troedfedd uwchben y Gŵyr, gan ychwanegu'n gyflym fy mod i'n sownd i 'skydiver' profiadol. Doedd dim cwmwl yn unman, yr awyr yn las bendigendig a'r môr yn sgleinio yn yr haul, galle ni ddim di holi am ddiwrnod gwell ar gyfer neud shwt beth. Pam nes i fe, dwi'n clywed chi'n holi!? Pan dwi'n neud pethe twp dyw'r CFfI byth ymhell o'n ateb i! Codi arian i elusen CFfI Cymru, Mind Cymru odd pwrpas y naid a chware teg i 6 o'n ffrindiau am wirfoddoli i neidio gyda fi gan godi cyfanswm sy'n edrych yn debyg o gyrraedd £3000.  Beth sy'n fwy o syndod yw fy mod i wedi eitha mwynhau y profiad ac yn wahanol i rai, dwi heb ddweud nai byth neud e eto. Efallai wir bo fi ar y ffordd i fod yn 'adrenalin junkie!'.

            Mae'n eitha oer pan chi'n cwympo 6000 troedfedd drwy'r awyr yn gwneud 120 milltir yr awr mewn 45 eiliad! Unwaith i'r parasiwt agor wnes i ymacio fwy a gwerthfawrogi golygfeydd godidog dros y Gŵyr ac Abertawe. Yn y tywydd ffantastig on i'n gallu gweld am filltiroedd.

            On i lawr yn Abertawe ar gyfer Gwledd Adloniant CFfI Cymru, 12 o berfformiadau Hanner Awr Adloniant yn cael llwyfan haeddianol yn Theatr y Grand. Bois bach roedd y safon yn arbennig a bron 400 o aelodau di cael teimlo'r wefr o berfformio ar lwyfan proffesiynnol. Roedd hi'n benwythnos ffantastig a'r haul yn gwenu'n braf arno ni trwy gydol. Un rhan arall o'r penwthnos oedd plannu 75 o goed yn rhoddedig gan Coed Cadw yn mharc glwedig Clyne i nodi 75 mlynedd CFfI Cymru. Ro'n i'n falch iawn o'n hunan ar ôl i fi blannu un ar ddeg o goed ar fy mhen fy hun bach!!

            Gwahanol iawn yw'r penwythnos sydd newydd fod o'i gymharu a'r penwythnos yn Abertawe. Dwi di bod yn ŵyna am dridie a dwi'n meddwl i fi bigo'r cyfnod prysura i fod yno! Nelo ni ddim stopio dydd Sadwrn, ŵyn yn popo mas fel pys a'r llocie yn llenwi'n gyflym. Ŵyna mewn ma'n Wncwl ond ma'r tywydd braf yn gymaint o gymorth wrth i ni allu troi'r ŵyn bach mas yn prin ddiwrnod oed.

Erbyn hyn mae'n swyddogol yn wanwyn ac yn sicr ma gweld ŵyn bach yn prancio a gwres yr haul ar eu cefnau yn un o arwyddion gorau'r gwanwyn i mi. Ma nhw weld yn altro dipyn cynt pan fo'r tywydd fel mae ar hyn o bryd.

Dydd Llun dwi'n meddwl odd y diwrnod twyma, bois bach odd hi'n twlu gwres ar un adeg yn yr haul. Gymres i funud i eiste ar y clawdd wrth i fi aros i'r defaid a'r ŵyn gael eu casglu ynghyd a chymorth y ci, a na beth oedd braf. Rhowch chi funud felna i fi unrhyw ddydd o'i gymharu a munud ar draeth un o'r cyrchfeydd gwyliau tramor yma. Glywes i ddywediad gan fy Wncwl ddoe on i heb glywed o'r blaen, cadno o ddiwrnod i ddisgrifio'r tywydd braf.

Mae porfa digon da yn y caeau ar gyfer y defaid a'r ŵyn ond am ba hyd cyn bo ni'n galw allan am law eto? Dwi'n siwr alle sawl ffarmwr neud tro ag ambell i gawod erbyn hyn i roi hwb i'r borfa eto. Ond plis, a ddaw'r cawodydd yma gyda'r nos os gwelwch yn dda!!

Un peth arall sy di cadarnhau newid mewn tymor, statws fy ffrind ar facebook yn dweud bod hi di rhoi dillad ar y lein am tro cynta leni a felly'n bendant roedd y gwanwyn yma. Licen i di gallu manteisio ar y tywydd braf wythnos dwetha i roi dillad ar y lein, ond pan ma'n nghymydog mas a'r slyri sdim gobaith rhoi dim ar mas neu nôl i'r peiriant golchi i gael gwared ar y drewdod byd nhw'n gorfod mynd eto!

Fe fuodd tipyn o bethe mlân a finne'n byw ar olwynion! Ges i drip i gynhadledd flynyddol yr NFU yn Birmingham, lle bu cyfle i wrando ar nifer o siaradwyr yn rhannu eu safbwyntiau ar sefyllfa bresennol amaethyddiaeth. Roedd y naws yno ar y cyfan yn bositif ac ambell gyfeiriad amlwg at y gwaith da sy'n cael ei wneud gan y cynulliad er budd ffermwyr Cymru. Wrth gwrs, bu tipyn o gwestiynnu ar y pwnc sy'n boen meddwl i lawer, sef TB. Dwi ddim yn ffermio o ddydd i ddydd ond mae'n dda o beth cael y cyfle i fynychu cyhadledd o'r fath a dysgu rhywbeth yr un pryd.

