Ma'r wythnosau 'ma'n hedfan! Does dim digon o oriau mewn diwrnod weithiau dwi'n dweud wrthoch chi!  Adeg y cneifio wedi gorffen ar y fferm ers tro bellach a'r gwlân wedi cael eu pacio a'i lwytho ar lorri ac wedi cyrraedd y ffatri wlân erbyn hyn hefyd. Does dim llawer o elw yn y gwaith 'ma cofiwch ond rhaid gwneud rhag bod y defaid yn dioddef. 'Ma dad yn gwneud y gwaith cneifio ei hunan gyda ni adref felly ma' hyn yn llwyddo i gadw'r costau i lawr gryn dipyn. Gwaith caled yw cneifio cofiwch. Dwi'n codi 'nghap i'r rhai sydd yn mynd allan bron bod dydd am wythnosau ac yn cneifio miloedd mewn blwyddyn. Pacio'r gwlân fydda i'n hoffi gwneud.

Mae'r cynhaeaf wedi dechrau hefyd ac fe wnaethon ni dipyn bach o silwair rhyw bythefnos nôl nawr pan ddaeth rhai diwrnodau sych a chynnes ond ma' dal ychydig ar ôl i'w wneud. Aros am gyfnod bach sych arall ry' ni ar hyn o bryd er mwyn cael gorffen y cynhaeaf am eleni.

O ran y Ffermwyr Ifanc rydym ni wedi cael hoe fach o'r clwb wythnosol ond mae dal digon wedi bod yn mynd yn ei flaen. Dwi'n credu oni yng nghanol trefnu'r dathliadau y tro diwethaf y gwnes i ysgrifennu ac aeth y digwyddiad hynny'n hwylus ofnadwy. Dwi bellach hefyd yn gadeirydd ar glwb C.Ff.I Dyffryn Cothi felly bydd digon o bethau i gadw fi allan o drwbl am y flwyddyn nesaf eto! Rydym fel clwb wedi bod yn trefnu Gornest Gneifio Cothi. Digwyddiad blynyddol y clwb sy'n denu nifer fawr o gneifwyr ar draw Cymru a thu hwnt. Mae gennym ni nifer o gneifwyr profiadol a rhai ifanc yn aelodau o'r pwyllgor ac mae'n braf gweld pawb yn dod ynghyd ar ddiwrnod tebyg i fwynhau gweld rhai o gneifwyr gorau'r byd wrth eu gwaith.  Dwi methu aros ar gyfer gornest Cymru v Seland Newydd, mae'r awyrgylch yn wych a chystal â'r sioe frenhinol! Gobeithio bydd hi'n ddiwrnod hwylus yfory.

Wedyn pacio yw'r gwaith nesa' y penwythnos yma yn barod i fynd i'r Sioe. Dyma fy ngwyliau blynyddol! Edrych mlaen yn arw i gwrdd â ffrindiau a mwynhau gwylio'r cystadlu a chwilio am ambell i fargen ymhlith y stondinau! Efallai wela i chi 'na!

Oes rhywun arall heblaw fi a dim clem pa dymor ni ynddo!? Mae'r tywydd ma wedi bod mor gyfnewidiol, sai'n gwbod beth i ddisgwyl yn yr oriau nesaf, heb sôn am y dyddiau nesaf.

            Mae wedi bod yn dymor y cneifio a'r cynhaeaf lawr ar y fferm. Cafwyd diwrnod hwyliog gyda'r cneifio ond lwcus bod y defaid i gyd wedi dod mewn y noson cynt yn sych neu ar stop fyddai di bod fel arall. Dwi ddim yn arbenigwr o bell ffordd ond dwi'n siwr bo pawb ar eu hôl hi gyda'r silwair ma eleni! Efallai taw'r gwahaniaeth mwya yw bo pawb di bod yn scwlcan cyfleoedd gore medra nhw, gan fod dim dal ar y tywydd ma. Un diwrnod mae'n sych gorcyn a dwi'n toddi a'r diwrnod nesaf ma'n nghoesau i'n troi'n las a dwi nôl yn fy nghot fawr.

            Wythnos diwethaf a dros y penwythnos sydd newydd basio mae llwythi o gaeau wedi eu clirio ar draws y wlad. Ma nhw wedi dod i ben a beni'r cynhaeaf lawr ar y fferm hefyd - byrnau mawr a'r pit silwair wedi llanw. Yn ystod tywydd sych diwedd wythnos diwethaf cafon nhw wair hefyd felly ma pawb yn hapus! Dwi'n siwr nad yw tymor y cynhaeaf yn dda i lefelau 'stress' unrhyw ffermwr. Ma na lot o gerdded nôl a mlan ar hyd y clós yn mynd mlan a rhedeg i'r tŷ i wylio'r tywydd wrth iddi nhw drio penderfynu ar y 'plan of action'!

            Ges i'n nala mas yn bert gan y tywydd cyfnewidiol ma wythnos nôl. Edrych mas o'r ffenest ar fore diwrnod chwaraeon CFfI Cymru ac oedd hi'n ddiwrnod mwll a diflas felly gwisgo'n addas. Erbyn cyrraedd Aberhonddu roedd hi'n wahanol fyd ac a'r haul yn dan boeth erbyn ganol dydd. Roedd pâr o siorts yn y car, felly dyma newid iddi nhw rhag i mi ferwi yn fy nhrowsus hir. Ond doedd dim cysgod lle on i'n stiwardio'r hoci a llosgais fy nhroed chwith yn ofnadw', ofnadw'! Oni bai am y sombrero ar fy mhen (oedd yn digwydd bod yn y car ar ol parti iâr y noson cynt!), dwi ddim yn siwr shwt siap fydde wedi bod arnai! Chwyddodd fy nhroed i ddwy waith ei faint am dridie a finne'n hercian fel môr leidr a choes bren o gwmpas y lle. Gwers galed iawn i'w dysgu ond fydd yr eli haul yn fy mag am weddill yr haf, rhag ofn!

            Dwi di bod yn brysur iawn gyda'r CFfI yn ystod y mis diwethaf ac yn teimlo fel 'sy fi wedi byw ar olwynion. Y Sioe Fawr sy'n mynd a'n bryd ni nawr a bois bach dwi'n dechrau mynd yn egseited. Dwi'n edrych ymlaen i weld yr holl gystadlu yn adran y CFfI a mwynhau'r adloniant yn y Pentref Ieuenctid. Un peth fyddai yn gwneud dros yr wythnos nesaf yn bendant, gweddi fach yn gofyn yn garedig am dywydd ffafriol yn ystod y Sioe. Sai'n meddwl bo fi'n gofyn gormod!