Merch fferm o Sir Gaerfyrddin wyf fi, sy'n gweithio llawn amser gyda Menter Iaith leol ond hefyd yn byw gartref ar y fferm ac yn cynorthwyo'n rheolaidd ar y fferm deuluol, sy'n cynnwys gwartheg godro, ychydig o wartheg sugno a defaid.  Gyda'r Hydref ar ei anterth a'r coed yn dadwisgo'u dail mae'r dydd bellach yn byrhau. Mae hi wedi troi'n wlyb gyda chawodydd trymion yn ddiweddar. Mae'r tywydd effeithio ar y tir sydd bellach yn ddirlawn gan achosi i'r anifeiliaid adael olion traed dwfn yn y bylchau a'r caeau sy'n troi'n fwdlyd yn gyflym iawn. Caiff y gwartheg eu symud dan do erbyn hyn i glwydo am y Gaeaf. Digon oer oedd hi neithiwr hefyd wrth i mi gael fy neffro yn oriau mân y bore gan fy nhad yn galw bod angen help i dynnu llo! Lapiais yn gynnes cyn mentro allan i'r tywyllwch! I fod yn onest ond ychydig oriau oni wedi bod yn cysgu gan fy mod wedi bod yn y Clwb Ffermwyr ifanc y noson honno yn ymarfer tuag at yr Eisteddfod. Cyfnod prysur iawn yw hi i'r mudiad ymhob clwb a  sir, gyda blwyddyn newydd llawn top o weithgareddau wedi cychwyn. Y swyddogion yn brysur yn trefnu a'r aelodau yn paratoi yn ddyfal at y cystadlu. Cyfnod yr Eisteddfod yw hi ymhob sir bron ar hyn o bryd, gydag amrywiaeth eang o gystadlaethau i ddiddanu pawb o bob oedran; o'r adran ysgafn fel y sgets a'r ddeuawd ddoniol, i'r canu corawl,  unawdau a'r llefaru.  Ceir digon o amrywiaeth i ddiddanu pawb o bob oed. Bydd Eisteddfod C.Ff.I. Cymru yn Aberystwyth felly os bydd llwyddiant, efallai cawn fynd am dro yno i gynrychioli Sir Gâr!

Wedi cael hydref cymharol sych a mwyn ar y cyfan, gyda'r gwartheg yn mwynhau allan, braf ydi nodi fod yr holl wartheg bellach dan do yn barod i'w gaeafu. Gyda'r tywydd wedi troi wythnos yma rydym wedi bod yn hel defaid allan i bori ar ffermydd yn sir Benfro, ac wedi prynu dros 300 o wyn stor i'w tewhau yn ystod y gaeaf ar 21 erw o "stuble turnips".

Amser yma o'r flwyddyn mae pawb wrthi yn torri cloddiau, rydym wedi gorffen adref ac mae'r peiriant bellach nôl yn y sied am flwyddyn arall.

Dydd Gwener (29.10.10) buom yn marchnad Aberhonddu a braf yw gweld prisiau yn dal eu tir er fod gaeaf drud o'm blaenau i borthu'r anifeiliaid gan fod prisiau dwysfwyd, gwellt a thanwydd yn mynd i fyny yn wythnosol.

Rwyf wedi porri trwy canllawiau "Glastir" ond heb ddod i benderfyniad pendant eto a fydd yn addas ar gyfer ein fferm ni yn Tŷ Hen, felly hwyl i chi am y tro.