Hanner Awr Adloniant oedd tri gair pwysig arall a gyfrannodd at ddiflaniad Chwefror a chynnydd yn fy mhwysau gwaed i dwi'n siŵr! Ma criw o aelodau brwdfrydig gyda ni yn CFfI Llanddeiniol ond mae'n dipyn o sialens cal nhw gyda'i gilydd mewn un 'stafell ar gyfer ymarfer! Ond gyda bach o lwc aeth y perfformiad yn golew a daeth cynhyrchiad y clwb o 'Byd o Liwiau' i'r 3ydd safle, ma hwnna'n dipyn o gamp gyda 12 clwb yn cystadlu. Lwcus bod y tywydd 'di bod yn garedig i ni a dim rhew na eira 'di amharu ar gyrraedd yr ymarferion leni yn wahanol iawn i fel odd hi yn 2010!

Mae di bod yn dywydd grêt, yr union math o dywydd dwi'n joio - crisp a sych. Dyw hi dal ddim yn gynnes ond ma'r haul yn gwenu'n braf felly ma pawb yn teimlo'n well. Ond ma na rai sy'n codi 'goose pimples' arnai o'u gweld nhw, mas yn eu shorts yn wythnos gynta' Mawrth, pan odd y tymheredd yn bendant ddim di pasio 10°C!

Ges i gyfle i dreulio diwrnod bach lawr ar y ffarm ddechrau Mawrth yn helpu gyda paratoadau gogyfer ŵyna. Mae'n wir beth ma nhw'n ddweud bod ffermwyr yn dilyn sawl galwedigaeth - saer oni'r diwrnod yna wrth i fi atgyweirio giatie yn barod i neud lloce. Dwi'n edrych yn eitha danjeris â mwrthwl yn fy llaw! Daeth Mawrth i mewn fel oen a dwi wir yn gobeithio neith y tywydd ffein yma bara a na ddaw, mas fel llew yn wir, neu bydd hi'n neud y tymor ŵyna yn dipyn anoddach.

Er bod y tywydd wedi ffeinhau tipyn, mae'r porfa'n araf iawn yn tyfu gan bod y nosweithiau wedi bod yn oer iawn tan yn ddiweddar.

Mae yna ddau lwyth lori o wrtaith eisioes wedi cyrraedd y fferm ac fe fydd angen gwasgaru hwn ar y tir pori er mwyn hybu'r porfa i dyfu.

Hwyl am y tro.

Mi wnath hi gwpl o nosweithiau digon annifyr a gorfod i fi drafaelu nôl dros 'Steddfa nos Iau a nos Sadwrn mewn gwynt, glaw a niwl. Yn y tywyllwch roedd hi'n anodd gweld y pyllau dŵr oedd di cronni, yn enwedig pan fo car yn dod o'r cyfeiriad arall yn olau i gyd. Wnes i fwrw cwpl o'r pyllau yn go heger ma rhaid dweud ac odd hi'n ddigon peryglus mewn ambell fan.

Mae di bod yn wythnos cyffrous ym myd y Ffermwyr Ifanc. Odd hi'n ddiwrnod hir o bwyllgorau dydd Sadwrn gyda lot o benderfyniadau pwysig wedi eu gwneud. Ond dwi'n siwr bydde pawb yn gytun taw'r penderfyniad mwyaf hir ddisgwyliedig  a wnaed oedd cymeradwyo logo newydd i CFfI Cymru. Mae di bod yn broses hir ond ni di cyrraedd y terfyn a gwyliwch allan am y logo newydd yn fuan!

Treuliais i noson lawr ar y fferm dros y penwythnos, sai di cal cyfle i fynd lawr ers sawl wythnos. Doedd deffro fore Llun i ddim electrig ddim y ffordd gorau i ddechrau'r diwrnod ar ôl gwyntoedd cryfion eto dros nos. Chware teg reodd y cyflenwad nôl erbyn 7.30am felly rhaid canmol y cyflenwyr am hynny. Ar ôl noson mor wyntog chi ddim yn siŵr pa ddifrod fydd yn eich wynebu tu allan, ond roedd popeth mewn trefn diolch byth.

Ma'r defaid triplets a hanner y defaid twins yn tŷ ac felly ma'r gwaith bwydo'n mynd i drymhau yn raddol o hyn nes diwedd wyna. Mi fydd y defaid sydd ar ôl mas hefyd yn dechrau cal cêc yn fuan a ma rhai eisoes yn cael.

Un peth sy'n bwysig cofio pan lawr ar y ffarm mewn tywydd gwlyb a mwdlyd - dyw'r cŵn ddim yn gwybod y gwahaniaeth rhwng dillad bob dydd a dillad gorau. I ddweud y gwir dwi'n siwr bo nhw'n dueddol o neidio fwy pan dwi'n trio cadw'n lân a ddes i adre nos Lun yn fwd i gyd, diolch Celt!

            Pwdwr iawn a di-hwyl fues i wythnos dwetha - nes i aros yn llonydd rhy hir a dalodd y 'bug' lan da fi neu'r traed gwlyb oedd ar fai! Ma'n nhraed a'n nwylo i'n bethach oer ar y gore ond odd hi'n wath nag arfer pan on i ddim yn teimlo'n dda.

            Ma angen doctor ar y Peugeot sda fi fyd dwi'n meddwl. Dyw e ddim yn lico'r tywydd oer ag unwaith mae'n mynd dan -3°c ma tipyn o waith i ddechre fe'n bore. Ma rhywun di sôn falle ma'r 'heater plugs' sy angen sylw, os yw hwnna'n golygu rhwbeth i chi!

            Dwi bron a beni ysgrifennu sgript hanner awr adloniant i aelodau CFfI Llanddeiniol. Ni'n dueddol o fod yn funud olaf a tair wythnos sy da ni i roi'r cynhyrchiad at ei gilydd ond jiw ddown ni ben siwr o fod. Dyna lle ma'n holl amser sbâr i'n mynd i fynd yn ystod yr wythnosau nesaf. Gerddes i lawr i ymarfer heno a synnes i pa mor slic odd yr hewl ond wedi dweud hynny mae'n noson glir braf a sêr mas ymhobman.

            O ie, gyda'r tywydd sych daeth arogl iachus cefn gwlad i lenwi'n ffroenau. Ma'n nghymydog wedi bod a'r 'slurrey' mas felly tu mewn fydd y dillad yn sychu yn tŷ ni am gwpl o ddiwrnode.

Mae yna dros 100 o wyn yn bach yn Tŷ Hen ar hyn o bryd ac rwy'n falch i ddweud fod y rhan helaeth ohonynt allan erbyn hyn wedi cyfnod hir dan do dros gyfnod y glaw trwm a'r gwlybaniaeth.

Wythnos diwethaf roedd cinio blynyddol grŵp trafod Llambed a'r Cylch yn nghwmni cyn-aelod o dîm rygbi Cymru sef John Davies (Cilrhiwe). Yn y cinio mae canlyniadau cystadleuaeth silwair rhwng yr aelodau, sy'n dipyn o hwyl a dweud y gwir.  Rwy'n falch i ddweud ein bod wedi cael cyntaf ac ail gyda'r silwair byrnau mawr, ac ail a thrydydd gyda'r gwair byrnau bach.

Hwyl am y tro i chi.

            Mor wahanol yw hi wythnos yma i gymharu a'r wythnos cynt. Glaw, glaw a mwy o law. Cyn mynd ymlaen mae'n bwysig sôn nad yw'r anghyfleustra mae'r glaw wedi achosi gyda ni yn ddim byd tebyg i'r dilyw ma nhw wedi brofi yn Awstralia, Sri Lanka a Brasil. Mae'r lluniau rydym ni wedi weld ar y teledu yn codi braw ac yn ein hatgoffa o'r fath bwer sydd gan fyd natur a'r tywydd trosom.

            Roedd hi'n bryd sganio'r defaid a buo ni'n lwcus o gael diwrnod gweddol sych ddydd Mawrth i ddod ar defaid i mewn i'r sied dros nos. Roedd hi'n anodd credu pa mor wlyb oedd y caeau a'r beic pedair olwyn yn troi'r porfa glas yn drac brown diflas wrth fynd ati i rowndio'r defaid. Roedd yr ardal o gwmpas y 'feeders' yn bwdel a roedd yn amlwg na ddylai'r un nifer o ddefaid ddychwelyd i'r cae yma gan ei fod mor wlyb.

            Yn gynnar fore Mercher (dwi ddim yn grêt yn y bore ond ddes i ben!) dyma fynd ati i sganio a'r canlyniadau yn plesio. Ma'r defaid 'triplets', sydd ddim yn rhy niferog, diolch byth, wedi eu cadw yn tŷ ond mae'r gweddill wedi eu troi nôl allan am gyfnod eto. Mi fydd hi'n amser wyna cyn troi rownd.

            Dwi di mabwysiadu'r 17 o hyrddod blwyddi sy wedi ymgartrefu dros y gaeaf yn y cae drws nesa i'r tŷ. Ni'n tipyn o fêts erbyn hyn!! Ma nhw'n stompio tuag ata i pan fydda nhw'n clywed y gat yn agor gan bo nhw'n gwbod bo bach o gêc ar y ffordd iddi nhw! Dynhw ddim yn cael llawer ond ni wedi cario ymlaen i roi ychydig yn dilyn yr eira sydd wedi gadael ei ôl ar y porfa. Ma nhw'n gymysgedd o hyrddod mynydd Cymraeg a Speckle gydag un Suffolk yn eu plith. Yn anffodus ma'r hyrddod mynydd Cymraeg yn anghofio am eu cyrnau wrth iddi nhw gronni o'n nghwmpas i a ma nhw'n cal sawl tap ar y pen i'w callio nhw!

            Ma na wahaniaeth mawr di bod o un wythnos i'r llall a'r tir oedd yn wlyb ac yn fwdlyd wythnos dwethaf wedi caledu gyda'r rhew yr wythnos yma. Mae'r tymheredd wedi gostwng a thipyn o niwl wedi bod am biti'r lle. Ddes i ar draws niwl ar y ffordd i gyfarfod Bwrdd Rheoli CFfI Cymru yn Builth ddydd Llun. Ar y ffordd lan fues i'n trafaelu drwy'r niwl rhwng Llangurig a Builth ond ar y ffordd adre roedd hi'n glir heblaw am gwpl o filltiroedd tra'n pasio Aberystwyth - roedd hi'n anodd gweld hyd yn oed pellter bach o'm mlaen.

            Cafwyd noson ddiddorol yn mhencadlys FUW yn Ngogerddan nos Fawrth - Hawl i Holi Materion Gwledig CFFI Cymru yng nghwmni Gareth Vaughan, FUW; Steve James, NFU a Dai Davies, HCC. Roedd tri testun dan sylw sef Glastir, TB a maint y fferm fodern a chafwyd trafodaeth ddifyr gan y siaradwyr.  

            Dwi di sôn o'r blaen nad ydw i'r gorau am godi gyda'r bore, a bu'n dipyn o ymdrech fore Mercher wedi cwpl o ddiwrnodau bishi. Ond trueni na fysen i di codi ynghynt - gyda'r car yn fflachio -6° arnai roedd gwaith dadleth ar ffenestri'r car, yn enwedig gan bod rhew ar yr ochr fewn hefyd! Wedyn dyma ga'l yn nal yn trio dod mas ar dop lôn gan fod lori fawr newydd basio am lawr yn araf a chynffon o geir yn dilyn ar ei ôl. Ac wrth gwrs gan fod lori araf o'm mlaen penderfynais fynd ar yr hewl fach sy'n croesi dros y top o Lanon i Ciliau Aeron er gwaetha'r rhew! Mi wnes i ddifaru gan fod yr hewl yn slic ac angen tipyn o ofal a 'low gear' i gadw llinell syth. Canlyniad hyn oll = hwyr i'r gwaith! Ond o leia fe wnes i ddysgu gwers, dim y llwybr byrra sy gloia bob amser!

Wnes i dreulio dydd gŵyl San Steffan lawr ar y fferm. Un o'r prif dasgau, wrth gwrs, oedd mynd mas a 'big bales' i'r defaid a bois bach 'na beth oedd syrcas. Trueni mawr nag oedd camera gyda fi i dynnu llun o'u acrobatics wrth iddynt ymrafael am y cyntaf i gael gafael yn y silage.

Roedd hi'n eitha neis cael hoi yn yr wythnos rhwng Dolig a'r flwyddyn newydd a'r pwyslais mwyaf fu ar gymdeithasu! Cefais wahoddiad gan Sara Downes, Brenhines CFfI Ceredigion i dderbynwest Dawns y Frenhines ym mhafiliwn Bont. Braf oedd gweld sawl cant o ffermwyr ifanc wedi dod yno i gefnogi'r digwyddiad.

Mae wythnos cyntaf Ionawr wedi bod yn gynhesach o leiaf, er mae di oeri eto dros y penwythnos yma. Dwi wedi dechrau swydd newydd fel cynorthwy-ydd dysgu a lwcus fy mod i wedi prynu cot newydd i gadw'n gynnes pan allan amser chwarae ar ddyletswydd. Un peth dwi wedi sylwi, dyw plant ddim yn teimlo'r oerfel fel ni! 

Roedd sêl mlan mewn siop awyr agored yn Abertawe felly dyma fi yn mateisio ar y cyfle i brynu cot, sgidiau cerdded, menyg, fleece a sane trwchus. Gofynnodd y boi bach os on i mynd i rhywle neis, ond dwi ddim yn meddwl ma Aberystwyth odd yr ateb odd e'n ddisgwyl glywed! Ond dwi'n barod nawr am fwy o eira a gobeithio wir gan bo fi yn barod na ddaw e ddim nôl nes gaeaf nesa!

Ar y fferm mae rhai o'r gwartheg wrthi yn lloia ar hyn o bryd a nos Wener dwetha bu tipyn o waith tynnu un llo. Er well i fi ychwanegu bod y gwaith caled wedi ei wneud erbyn i fi fynd mas i'r sied i fusnesa a chael pip ar y newydd ddyfodiad! Noson fach digon annymunol oedd hi hefyd a rhaid oedd osgoi'r cawodydd trwm ysbeidiol wrth fynd o le i le. Roedd tipyn o ddŵr ar yr hewl ar y ffordd adre'r noson honno. Mae'r gwynt wedi codi dros nos y penwythnos yma a'r glaw wedi bod yn tasgu yn erbyn y ffenest. Dyna pryd dwi'n ddiolchgar bo fi'n y tŷ'n glyd ac yn gynnes a ddim mas yn trampo!

  Roeddwn i yn un o saith aeth ar daith Pwyllgor Materion Gwledig CFfI Cymru am dridie i Iwerddon. Roedd arfordir dwyreiniol y wlad wedi cael tipyn o eira ac er fod y prif ffyrdd yn weddol glir roedd yr hewlydd bach ar y ffordd i'n hymweliad cyntaf, ffatri Keenan yn Borris, wedi eu gorchuddio ag eira a rhew. Diddorol iawn odd gweld y broses o gynyrchu un o beiriannau bwydo Keenan, y linell gynhyrchu yn hollol hyblyg i gwrdd a gofynion gwahanol yr archebion unigol. Teithio wedyn i goleg amaethyddol Kildalton a chael sgwrs gyda'r unigolion oedd yng ngofal y gwartheg godro a'r gwartheg biff a defaid yno. Ar y dydd Sadwrn fuo ni ar ymweliad a dwy fferm yn ardal Longford. Roedd y ffarmwr godro yn rhan o grwp trafod oedd yn cwrdd unwaith y mis ac arweinydd y grwp fu'n sgwrsio a ni am y busnes a'r ffigurau pwysig (odd yn mynd dros fy mhen i braidd!). Ar hyn o bryd ma na ysgogiad o €1000 i ffermwyr godro ymuno a bod yn weithgar o fewn grwpiau trafod yn y wlad a llawer o bwyslais ar hyn. Wac fach wedyn o amgylch fferm amrywiol oedd yn cadw gwartheg biff, defaid a ceirw. Roedd contractwr lleol yno yn cynhaeafu'r 'fodder beat' ond yn cael ychydig o broblem. Fe ddechreuwyd y gwaith wythnos ynghynt ond daeth yr eira a hwn oedd y cyfle cynta' a fu i gwblhau'r gwaith ond roedd niwl trwchus yn golygu bod y dail yn llaesu ac yn anodd i'r peiriant gael gafel ynddynhw. Roedd tipyn o'r cnwd felly yn cael ei adael yn y ddaear ond roedd y ffarmwr am droi'r defaid yn ôl i'r cae iddi nhw gael gwneud y mwyaf o'r hyn oedd yn weddill ac i osgoi gwastraff. Anodd iawn oedd gweld y ceirw ynghanol y niwl trwchus. Roedd e wedi bod yn eu cadw nhw ers 12 mlynedd ac yn gymharol hapus ar pris roedd e'n gael. Yn wahanol falle i'r drefn o ddanfon wyn pan fydde nhw'n barod, roedd y ceirw ifanc oll yn mynd mewn un llwyth i'r lladd-dy unwaith y flwyddyn. Y rheswm pennaf oedd pellter y lladd-dy oedd yn derbyn y ceirw o'r fferm. Wrth gwrs doedd dim un ymweliad ac Iwerddon yn gyflawn heb ymweliad a Temple Bar yn Nulyn a'r ffatri Guinness!

   Roedd y croesi nôl yn gymharol llyfn on in meddwl er nath y capten sôn bo ni'n hwyr yn cyrraedd Abergwaun oherwydd gwyntoedd uchel. Wrth gwrs, nath y tymheredd uchel (wel ma 5°c yn uchel ar hyn o bryd) ddim para, ag roedd rhaid clirio'r rhew oddi ar ffenest flaen y car cyn troi am adre a'r arwydd - cyfarwydd yn fflachio arnai yr holl ffordd.

            Odd hi'n braf iawn cael teithio ar y trên drwy gefn gwlad oedd yn edrych yn bert iawn yn yr eira a pheidio gorfod poeni am fy sgiliau gyrru! Dwi'n meddwl ma ar ei wyliau yn Builth fydd y Peugeot bach dros Dolig nawr! Does dim car wedi gallu mynd ar hyd ein lôn ni ers dydd Gwener, dim ond cerbydau 4x4, felly dyw car mam na dad di bod mas o'r garej. Mae fel rinc sglefrio (sy'n golygu fod fy nghi defaid Nel yn treulio mwy o amser ar ei thin pan ewn ni am wac druan!) a dim golwg bod yr hewl yn mynd i wella yn y dyddiau nesaf.

            Mae fy nghymydog sydd a fferm ordro ond a hewl arall i fynd ato wedi gorfod mynd ati i'w glirio ddwy waith, er mwyn rhoi mynediad i'r lori laeth. Unwaith fore Gwener a wedyn eto fore Sadwrn ar ôl i sawl modfedd arall o eira gwympo. Mae e hefyd yn fishi yn bwydo'r defaid tac sydd gyda fe yn ei gaeau, sy'n ychwanegu tipyn mwy o waith at ei ddiwrnod arferol.

            Ma tipyn o eira lawr ar y topiau uwchben Llanfair Clydogau ar fferm fy Wncwl hefyd. Fues i'n siarad gyda fe nos Sul ar ei benblwydd yn 65, ond doedd e heb gael diwrnod i'r brenin! Roedd problemau wedi bod gyda'r pibellau dwr ac wrth gwrs ma dadleth y pibellau yn rhan arferol o'i ddiwrnod yn ystod yr wythnosau diwethaf. Hefyd roedd angen symud y defaid lawr o'r caeau top er mwyn gallu mynd ati i'w bwydo'n haws. Roedd lluwchefydd yn gwneud y dasg hyn yn anodd iawn a'r 'quad' yn methu mynd i rhai llefydd. Roedd fy chwaer a fy mrawd yng ngyfraith di gallu mynd ato fe yn y 4x4 i'w helpu gyda'r gwaith a fel bod e'n cael ei anrhegion penblwydd. Dyw'r eira ma ddim yn gwneud bywyd ffermwyr yn hawdd o gwbl.

            Ddoe, wnes i ddarganfod bydd y 'boiler suit' yn y tywydd oer ma pan es i allan i fwydo'r wyn hyrddod sydd yn y cae drws nesa'. Pan wnes i ddechrau ysgwyd y bwced sugarbeat, odd e'n eitha doniol gweld dau hwrdd oedd ar ôl ar dop y cae yn rhedeg cath i gythrel drwy'r eira a'r powdr gwyn yn hedfan i bobman o'i cwmpas nhw!  Mae'r wyn yn joio gorwedd yn y man lle ni di bod yn rhoi'r silage mas iddi nhw, sai'n beio nhw, ma ishe manteisio ar unhryw beth sy'n mynd i roi ychydig bach o wres ychwanegol yn y tywdd oer ma! Dwi'n mynd i wisgo'r 'boiler suit' tipyn mwy!

Mae'r tywydd oer yma yn rhoi'r ddaear i gysgu gyda'r caeau'n araf iawn yn aildyfu ar ôl y pori, oherwydd hyn rydym yn cynnig byrnau mawr o silwair i'r defaid i'w helpu i ymdopi â'r amgylchiadau.

Braf yw nodi fod prisiau'r farchnad ar i fyny wrth i ni werthu llwyth o wartheg tew i'r lladd-dŷ lleol am bris digon deche.

Yn ein siop cigydd a delicatessen yn dref farchnad Castell Newydd Emlyn mae prysurdeb y Nadolig wedi cyrraedd, gydag archebion am hamperi yn cynnwys cig, cawsiau, alcohol, siocled, jam, a shytneis yn ein cadw ni'n brysur. Mae'r hamperi sy'n cynnwys rhan helaeth o gynhwysion Cymreig yn amrywio mewn maint a phris, o £10 i £150 yn cael eu hanfon i gartrefi dros Brydain Fawr erbyn hyn.

Hwyl am y tro, siaradai a chi eto cyn y Nadolig.

            Cafodd y Ffermwyr Ifanc ddau ddiwrnod da yn y Ffair Aeaf a'r mwyafrif wedi troi allan i gystadlu er gwaethaf'r eira a'r rhew. Mi wnes i ddechrau ffasiwn newydd gyda fy 'sgidiau cerdded a sanau trwchus gyda ffrog, ond oni'n dwym ac yn saff ar fy nhraed a dyna beth oedd yn bwysig! Odd hi'n oer yna, a tymheredd gyda'r nos yn disgyn yn isel iawn. Dwi'n siwr bod ffermwyr yn falch o gael y cyfle i ddianc i'r ffair i gael newid o ddadleth pibellau a chario dŵr sydd wedi bod yn waith ychwanegol iddynt yn ystod y cyfnod oer yma.

            Oni'n sylwi ar yr ŵyn sydd yn y cae drws nesa' yn mynd i'r cloddie i chwilio gwyrddni oedd yn dod i'r golwg drwy'r flanced o eira. Dwi 'di gweld sawl anifail yn hwpo'i ben allan drwy'r ffens yn edrych am borfa yng nghanol yr eira ma wrth drafaelu yn ystod yr wythnos diwethaf.

            Odd rhaid fi fynd nôl i Lanelwedd ddydd Gwener i gyfarfod. Roedd yr hewl yn golew ar y ffordd yno ond ar y ffordd adre tua 4 o'r gloch roedd hi'n bwrw eira eto a phopeth yn dechrau gwynu. Pwyll pia hi mewn amgylchiadau fel hyn ag roedd hi'n braf cyrraedd yn ôl lawr i lefel y môr, lle roedd glaw yn hytrach nag eira ar ôl pasio dros 'Steddfa.

Balch iawn on i o gael diwrnod sych ddydd Sadwrn diwethaf ar gyfer 'Steddfod CFfI Cymru. Roedd hi'n ddiwrnod gret o gystadlu yn y Neuadd Fawr, Aberystwyth a phawb yn mwynhau y wledd o dalent sy'n byrlymu ymysg aelodau'r CFfI. Ychydig yn brin oedd y lle gefn llwyfan, yn enwedig ddechrau'r prynhawn a dyna ddiolch am ddiwrnod sych i helpu gadw hwyliau pawb yn uchel! 'Sdim yn wath na gorfod redeg yn ôl ac ymlaen i'r llwyfan gan osgoi cawodydd. Mi fu'r darllediad o'r 'steddfod ar S4C yn dipyn o lwyddiant a chanmol uchel wedi bod i'r rhaglen.

Mae'r wythnos yma wedi hedfan ond daeth prawf pellach fod y flwyddyn yn hedfan heibio hefyd ar fy ymweliad blynyddol i Ffair Fawr Aberystwyth. Dyw'r 'Dolig ddim ymhell os yw goleuadau llachar y ffair yn denu pawb i'w grombil wedi eu lapio mewn cotiau mawr, scarff, menyg ac ambell i het liwgar. Mae gen i swydd bwysig ar y noson yma, a'r teitl 'daliwr bag swyddogol' yn hunan esboniadwy! Dwi ddim yn hoff o'r reids ond mi wnes i fentro ar y 'Waltzers' fel bo fi'n gallu dweud bo fi di trio un reid yn y ffair.

Daeth cyfle ddydd Mercher i finne a fy nghyd-swyddogion gyda CFfI Cymru gwrdd ac Elin Jones, y gweinidog materion gwledig a hynny yng Nghaerdydd. Rydym yn lwcus iawn ein bod yn cael y cyfle i gwrdd a'r gweinidog yn rheolaidd er mwyn cael diweddariad ar brif bynciau trafod y sector amaethyddol. Mae'n gret fod barn y ffermwyr ifanc yn cael ei werthfawrogi ac ein bod yn cael ein cynnwys mewn trafodaethau a daeth gwahoddiad i gynrychiolydd o'r CFfI eistedd ar banel adolygu Glasdir. Bu sgwrsio helaeth ar CAP a Glasdir yn ogystal a'r Cynllun Cymorth i Newydd Ddyfodiaid.

Brrrrrrr, yw'r ffordd orau o ddisgrifio bore dydd Iau. Dwi ddim yn berson bore ond roedd rhaid codi am 4.20am i ddala tren o Aberystwyth i Lundain am 5.15am. Roedd hi'n rhewllyd iawn tu allan, ond r'on i wedi grochuddio sgrin flaen y car y noson cynt gan bo dim chwant arnai fod allan gyda'r de-icer amser hynny o'r bore. A gredwch chi mae -6°c oedd yn fflachio yn y car? R'on i di gwisgo fel y 'Michelin man' yn barod ar gyfer taith ar dren oer. Yn Machynlleth roedd blanced o eira yn orchudd dros y dref, ond welais i ddim eira wedi hynny ar y daith. A pham wedwch chi on i'n mynd i Lundain, wel am ginio i Dy'r Arglwyddi. Roedd Arglwydd Plumb yn gwesteio cinio i ddathlu 150 mlynedd o RABI, i nodi diwedd ei gyfnod e fel llywydd yr elusen ac i groesawi'r Duke of Gloucster yn lywydd newydd. Yn wir fues i'n ddigon ffodus o gael eiste o gwmpas bwrdd o 10 yn cael cinio gyda'r Duke, ond ges i ddim o'r cyfle i siarad ag e yn anffodus. On i nol yn Aber neithiwr am 9.30pm a sdim ond un gair i ddisgrifio hyn eto ond brrrrrr.

Pa dywydd ddaw dros y penwythnos tybed? Efallai bod yr awyr coch dros Llanddeiniol bore ma yn rhyw arwydd i ni achos fel dywed yr hen ddywediad 'red skies in the morning, sheperds warning'.

Ar ôl cystadlu brwd dros dydd Sadwrn a dydd Sul (20fed a 21fed o Dachwedd) fe gaethom gyntaf a dau drydydd. Dechrau da felly i'r gaeaf ac edrychwn ymlaen nawr i'r Ffair Aeaf yn Llanelwedd wythnos nesa' gyda chwech o'n hanifeiliaid yn cystadlu. Byddaf hefyd yn treulio amser ar stondin Fferm Ffactor yn hyrwyddo'r gyfres ac annog rhagor o bobol i gystadlu yn y rhaglen nesaf yn 2011.

Hwyl am nawr ac fe welai chi yn y Ffair Aeaf gyda'r tywydd yn ei addo i oeri i ni gyd yma yng Nghymru.

Roedd Dydd Sadwrn yn ddiwrnod cyffrous a llawn bwrlwm ym myd y ffermwyr ifanc, gydag un o uchafbwyntiau'r calendr sef yr Eisteddfod C.Ff.I. Cymru. Roedd y Neuadd Fawr, Aberystwyth yn orlawn gyda chystadleuwyr a chefnogwyr brwd. Braf oedd gweld y cyfryngau yn rhoi cyfle i arddangos talentau'r aelodau, a dod a difyrrwch y dydd i gartrefi dros Gymru gyfan a thu hwnt. Roedd hi'n brofiad gwych cael cystadlu ar y llwyfan yn cynrychioli Sir Gâr yn y llefaru unigol dan 26 a daeth y sgets o'n clwb ni i'r brig yn cynrychioli'r sir hefyd. Ar ôl yr holl waith caled o baratoi ac ymarfer roedd hi'n awyrgylch wych yn y neuadd a chael cyfle i gymdeithasu ychydig gyda ffrindiau'r mudiad ar draws Cymru gyfan. Llongyfarchiadau mawr i bawb!

Roedd gwyntoedd cryfion yr wythnos cynt yn parhau ddiwedd wythnos diwethaf a'r babell a adeiladwyd dros dro ar gyfer gwobrau Gwir Flas yn Hwlffordd yn cael ei hyrlio'n ddidrugaredd gan y gwynt. Yn wir, bu rhaid iddynt symud y bar i'r brif sied oherwydd canllawiau iechyd a diogelwch. Er gwaetha hyn bu'n noson dda ac yn agoriad llygaid i'r amrywiaeth o'r bwydydd o safon uchel sy'n cael eu cynhyrchu yma yng Nghymru. Roeddwn yno yn cynrychioli'r CFfI ar wahoddiad Dunbia oherwydd iddynt hwy ennill gwobr efydd am gynllun marchnata Cig Oen sy'n cael ei redeg mewn cydweithrediad a'r CFfI a Sainsburys. Llongyfarchiadau i holl enillwyr y noson.

Tra mod i yn trafaelu Cymru bu'n ddiwrnod bishi dydd Sadwrn ar y ffarm wrth iddynt ddethol a pharatoi'r ŵyn menwod ar gyfer mynd mas ar dac.  Roedd angen pâr o 'leggins' ar gyfer y jobyn 'ma yn ôl dad gan bod hi di bod yn bwrw'n gyson a'r ŵyn yn wlyb. Ma tipyn mwy o waith gyda symud defaid nawr wrth gwrs gyda'r angen am dagio dwywaith.

Digon oer oedd hi fore Llun yng Nghaeredin a'r palmentydd wedi gwynu dros nos. Ro'n i yno ar gyfer cyfarfod y 5 gwlad, sef mudiadau ffermwyr ifanc yr Alban, Lloegr, Gogledd Iwerddon ac Iwerddon yn dod ynghyd i rannu profiadau a thrafod syniadau. Cyfle gwych i ddysgu mwy am yr hyn sy'n mynd ymlaen yn y gwledydd eraill a gobeithio bydd cyfle i gydweithio ar brosiect newydd 5 gwlad yn ystod 2011. 'Dwi wastad yn synnu pa mor gloi ma tywydd yn gallu newid o fewn pellteroedd cymharol fach. R'on i'n trafaelu adre ar y M4 yn hwyr nos Lun ac mi brofais gawodydd trymion o law gyda dŵr yn tasgu oddi ar y draffordd, yna cyfnodau sych heb dystiolaeth o law diweddar, yna niwl trwchus a phrin fy mod yn gallu gweld 100 metr o'm mlaen. Roedd y tymheredd wrth gwrs yn amrywio hefyd a nos Lun Alltwalis, Sir Gâr oedd y man lle bu'n nhraed ar eu hoeraf gyda thymheredd o -3°c yn fflachio yn y car.

Heddi mae'r ŵyn menwod wedi cyrraedd ar eu gwyliau dros y gaeaf o ochrau Llanbed yn agosach i'r arfordir yma yn Llanddeiniol. Mi fyddaf yn gallu cadw llygad ar rai ohonynt allan o ffenest fy 'stafell wely nawr ond wrth i'r glaw ddisgyn dros amser cinio a'r haul dorri mas drwy'r cymylau ymddangosodd Enfys arall yn yr awyr i'w cyfarch hefyd.

Yna Dydd Sul roedd hi'n Ddiwrnod Briffio a Dethol Teithiau Tramor Cymru yn Llanfair-ym-Muallt. Diwrnod arbennig ar gyfer cael hanes y cyfranwyr a fuodd ar deithiau dros y flwyddyn a fu yn cynrychioli'r mudiad ac yna  roedd cyfweliadau ar gyfer teithiau at y flwyddyn sydd i ddod. Cefais y fraint y llynedd o deithio gyda'r mudiad i Seminar yr Hydref oedd wedi'i drefnu gan 'Rural Youth Europe' sef yr ymbarél ar gyfer mudiadau ieuenctid gwledig ar draws Ewrop. Lleoliad y Seminar oedd Ayr yn yr Alban ac mae'n rhaid dweud roedd hi'n wythnos fythgofiadwy lle gwnes i lawer o ffrindiau newydd a dysgu sgiliau newydd am y byd gwaith wrth fynychu nifer o weithdai arbenigol oedd wedi cael eu trefnu ar ein cyfer yn ymwneud â thema'r wythnos sef 'Make It Work'. Braf yw cael dweud cefais fy newis dros y penwythnos i deithio fel rhan o dîm i'r Rali Ewropeaidd haf nesaf. Dwi methu aros! Mae'n dipyn o anrhydedd i mi gael teithio i Slofenia lle lleolir y rali'r flwyddyn nesaf fel aelod  o dîm o 5 o Gymru a fydd yn llysgenhadon i'r mudiad ffermwyr ifanc yng Nghymru. Rwy'n hapus dros ben ac yn edrych ymlaen at y profiad yn barod!

Dwi'n dal i ddod i arfer a'r newid yn yr awr, ma hwn di dwysáu'r tywydd garw ry' ni wedi'i brofi dros yr wythnos dwethaf. Mae codi mas gyda'r nos i fynd i gyfarfod yn dipyn anoddach pan mae'r tân ar gyn yn y 'stafell fyw, y gwynt yn chwythu ac mae mor ddu â bola buwch tu allan (neu falle bo fi'n dechre mynd yn hen!). Dros y penwythnos mi fues i ar dramp i Eisteddfod CFfI Maldwyn yn Llanidloes. Mi wnes i fwynhau gwylio'r cystadlu dros y cwpl o oriau fues i yno, ond dim cweit cystal oedd y siwrne adre dros 'Steddfa mewn glaw cyson a thrwm. Galwes i mewn yn hwyrach mlan nos Sadwrn i noson agored yn Sgubor Tylau, bwyty newydd fy ffrind a'i theulu yn Bwlchllan ac yn wir i chi tra buon ni'n glyd tu fewn mi fu hi'n bwrw cesair. Ma'r gaeaf yn cau amdanom erbyn hyn.

Daeth mwy o dystiolaeth o hynny neithiwr pan es i nol i'r car wedi cyfarfod ar faes y Sioe yn Llanelwedd. Roedd y tymheredd yn 0°c a'r sgrin fach ar y car yn fflachio 'ice alert' arnai. Dim y noson orau i anghofio'n nghot fawr yn y stafell gyfarfod! A do yn wir wrth ei throi hi am adre mi welais raean ar yr hewl am y tro cyntaf eleni a phasio'r lori graean ychydig yn ddiweddarach. Dwi'n siwr ma dyma'r tro cyntaf o lawer bydd y lori raean a minnau yn cyd-yrru ar hyd hewlydd Cymru dros y gaeaf!

Cefais benwythnos digon prysur ar y fferm, a threuliais y rhan fwyaf o'm hamser yn helpu Dad i sortio'r defaid allan. Roedd 200 o ddefaid ifanc a ŵyn benyw yn mynd allan ar dac dros y Gaeaf.  Mae'n rhaid chwilio am borfa ychwanegol i'r stoc gan ei fod yn prinhau adeg yma o'r flwyddyn. Felly roedd rhaid eu rhannu a'u paratoi yn barod i fynd i ffwrdd i fferm ger Caerfyrddin. Cefais ddigon o ymarfer corff hefyd yn rhedeg ar ôl ambell ddafad benwen, oedd yn benderfynol o fynd rhyw ffordd arall! Dyna ddefaid i chi! Byddant yn dod yn ôl i'n fferm ni adeg y Gwanwyn cyn i gyfnod yr wyna ddechrau.

Nos Sadwrn mi fues i yng nghinio Cadeirydd a Llywydd, Ffederasiwn Ffermwyr Ifanc Sir Gâr. Mae'r flwyddyn gyfansoddiadol yn dod i'w therfyn yn ein sir ni a swyddogion newydd ar fin cael eu hethol. Roedd hi'n noson arbennig i sôn am lwyddiannau Sir Gâr o dan arweiniad ein Cadeirydd Mr Owen Davies a'n Llywydd Mr Hugh Richards. Mae calendr y C.FF.I. bob amser yn llawn dop a braf oedd cael cyfle i edrych nôl a chymdeithasu ymysgu ffrindiau'r mudiad! 

Amser yma o'r flwyddyn mae pawb wrthi yn torri cloddiau, rydym wedi gorffen adref ac mae'r peiriant bellach nôl yn y sied am flwyddyn arall.

Dydd Gwener (29.10.10) buom yn marchnad Aberhonddu a braf yw gweld prisiau yn dal eu tir er fod gaeaf drud o'm blaenau i borthu'r anifeiliaid gan fod prisiau dwysfwyd, gwellt a thanwydd yn mynd i fyny yn wythnosol.

Rwyf wedi porri trwy canllawiau "Glastir" ond heb ddod i benderfyniad pendant eto a fydd yn addas ar gyfer ein fferm ni yn Tŷ Hen, felly hwyl i chi am y tro.